Ekesodu 20:1-26
20 Tsô Aôndo ôr akaa ne cii, a kaa ér:+
2 “Mo m ngu Yehova Aôndo wou, ka mo yange m due a we ken tar u Igipiti, hen ya u kpan kera ye.+
3 De lu a mbaaôndo mbagenev ga, saa mo.*+
4 “De gbe eev ga, shi de eren ma kwagh u a bee* kwagh u sha aôndo shin u shin tar shin u shin mngerem ma shin atô u inyaagh kpaa ga.+
5 De guren ve inya ga, shi or a de meen we ér we u civir ve kpaa ga,+ sha ci u mo Yehova Aôndo wou, m ngu Aôndo u m soo mer i civir mo tseegh yô,+ ka m tsaha mbayev sha ci u aferakaa a uter vev, zan zan kov u sha utar kua kov u sha unyiin kpaa, u mba ve kerem ihyom yô,
6 kpa mba m doo ve ishima shi ve kuran atindi a am la yô, m tesen ve dooshima, zan zan kov u sha dubu kpaa.+
7 “De teren iti i Yehova Aôndo wou sha gbenda u dang ga,+ gadia Yehova una tsaha or u nan teren iti na sha gbenda u dang la kpee je.+
8 “Umbur Iyange i Memen la sha er u tsegha i yô.+
9 Er ityom you cii ken ayange ataratar,+
10 kpa iyange i sha utaankaruhar la yô, ka Iyange i Memen i Yehova Aôndo wou. De eren ma tom sha i ga, we shin wan wou u nomso shin wan wou u kwase shin kpan wou u nomso shin kpan wou u kwase shin zendenya wou shin shiror u nan va tem hen ijiir you* la kpaa ga.+
11 Gadia Yehova yange gba sha man tar man zegemnger kua akaa a a lu shin ve cii, ken ayange ataratar, sha iyange i sha utaankaruhar la yô, a gba memen.+ Ka nahan ve Yehova ver Iyange i Memen la doo doo, shi tsegha i kpaa ye.
12 “Naan teru man ngôu icivir,+ sha er u tsa ken tar u Yehova Aôndo wou a lu nan we la gbem yô.+
13 “De woo or ga.+
14 “De eren idya ga.+
15 “De iin ga.+
16 “De eren shiada u aiegh sha iyol i orgen ga.+
17 “De tômon ya u orgen ga. Shi de tômon kwase u orgen ga,+ a lu kpan u nan u nomso shin kpan u nan u kwase shin bua u nan shin jaki i nan kpaa; nyityôkwagh i i lu i orgen cii de tômon ga.”+
18 Hen shighe ne ior cii lu ungwan idyuran shi nengen a inyiar la, shi ungwan imo i korough kura, shi nengen er uwo la lu duen mnyim yô; mba nengen kwagh ne yô, ve gba gbidyen akarkase iyol, shi ve tile ken ica.+
19 Nahan ve kaa a Mose ér: “We lam a vese kpa se ungwa, de den wer Aôndo a lam a vese ga, sha ci u se mba cian ser se va kpe.”+
20 Nahan Mose kaa a ior ér: “De cie nen ga, sha ci u Aôndo u mimi la va ka u va karen ne a kar,+ sha er ne za hemen u cian un, nahan ne er isholibo ga yô.”+
21 Nahan ior tile ken ica her, kpa Mose kporom za hen ibyeenegh ki iligh ape Aôndo u mimi lu la.+
22 Yehova maa kaa a Mose ér: “Za kaa Mbaiserael wer, ‘Ne ayol a en ne nenge er m lam a ven sha yô.+
23 De eren nen mbaaôndo mba sha azurufa seer nen sha a mo ga, shi de eren nen mbaaôndo mba sha zanaria sha ci wen kpaa ga.+
24 Maam nen atse a inyaagh sha er ne naan iniav yenev mbi nanden man iniav yenev mbi bem man uzendenya enev kua ilev yenev sha mi yô. Me va her a ven, hen hanma ijiir i m ne mer i umbur iti yam her cii,+ me va ver ne doo doo.
25 Kpa aluer ka atse a sha awen ne lu tan mo yô, de te nen a sha awen a i kua sha ikyagh ki tomough ga.+ Gadia aluer ne za ikyagh ki tomough sha awen la yô, ne hôngor a.
26 Shi de gberen nen angahar a unden sha atse a am ga, sha er idyelegh wen una bugh sha a ga yô.’
