Ekesodu 33:1-23
33 Yehova shi kaa a Mose ér: “Mough heen, we vea ior mba yange u hemen ve u due a ve ken tar u Igipiti la. Yem nen ken tar u yange m bum a Aberaham man Isaka man Yakob mer me na ônov vev* la.+
2 Me tindi ortyom una zaan we sha hemen,+ una zenda Mbakaanan man Mbaamor man Mbahiti man Mbaperishi man Mbahivi kua Mbayebushi sha ishigh you kera.+
3 Yem ken tar u u mgbough a atumba man iyough yô.+ Kpa me zaan hen atô wen ga, gadia ne mba ior mba taver ityough,*+ nahan alaghga me va za tim ne sha gbenda.”+
4 Zum u ior ungwa mkaanem ma vihin man yô, ve gba zungwen, or ve môm kera haa ikyav mbi hweev iyol ga.
5 Yehova kaa a Mose ér: “Kaa Mbaiserael wer, ‘Ne mba ior mba taver ityough.*+ Mea soo ga yô, ma m kar her atô wen ma m tim ne puru.+ Nahan de kera haan nen ikyav mbi hweev iyol ga, me nenge kwagh u me er a ven yô.’”
6 Nahan hii hen uwo u Horebi je, Mbaiserael de u haan ikyav mbi hweev iyol.*
7 Tsô Mose tôô tenti na za tim ken won afoogh, ica a afo, a yila un ér tenti u kohol ker. Hanma or nana soo u pinen Yehova kwagh yô,+ nan due nan za ken tenti u kohol ker u lu ken akôngoafoogh la.
8 Mose una duen u zan ken tenti la nahan maa, ior cii ve mough ve tile sha hen ihinda i utenti vev, ve haa ashe sha Mose zan zan a kar za nyôron ken tenti la.
9 Mose una za nyôron a nyôr ken tenti la nahan maa, ibyeenegh ki lun er ityôgh nahan la+ ki sen ki va tile sha hunda u tenti la, maa Aôndo a gba ôron kwagh a Mose.+
10 Ior cii vea nengen ibyeenegh ki lun er ityôgh nahan la kia tilen hen hunda u tenti la yô, hanmô ve nan mough nan ngurum hen hunda u tenti u nan.
11 Yehova a lam a Mose ishigh a ishigh+ er or ka nan lam a orgen nahan. Una hiden ken afo yô, Yoshua+ wan u Nun, u shiren un shi wasen un la,+ a lu hen tenti la her, a kar kera ga.
12 Tsô Mose kaa a Yehova ér: “Nenge, u ngu kaan a mo wer, ‘Hemen ior mban yem a ve.’ Kpa u kera ôrom or u u lu tindin wer nana za vea mo ga. Bee kera yô, u kaa wer, ‘M fa u sha iti,* shi doom a we kpaa.’
13 Yô m zamber, aluer doo u a mo yô, ma u shi tesem igbenda you,+ sha er me fa u shi a za hemen u doon we a mo yô. Shi umbur kpaa wer, ikyurior ne ka ior ou.”+
14 Tsô a kaa ér: “Mo iyol yam me* za a we imôngo,+ shi me na u mmem kpaa.”+
15 Mose gema kaa a na ér: “Aluer we iyol you u ngu* zan a vese ga yô, de moughon a vese heen kera ga.
16 A er nan ve a fa ér doo u a mo, mo kua ior ou ciili? Ka sha u we zan a vese imôngo,+ sha er mo kua ior ou se due kposo a ior mbagen sha tar cii la gaa?”+
17 Tsô Yehova kaa a Mose ér: “Me er kwagh u u sen ne kpaa, sha ci u doom a we, shi m fa u sha iti.”
18 Maa a kaa ér: “Wea lumun yô tesem iengem you.”
19 Kpa a kaa ér: “Me er mdoom am cii ma a kar sha ishigh you, shi me yôô iti i Yehova sha ishigh you;+ ka or u i lum ape tesen nan erdoo la me tese nan erdoo ye, shi ka or u i lum ape zungwen nan mhôônom la me zungwe nan mhôônom ye.”+
20 Kpa shi a kaa ér: “U fatyô u nengen a ishigh yagh ga, sha ci u or môm nana fatyô u nengen a mo shi lun uma ga.”
21 Yehova shi kaa ér: “Ijiir ingin heen ikyua a mo ne. Tile sha vande ne.
22 Iengem yam ia nguren karen yô, me yer u ken kwe vandegh, me gema uwegh agh me cir u zan zan me kar karen.
23 Me karen yô, me tôô uwegh agh kera, u nenge a ijime yam. Kpa ishigh yagh yô, u nenge a mi ga.”+
