Ekesodu 13:1-22
13 Yehova shi lam a Mose kaa ér:
2 “Hanma wannomso u i hii maren* ken Iserael cii, tsegha un* sha ci wam. Hanma wannomso u orumace nana hii maren, man hanma kwagh u zendenya una hii maren, u a lu nom cii, ka u wam.”+
3 Tsô Mose kaa a ior ér: “Umbur nen iyange i i due a ven ken Igipiti,+ ken ya u kpan kera ne, sha ci u ka sha uwegh ku ageegh je Yehova a dugh a ven heen kera ye.+ Nahan or a de ye kwagh u a lu a kwa ga.
4 Ne mba duen heen kera sha iyange ne, ken uwer u Abiba* ne.+
5 Zum u Yehova una za a ven ken tar u Mbakaanan man Mbahiti man Mbaamor man Mbahivi man Mbayebushi,+ u a bum a uter enev ér una na ne,+ tar u u mgbough a atumba man iyough la yô,+ eren nen iniongo i umbur kwagh ne ken uwer ne.
6 Ayange ataankarahar cii ne yaan beredi u i we kwa sha mi ga yô,+ nahan sha iyange i sha utaankaruhar la yô, a er iniongo i Yehova.
7 Sha ayange a ataankarahar la cii, yaan nen beredi u i we kwa sha mi ga yô;+ i de zough ne a kwagh u i we kwa sha mi ga,+ shi kwa* kpaa u de lun ken tar wen ga.*
8 Shi kaa wan wou sha iyange la wer, ‘Ka sha ci u kwagh u Yehova yange er a mo shighe u m due ken tar u Igipiti kera la.’+
9 Shi kwagh ne una lu u ikyav sha uwe, man kwagh u umbur sha icul,*+ sha er tindi u Yehova una lu ken zwa wou yô, sha ci u ka sha uwegh ku ageegh je Yehova yange due a we ken Igipiti kera ye.
10 Kuran tindi ne sha shighe u i ver la ken hanma inyom.+
11 “Zum u Yehova una za a we ken tar u Mbakaanan u yange bum a we kua uter ou ér una na u la yô,+
12 tsegha hanma wan wou u nomso u hiihii* kua hanma nom u zendenya wou a hii maren la cii, sha ci u Yehova. Hanma kwagh u a lu nom cii ka u Yehova.+
13 Hanma wan u jaki you i hii maren cii yô, paa un sha iyôngo, man aluer u paa un ga yô, gema sombo un mon. Shi hanma waniunda wou u nomso cii kpaa gba u u paa un.+
14 “Aluer wan wou va pine u ér, ‘Inja i kwagh ne ér nyi?’ yô, kaa a na wer, ‘Ka sha uwegh ku ageegh Yehova yange due a vese ken Igipiti, ken ya u kpan kera ye.+
15 Zum u Farou taver ityough venda u den ér se yem yô,+ Yehova wua hanma waniunda u ken tar u Igipiti cii, hii sha waniunda u uumace zan zan due sha waniunda u zendenya.+ Ka nahan ve m lu nan Yehova nagh sha hanma kwagh u hiihii u a lu nom* ye. Shi m ngu paan hanma wan wam u iunda ken ônov av mba nomso cii.’
16 Kwagh ne a lu u ikyav i sha uwe man kwagh u kangen sha icul,*+ sha ci u lu sha uwegh ku ageegh Yehova due a vese ken Igipiti kera ye.”
17 Zum u Farou na ior mbara ian ér ve yem la, Aôndo yem a ve sha gbenda u u kar ken tar u Mbafiliti la ga, shin er u lu kôvora nahan kpaa. Sha ci u Aôndo kaa ér: “Alaghga zum u ior mbara vea za tagher a ityav sha gbenda yô, ishima ia gema ve, nahan vea hide vea yem ken Igipiti.”
18 Nahan Aôndo ningir a ior mbara, kar a ve sha gbenda u ken taaikyôngo hen Zegemnger u Nyian la.+ Kpa Mbaiserael mban due ken tar u Igipiti sha inja sha inja er ka ikyumutya nahan.
19 Mose tôô akuhe a Yosev kpaa lu yemen a mi, sha ci u Yosev yange er ônov mba Iserael bum a ishima ve i môm, a kaa ér: “Aôndo una va umbur ne kpee je, nahan ne duen yô, tôô nen akuhe am due nen a mi hen ijiir ne kera.”+
20 Ve mough hen Sukoti ve za haa afo hen Eteham, hen kpe u taaikyôngo la.
21 Yehova lu yemen ve sha hemen, a lu hemen ve gbenda atetan sha ibyeenegh ki lun er ityôgh nahan,+ tugh di sha usu u lun er ityôgh nahan, sha u nan ve iwanger. Nahan ve fatyô u zenden atetan man tugh cii.+
22 Ibyeenegh ki lun er ityôgh la kar hen ior mbara kera atetan ga, tugh kpaa usu u lun er ityôgh la kar hen a ve kera ga.+
Ngeren mba shin kpe
^ Shin “ver un kposo.”
^ Zwa Heberu, “Hanma waniunda u a bugh sagh.”
^ Nenge Ngeren u Seer u B15 la.
^ Shin “mwem ma hôron ma i nongo kwa sha mi.”
^ Zwa Heberu, “ken akighir a tar a en ga.”
^ Zwa Heberu, “hen kungwa.”
^ Zwa Heberu, “hanma or u nan hii bughun sagh.”
^ Zwa Heberu, “hanma kwagh u a bugh sagh cii.”
^ Zwa Heberu, “zeren hen kungwa.”
