Ekesodu 39:1-43
39 Ve er akondo a huan eren tom ken icighanjiir la a i tume tsembelee yô, sha mou u buluu-buluu* man mou u nyian dindee man mou u nyian bong,+ ve er uicighanmbaakondov sha ci u Aron,+ er Yehova kaa Mose nahan vough.
2 A er efodi+ sha zanaria man mou u buluu-buluu* man mou u nyian dindee man mou u nyian bong kua ikyondo i i tume sha mou u dedoo yô.
3 Ve cagh abamber a zanaria hingir par par, a ôv un hingir er ka kor nahan, sha er a tume un vea mou u buluu-buluu* man mou u nyian dindee man mou u nyian bong kua ikyondo i dedoo yô, i tume a tume.
4 Ve er un abamber a sha akende a i zua sha azongo a na a ahar a sha akende la yô.
5 Kwange u tumen* u u lu sha efodi sha er a kangen un nyôôsôô una tilen la kpaa,+ i er u sha akaa ne, zanaria man mou u buluu-buluu* man mou u nyian dindee man mou u nyian bong kua ikyondo i i tume sha mou u dedoo yô, vough er Yehova kaa Mose nahan.
6 Maa ve var awen a oniki shin ikwembe i sha zanaria, i gber ati a ônov mba Iserael sha mi er ka i gber ikyav sha kwagh nahan.+
7 A var a sha abamber a sha akende a efodi la, sha u a lu awen a umbur sha ci u ônov mba Iserael,*+ vough er Yehova kaa Mose nahan.
8 Maa a er ikpa i sha vanger la+ sha uwegh ku or u fan tom u eren hwe sha ikyondo, a er i er efodi la nahan, sha zanaria man mou u buluu-buluu* man mou u nyian dindee man mou u nyian bong kua ikyondo i i tume sha mou u dedoo yô.+
9 Zum u i gbire i yô, i lu azongo anyiin.* Ve er ikpa i sha vanger la, zum u i gbire i yô, ilihen man igbanger i i lu er ka ikyevwe nahan.*
10 Ve var awen sha mi iniongo inyiin. Nongo u hiihii la lu rubi man topashi man emeradi.
11 Nongo u sha uhar la lu torkoise man safir kua yasepa.
12 Nongo u sha utar la lu iwen i leshem man agati kua ametese.
13 Nongo u sha unyiin la lu krisolati man oniki kua yade. I var a cii shin ikwembe i sha zanaria.
14 Awen la zua sha ati a ônov mba Iserael mba 12 mbara, i gber ati la sha mi er ka i gber ikyav sha kwagh nahan. Hanma iti tile sha ityough ki ipyaven i môm ken uipyaven mba 12 mbara.
15 Maa ve tume ishiligh sha zanaria u wang sha ikpa i sha vanger la, er ka i tume kor nahan.+
16 Shi ve er ikwembe i sha zanaria ihiar kua ahye a sha zanaria ahar, ve gema ahye a ahar la ve wa sha azongo a ahar a ikpa i sha vanger la.
17 Mba been yô, ve gema ikyor i ihiar i sha zanaria la ve wa ken ahye ahar a a lu sha azongo a ikpa i sha vanger la.
18 Maa ve gema ijô ihiar i ikyor i ihiar la ve wa ken ikwembe i ihiar la, ve zer i sha abamber a sha akende a ahar a ken ishigh ki efodi la.
19 Maa ve er ahye ahar sha zanaria, ve wa a sha vegher u ken atô u azongo a ahar a ikpa i sha vanger, a a ne ishigh ken efodi la.+
20 Shi ve er ahye ahar agen sha zanaria ve wa ken ishigh ki efodi la, shin inya u abamber a ahar a sha akende, ikyua a ape i zua la, a lu kwange u tumen* u efodi la sha aôndo.
21 U masen yô, ve ta kor u buluu-buluu* sha ahye a sha ikpa i sha vanger la ve zer sha ahye a sha efodi la, sha er ikpa i sha vanger la ia tema ijiir i môm sha efodi la, ia lu kwange u tumen* la sha aôndo yô, vough er Yehova kaa Mose nahan.
22 Maa a er riga u efodi u lun a ave ga la, lu or u tumen akondo nan tume un ye, i er un cii sha mou u buluu-buluu.*+
23 Mon u riga u lun a ave ga la lu hen atôatô er ka mon u rigautya u iyôôgh nahan. I tume mon la ningir tser, sha er ua ande ga yô.
24 Maa ve er anzôr shin akur a riga u lun a ave ga la er ka pomegraneti nahan, sha mou u buluu-buluu* man mou u nyian dindee man mou u nyian bong, i zom i tume.
25 Ve er amem sha zanaria u wang, ve zer amem la hen atô u upomegraneti mbara, ningir akur a riga u lun a ave ga la cii tser, a lu hen atô u upomegraneti mbara.
