Ekesodu 12:1-51
12 Tsô Yehova kaa a Mose man Aron ken tar u Igipiti ér:
2 “Uwer ne ua lu ne uwer u hiihii. Ua lu ne uwer u hiihii ken inyom.+
3 Kohol nen ior i Iserael cii, kaa nen a ve ner, ‘Sha iyange i sha pue i uwer ne yô, hanma or nana kôr iyôngo+ sha ci u ya u ter u nan, iyôngo i môm sha hanma ya.
4 Kpa aluer ma ya kehe kuma u yan iyôngo been ga yô, a kar iyôngo la ker vea ya u a dondo a na la, sha ingyegh ki ior mba ve lu her la. Shighe u ne lu karen kwar la yô, nenge nen ingyeghior man inyam i hanmô ve nana fatyô u yan la.
5 Iyôngo la i lu gbang gbang,+ i lu nomiyôngo u a kom inyom i môm yô. Kôr i lu gumiyôngo gayô kpev.
6 Nenge nen sha i doo doo zan zan uwer ne ayange 14,+ maa hanma tsombor ken nongoior u Iserael cii u sôngo i aikighe.+
7 I̱ mishi awambe la sha ikpande i ken ambusu a hunda man sha kpandehunda u sha, u sha ihinda i sha ayou a ve lu yan i ker la.+
8 “‘Ve̱ ya inyam la hen tugh mbun.+ Ve̱ mgbagh a mgbagh i sha usu, ve ya i sha beredi u i we kwa sha mi ga yô,+ kua sha ikyaiue i yuan.+
9 De yaan nen i kôugh ga, shi de jiidi nen sha mnger kpaa ga, kpa i mgbagh a mgbagh sha usu, ityough man akusu man ikyav mbi ken atô kpaa.
10 De veren nen ma kwagh a tsaan her ga, kpa kwagh u a neer a tse her yô, nande nen un sha usu.+
11 Ka gbenda u ne ya i je ne: tsule nen kwange shin iwenge, wa nen akôv shin angahar, kôr nen gbough ken uwe; yaan nen i fele fele. Ka Paseka* u Yehova.
12 Sha ci u m ngu zenden ken tar u Igipiti hen tugh mbun, me wua ônovmbaiundav mba ken tar u Igipiti, or kua zendenya cii;+ me ôr mbaaôndo mba Igipiti cii ijir.+ Ka mo Yehova.
13 Awambe la aa lu ikyav yen sha uya enev ape ne lu la; zum u me nenge a awambe la yô, me aver ne me kar, nahan ican la ia kera va sha a ven sha u timin ne zum u me lu tsahan tar u Igipiti la ga.+
14 “‘Iyange ne i lu ne iyange i umbur, eren nen iniongo ne, i lu iniongo i Yehova sha ikyov ikyov. Eren nen i, i hingir tindi gbem.
15 Ne yaan beredi u i we kwa sha mi ga yô, ayange ataankarahar.+ Sha iyange i hiihii la je, ne due a kwa* ken uya enev kera, sha ci u hii sha iyange i hiihii zan zan sha iyange i sha utaankaruhar la, or u nan ye kwagh u i we kwa sha mi cii yô, imbaor la nana de kera lu uma ken Iserael ga.*
16 Sha iyange i hiihii la ne er icighanmkohol, sha iyange i sha utaankaruhar la shi ne er icighanmkohol ugen. Sha ayange ne cii or a de eren ma tom ga,+ saa kwagh u i gbe u hanma or nana ya la tseegh ne er ye.
17 “‘Eren nen Iniongo i Beredi u I We Kwa sha Mi Ga la,+ gadia ka sha iyange ne je me due a ven akum akum* ken tar u Igipiti kera ye. Nahan yô, umbur nen iyange ne sha ikyov ikyov, i lu ne tindi gbem.
18 Hii ken uwer u hiihii ayange 14 aikighe je, ne yaan beredi u i we kwa sha mi ga la, zan zan ayange 21 ken uwer shon aikighe.+
19 Kwa u* de lun ken uya enev ga zan zan ayange ataankarahar, sha ci u hanma or u nan ye kwagh u i we kwa sha mi yô, nana̱ lu orvannya shin nana̱ lu or u hen tar la kpaa,+ imbaor la nana de kera lu uma ken nongo u Iserael ga.*+
20 Or a de ye kwagh môm u i we kwa sha mi ga. Ken uya enev cii, yaan nen beredi u i we kwa sha mi ga yô.’”
21 Fese je, Mose yila mbatamen mba Iserael cii+ kaa a ve ér: “Za za kôr nen agumauile* sha ci u icombor yen cii, sôngo nen nagh ku Paseka.
22 Maa tôô nen ikyagh i hisop,* wa nen shin awambe a a lu shin tasa la, dugh mishi nen sha kpandehunda u sha kua ikpande i ken ambusu a ihinda yen; or môm nana de duen sha hunda u iyou yen nana yemen ken won ga zan zan sev mbu kar aven.
23 Nahan zum u Yehova una va karen sha u van a ican sha Mbaigipiti man una nenge a awambe la sha kpandehunda u sha, kua sha ikpande i ken ambusu a ihinda yen yô, Yehova una aver hunda la, una de ér ican i kuugh la i* nyôr ken uya enev ga.+
24 “Eren nen iniongo ne, i hingir ne kwagh u eren nahan gbem, ne kua ônov enev.+
25 Nahan zum u ne za nyôr ken tar u Yehova a kaa ér una na ne la yô, eren nen kwagh ne nahan kpee je.+
26 Zum u ônov enev vea pine ne ér, ‘Inja i kwagh u ne eren ne ka nyi?’ yô,+
27 kaa nen a ve ner, ‘Ka nagh ku Paseka u Yehova, un u yange aver uya mba Mbaiserael ken Igipiti, shighe u va a ican sha Mbaigipiti kpa gema tsegha uya asev la.’”
