Ekesodu 40:1-38
40 Tsô Yehova kaa a Mose ér:
2 “Sha iyange i hiihii i uwer u hiihii la, tim tabernakel, tenti u kohol ker la.+
3 Ver areki u Shiada la ker,+ maa ta ikyondo i yisan i yisa Areki la.+
4 Nyôr a tebul la,+ ver ikyav mbi sha mi vough vough, shi nyôr a daarimenger la,+ tsar amenger a na.+
5 Maa ver atse a zanaria a nanden insensi la+ sha ishigh ki areki u Shiada la, shi ta ikyondo i sha hunda u tabernakel la.+
6 “Ver atse a nanden nagh la+ hen ishigh ki hunda u nyôron ken tabernakel, tenti u kohol ker la,
7 shi ver gbangi la hen atô u tenti u kohol ker man atse a nanden nagh la, haa mngerem shimi.+
8 Maa kase tembe la+ ningir tser, shi ta ikyondo i sha hunda+ u ikyasen i tembe la.
9 Maa tôô mkurem ma tseghan kwagh a mi la+ shighe tabernakel la kua akaa a a lu ker cii,+ tsegha un kua ikyav nav cii, sha er una hingir icighankwagh yô.
10 Shighe atse a nanden nagh la mkurem kua ikyav mbi a cii, tsegha atse la sha er aa hingir icighankwagh tsung yô.+
11 Shi shighe gbangi la kua kwagh u pendan un sha mi la mkurem, tsegha un.
12 “Maa va a Aron kua ônov nav ikyua a hunda u tenti u kohol ker la, va ôô ve iyol sha mnger.+
13 Hua Aron uicighanmbaakondov mbara,+ shighe un mkurem, tsegha un,+ nahan una eren mo tom u pristi.
14 U been yô, kporom a ônov nav ikyua, hua ve akondo a elemeen.+
15 Tsegha ve er u tsegha ter ve nahan,+ sha er vea erem tom u pristi yô, mtsegh ve la una za hemen u lun sha a ve sha ikyov ikyov, vea lu upristi.”+
16 Mose er hanma kwagh u Yehova kaa un cii.+ A er nahan vough.
17 Tsô ken uwer u hiihii iyange i môm, ken inyom i sha uhar la, i tim tabernakel la.+
18 Zum u Mose lu timin tabernakel la, a ver agbur a lun a aan la+ hen inya, maa a tôô mtôm ma lun ipye mara+ a wa, a tela itilan na la+ shi a tim mtôm nam.
19 A samber tenti la+ sha tabernakel la, shi a gema kwagh u cirin+ tenti la a cir sha mi, vough er Yehova kaa Mose nahan.
20 Tsô a tôô Shiada la+ a wa shin Areki la,+ shi a shindi igbough mbira+ sha areki la, shi a tôô kuur la+ a cir sha Areki.+
21 Maa a nyôr a Areki la ken tabernakel, a ta ikyondo i yisan la+ i yisa areki u shiada la,+ vough er Yehova kaa Mose nahan.
22 Maa a ver tebul la+ ken tenti u kohol ker la, vegher u ken imbusutarimese i tabernakel, ken won u ikyondo i yisan la,
23 a ver beredi la sha mi sha inja sha inja+ sha ishigh ki Yehova, vough er Yehova kaa Mose nahan.
24 A ver daarimenger la+ ken tenti u kohol ker, hen ishigh ki tebul la, ken vegher u imbusutariyan i tabernakel la.
25 A tsar amenger la+ sha ishigh ki Yehova, vough er Yehova kaa Mose nahan.
26 Maa a ver atse a sha zanaria la+ ken tenti u kohol ker, hen ishigh ki ikyondo i yisan la,
27 sha er a nanden insensi u human doon+ sha mi yô,+ vough er Yehova kaa Mose nahan.
28 Been yô, a ta ikyondo+ i sha hunda u tabernakel la.
29 A ver atse a nanden nagh+ hen hunda u tabernakel, tenti u kohol ker la, sha er una na nagh ku nanden+ kua nagh ku sha samuyia sha mi yô, vough er Yehova kaa Mose nahan.
30 Maa a ver gbangi la hen atô u tenti u kohol ker man atse a nanden nagh la, a haa mngerem ma ôôn ave man angahar shimi.+
31 Mose man Aron kua ônov nav ve ôô ave man angahar her.
32 Shighe u vea nyôron ken tenti u kohol ker shin vea mgbôghom a atse la cii yô, ve ôô ave man angahar,+ vough er Yehova kaa Mose nahan.
33 U masen yô, a kase tembe+ u tabernakel kua atse la a ningir a tser, shi a ta ikyondo i sha hunda u nyôron ken tembe la.+
Tsô Mose bee tom la.
34 Maa ibyeenegh kira gba cirin tenti u kohol ker la, tsô iengem i Yehova iv ken tabernakel la.+
35 Mose fatyô u nyôron ken tenti u kohol ker la ga, sha ci u ibyeenegh kira lu sha mi her, shi iengem i Yehova iv ken tabernakel la.+
36 Ibyeenegh kira kia moughon sha tabernakel sha yô, Mbaiserael kpa ve mough, ve lu eren nahan sha ashighe a ve lu haan afo yemen la cii.+
37 Kpa ibyeenegh kira kia mough ga yô, ve kpa ve mough ga zan zan saa iyange i kia mough la.+
38 Gadia ibyeenegh ki Yehova ki lu sha tabernakel la atetan, tugh a ilen yô i lu usu, sha ashe a ya u Iserael ken zende ve cii.+