26 Ve lu zeren amem musan vea upomegraneti, imemegh ki lu, pomegraneti a lu, zan zan ningir akur a riga u lun a ave ga la tser, riga u i huan i eren tom a mi la, vough er Yehova kaa Mose nahan.
27 Shi ve er akondo a dedoo a gban shin sha ci u Aron man ônov nav, lu or u tumen akondo tume a ye,+
28 kua tsar u kangen sha ityo,*+ sha ikyondo i dedoo, man akondo a kangen sha ityo sha ikyondo i dedoo,+ kua atôôn a wondo*+ a sha ikyondo i dedoo i i tume a tume yô,
29 kua ikyondo i kangen shin iwenge, i i tume sha ikyondo i dedoo man sha mou u buluu-buluu* man mou u nyian dindee man mou u nyian bong yô, i kohol cii i tume, vough er Yehova kaa Mose nahan.
30 U masen yô, ve er ankpande u engem sha zanaria u wang, lu icighanikyav i mtsegh,* i nger kwagh sha mi er ka i gber ikyav sha kwagh nahan, ér: “Yehova ngu icighan.”+
31 Ve ta kor u i er sha mou u buluu-buluu* yô sha mi, sha u a zer un sha tsar u kangen sha ityo* la yô, vough er Yehova kaa Mose nahan.
32 Nahan i er tom u tabernakel, tenti u kohol ker la cii i bee. Mbaiserael er hanma kwagh u Yehova kaa Mose cii.+ Ve er nahan vough.
33 Maa ve va a tabernakel la+ hen Mose, tenti la+ kua ikyav nav cii: lu uiwever nav+ man mtôm nam ma lun ipye+ man itilan na+ man mtôm nam man agbur a na a lun a aan sha mi;+
34 kua kwagh u cirin sha mi u sha akôv a anomaiyôngo a i nyian a yô,+ man kwagh u cirin sha mi u sha akôv a ayu,* kua ikyondo i yisan;+
35 man areki u Shiada kua igbough na+ man kuur la;+
36 man tebul a ikyav nav cii+ kua beredi u sha ishi;
37 man daarimenger u sha zanaria u wang la, kua amenger a na+ a i wa a sha nongo la, kua ikyav nav cii+ man mkurem ma haan tsaren;+
38 man atse+ a sha zanaria u wang man mkurem ma tseghan kwagh a mi+ man insensi u human doon+ man ikyondo i sha hunda+ u nyôron ken tenti la;
39 man atse a sha togula+ kua kper u a u sha togula la, man igbough mbi a+ man ikyav mbi a cii,+ kua gbangi man kwagh u veren un sha mi;+
40 man akondo a kasen tembe la kua mtôm ma u, man agbur a ma a lun a aan sha mi,+ man ikyondo i sha hunda+ u tembe la, man ikyor i tenti kua amande a tenti,+ man ikyav mbi eren tom a mi ken tabernakel u a lu tenti u kohol ker la cii;
41 man akondo a i tum tsembelee sha ci u tom u ken icighanjiir la, man uicighanmbaakondov sha ci u pristi Aron,+ kua akondo a ônov nav mba vea eren tom u pristi la.
42 Mbaiserael er ityom la cii vough, ve er hanma kwagh u Yehova kaa Mose cii.+
43 Zum u Mose va nenge tom u ve er la cii yô, a nenge er ve er hanma kwagh vough er Yehova kaa nahan yô, nahan Mose ver ve doo doo.
Ngeren mba shin kpe
^ Shin “mou u kwer.”
^ Shin “mou u kwer.”
^ Shin “mou u kwer.”
^ Shin “tsar u shin iwenge.”
^ Shin “mou u kwer.”
^ Shin “awen a umbur ônov mba Iserael a mi.”
^ Shin “mou u kwer.”
^ Shin “lu ilihen man igbanger kwaghmôm.”
^ Ka igbanger i mough hen ihyôwe i tamen va hen ihyôwe i kiriki la, zum u i san uwegh yô. Kuma usentimita 22.2 (uinci 8.75). Nenge Ngeren u Seer u B14 la.
^ Shin “tsar u shin iwenge.”
^ Shin “kor u kwer.”
^ Shin “tsar u shin iwenge.”
^ Shin “mou u kwer.”
^ Shin “mou u kwer.”
^ Shin “adikpo.” Yange i kange tsar ne sha ityo, a lu er ka idyer nahan.
^ Shin “akondo a huan ken atô.”
^ Shin “mou u kwer.”
^ Shin “icighankpande u sha zanaria.”
^ Shin “mou u kwer.”
^ Shin “adikpo.” Yange i kange tsar ne sha ityo, a lu er ka idyer nahan.
^ Gayô lu annyam ugen u shin mnger u a bee a bee ayu yô.
