Ekesodu 36:1-38
36 “Besalel una er tom vea Oholiabi man hanma or u fan tom tsema tsema,* u Yehova a ne nan kwaghfan man mkav, sha u nana fa u eren hanma tom u ken icighanjiir la cii, vough er Yehova a kaa nahan.”+
2 Tsô Mose yila Besalel man Oholiabi man hanma or u fan tom u Yehova wa kwaghfan ken ishima i nan yô,+ hanma or u ishima mgbegha nan nan tsua iyol i nan u za eren tom la cii.+
3 Maa ve ngohol uiyua+ mba Mbaiserael va a mi sha ci u tom u hen icighanjiir la cii hen Mose. Nahan kpa hanma sev yô, ior lu di van a uiyua mba sha asema a ve her tsô.
4 Mba hiin icighantom la yô, mba fan tom cii gba van môm môm
5 va kaan a Mose ér: “Ior mba van a akaa je ka ganden tom u Yehova a kaa ér i er la ken inya.”
6 Nahan Mose na zwa ér i yôô ken afo cii, i kaa ér: “Nomso man kasev, de kera ve nen a akaa a va eren icighan iyua la a mi ga.” Tsô i yange ior, ve de u van a akaa.
7 Ikyav mbira kuma u eren tom la cii a mi, je neer a neer.
8 Tsô mbafantom mbara cii+ er tabernakel+ u sha akondo a tenti pue la, sha ikyondo i tumen i dedoo man sha mou u buluu-buluu* man sha mou u nyian dindee man sha mou u nyian bong; a* tume foto u ucerubi sha a.+
9 Ilihen i hanma ikyondo i tenti yô, lu aseva 28* igbanger i i di lu aseva 4. Akondo a tenti la cii lu kwaghmôm.*
10 Tsô a zua akondo a tenti ataan hingir kwaghmôm, maa shi a zua akondo a tenti a ataan agen la kpaa hingir kwaghmôm.
11 Been yô, a er uingbegh sha mou u buluu-buluu* a zer sha kurugh ku ikyondo i tenti i môm ape ia zua la. Shi a er nahan sha kurugh ku ikyondo i tenti i masen, hen ijiir shon vough ape ia zua la.
12 A er uingbegh 50 a zer sha ikyondo i tenti i môm, shi a er uingbegh 50 a zer sha kurugh ku ikyondo i tenti igen la hen ijiir i ia zua la, sha er uingbegh mbara vea zua ishigh yô.
13 A mase eren uiwever mba sha zanaria 50, maa a tôô uiwever mbara a zua akondo a tenti la a mi, nahan tabernakel la cii hingir môm.
14 Maa a er akondo a tenti a cirin sha tabernakel la sha aive a ivo.* A er akondo a tenti la 11.+
15 Ilihen i hanma ikyondo i tenti yô lu aseva 30, igbanger di lu aseva 4. Akondo a tenti a 11 la cii lu kwaghmôm.*
16 A zua akondo a tenti la ataan hingir kwaghmôm, shi a zua akondo a tenti ataratar agen la kpaa hingir kwaghmôm.
17 Been yô, a er uingbegh 50, a zer sha kurugh ku ikyondo i tenti i masen hen ijiir i i zough la, shi a hurugh ikyor 50 a zer sha kurugh ku ikyondo i tenti igen i i zough vea i la.
18 Maa a er uiwever mba sha togula 50, sha u zuan tenti la a mi ér a hingir kwaghmôm.
19 A er kwagh u cirin tenti la a mi sha akôv a anomaiyôngo a i nyian a yô, shi a er kwagh ugen u cirin sha ngula sha akôv a ayu.*+
20 Tsô a er mtôm ma tabernakel la ma lun ipye, sha kon u akashia,*+ ma tile jighilii.+
21 Ityaven i hanma ityôgh lu aseva pue, igbanger i ki di lu ishiva i môm man tiôn.
22 Hanma ityôgh yô yange ki lu a atsôr ahar a a* lu kwaghmôm yô. Mtôm ma tabernakel mara cii kape a er ma je la.
23 Nahan a er mtôm ma lun ipye ma ken imbusutariyan i tabernakel la, mtôm mara ma lu 20, ma ver ishigh vegher u imbusutariyan la.