Maa ior gure kuma ishiv inya.
28 Tsô Mbaiserael yem za er vough er Yehova kaa Mose man Aron nahan.+ Ve er nahan vough.
29 Ka va kom atôutu yô, Yehova wua hanma waniunda u ken tar u Igipiti cii,+ hii sha waniunda u Farou u tema sha ikyônough nagh ki torough la, zan zan za due sha waniunda u or u i wuhe nan ken purusu yô,* man hanma waniunda u zendenya kpaa.+
30 Farou mough hen tugh mbura un vea mbatomov nav cii, kua Mbaigipiti mbagenev cii, nahan Mbaigipiti ger mliam ding, sha ci u ya u or kpe her ga yô lu ga.+
31 Fese je a yila Mose man Aron+ hen tugh mbura, a kaa a ve ér: “Mough nen, due nen hen ior av kera, ne man Mbaiserael mbagenev mbara cii. Yem za civir nen Yehova er yange ne ôr nahan.+
32 Yem nen a ilev yenev man uzendenya enev kpaa, er yange ne kaa nahan.+ Kpa mo kpa verem nen doo doo.”
33 Tsô Mbaigipiti gba torough a ior mbara ér ve due ken tar la kera fese,+ ve kaa ér, “gayô se cii se va kpe!”+
34 Nahan ior tôô mwem vem ma hôron ma i lu a wa kwa sha mi ga yô, kua mkam vem ma hôron a mi, ve kange ken akondo, ve penda sha akende.
35 Mbaiserael er kwagh u Mose kaa ér ve er la, ve sôn Mbaigipiti akaa a sha azurufa man a sha zanaria kua akondo.+
36 Yehova na doo Mbaigipiti a ior mban, nahan ve na ve hanma kwagh u ve sôn cii, ve ngohol Mbaigipiti akaa cii.*+
37 Tsô Mbaiserael mough hen Ramese+ u yemen Sukoti,+ nomsombaiorov kuma 600,000. Ve lu yemen angahar, shi mbayev kpa lu vea ve.+
38 Shi ikpelaior igen*+ lu yemen vea ve, kua ilev man uzendenya, akumauile lu kpishi.
39 Tsô ve gba kaan beredi u vingir u i we kwa sha mi ga yô, sha mwem ma hôron ma ve due a mi ken Igipiti la. Yange i wa kwa sha mi ga sha ci u i zenda ve ken Igipiti ve mough kpoo je yô, ve fatyô u tôôn kwaghyan u vea yaan sha gbenda ga.+
40 Anyom a Mbaiserael tsa ken Igipiti yô+ lu 430.+
41 Ken mbee u anyom 430 la, sha iyange ne je, ior mba Yehova cii due ken tar u Igipiti kera akum akum.*
42 Tugh mbun ka tugh mbu vea umbur er Yehova due a ve ken tar u Igipiti kera yô. Gba u Mbaiserael cii vea umbur tugh mbun sha ci u icivir i Yehova sha ikyov ikyov.+
43 Maa Yehova kaa a Mose man Aron ér, “Ka tindi u sha kwagh u Paseka je ne: Or u van a va môm nana de ye un ga.+
44 Kpa aluer or ngu a kpan u nomso u nan yam sha inyar yô, tsôngo un nen.+ Ka hen zum la man una fatyô u yan ye.
45 Shiror shin or u i tee a tôô nan ijodo nana de ye un ga.
46 Ya un nen ken iyou i môm. De tôôn nen ci inyam i môm duen nen a mi ken won ga, shi de hemben nen kuhe na môm kpaa ga.+
47 Nongoior u Iserael cii u eren un.
48 Aluer ma shiror nan va tema her a ven man nan soo u yan Paseka u Yehova ne yô, i tsôngo hanma nomsoor hen ya u nan. Maa nana fatyô u va yan, shi nana hingir er ka marnya u tar la nahan. Kpa or u nan tsenge ga yô nana de ye un ga.+
49 Marnya man shiror u nan tem her atô wen cii vea kuran tindi môm.”+
50 Nahan Mbaiserael cii er kwagh u Yehova kaa Mose man Aron ne. Ve er nahan vough.
51 Sha iyange la je Yehova due a Mbaiserael kua akum a ve cii ken tar u Igipiti kera.
Ngeren mba shin kpe
^ Nenge Ngeren u Pasen Asember.
^ Shin “i wua imbaor la ken Iserael kera.”
^ Shin “mwem ma hôron ma i we kwa sha mi yô.”
^ Zwa Heberu, “me due a akum a en.”
^ Shin “Mwem ma hôron ma i we kwa sha mi ma.”
^ Shin “i wua imbaor la ken nongo u Iserael kera.”
^ Ka agumaiyôngo gayô ivo je la.
^ Nenge Ngeren u Pasen Asember.
^ Zwa Heberu, “una de ér mtim la a.”
^ Zwa Heberu, “u nan lu ken iyou i shin ihungwa yô.”
^ Zwa Heberu, “ve ya Mbaigipiti ishar.”
^ Ka mbagen mba ve lu mbaiserael ga je la, Mbaigipiti kpa lu ker.
^ Zwa Heberu, “sha akum a ve.”