24 Shi a er agbur 40 sha azurufa a lun a aan, lu agbur a mtôm ma lun ipye ma 20 mara ma a tema sha mi yô, agbur ahar lu shin ityô i ityôgh i môm, sha er atsôr a ahar la aa nyôr a tema shimi yô, mtôm magen mara kpaa ma lu a agbur ahar a lun a aan, a atsôr la a nyôr a tema shimi yô.+
25 Ken vegher u tabernakel ugen la, ka vegher u imbusutarimese la je la, a er mtôm 20 ma lun ipye
26 kua agbur a ma 40 a sha azurufa a lun a aan, agbur ahar a lun a aan lu shin ityô i ityôgh i môm, shi agbur ahar ahar a lun a aan lun shin ityô i mtôm magen mara kpaa.
27 A er mtôm ma lun ipye mtaratar ken ijime i tabernakel, vegher u shin ityôtar la.+
28 A er mtôm ma lun ipye mhar, ma suen azongo ahar a shin ityô i tabernakel la.
29 Mtôm ma lun ipye man lu a ikpande ihiar ihiar, hii shin inya zan zan kôndo za nyôr hen ape i zor i sha ihye i hiihii la. A er nahan sha mtôm ma suen azongo a ahar la.
30 Nahan mtôm ma lun ipye mara cii ma lu anigheni, kua agbur a sha azurufa 16 a lun a aan, agbur ahar a lun a aan lu shin ityô i hanma ityôgh.
31 Maa a er itilan sha kon u akashia; a er itilan itian sha ci u mtôm ma lun ipye ma ken imbusu i tabernakel i môm la,+
32 shi a er itilan itian sha ci u mtôm ma lun ipye ma ken imbusu i tabernakel igen la, shi a er itian sha ci u mtôm ma lun ipye ma ken ijime i tabernakel, vegher u shin ityôtar la.
33 A er telan u hen atô, sha er a tela u hen atôatô u mtôm ma lun ipye mara, ua mough shin ikighir ingila a va tuur sha ikighir ingin yô.
34 A cir mtôm ma lun ipye mara zanaria iyol, shi a er ahye a sha zanaria a kôron itilan la, shi itilan la kpaa a cir i zanaria iyol.+
35 Maa a er ikyondo i yisan+ sha mou u buluu-buluu* man mou u nyian dindee man mou u nyian bong kua ikyondo i tumen i sha mou u dedoo. A tume foto u ucerubi+ sha mi.+
36 Maa a er mtôm mnyiin sha kon u akashia a cir ma zanaria iyol, kua uiwever mba sha zanaria, shi a er ma agbur anyiin a sha azurufa a lun a aan sha mi.
37 Been yô, a er ikyondo i sha hunda u tenti la sha mou u buluu-buluu* man mou u nyian dindee man mou u nyian bong kua ikyondo i dedoo i i tume a tume yô, i zom akaa ne cii i tume ijiir i môm.+
38 A er mtôm ma i mtaan kua uiwever mba ma. A cir mtom ma mtôm mara kua uishindan mba ma* zanaria iyol, kpa agbur a ma a ataan a lun a aan sha mi la yô, a er sha togula.
Ngeren mba shin kpe
^ Zwa Heberu, “hanma or u lun a kwaghfan ken ishima.”
^ Shin “mou u kwer.”
^ Ikyav tese ér ka Besalel je la.
^ Ishiva i môm yange i lihe i kuma usentimita 44.5 (uinci 17.5). Nenge Ngeren u Seer u B14 la.
^ Shin “lu ilihen man igbanger kwaghmôm.”
^ Shin “mou u kwer.”
^ Shin “ice i ivo.”
^ Shin “lu ilihen man igbanger kwaghmôm.”
^ Gayô lu annyam ugen u shin mnger u a bee a bee ayu yô.
^ Akashia ka kon u lun a asaa. Ngu kposo a kashia u ior ve fe un nyian ne.
^ Shin “ikpande i horon ihiar i i.”
^ Shin “mou u kwer.”
^ Shin “mou u kwer.”
^ Shin “ahye a ma.” Ahye la lu sha u zuan kwagh a mi.
