Ekesodu 22:1-31
22 “Aluer or za ii bua shin iyôngo, man nan va sôngo shin nan tee yô, nana kimbi ibua itian sha bua la, iyôngo inyiin sha iyôngo la.+
2 (“Aluer i kôr ormbaiv+ iin ave man i gbidye nan je nan kpe yô, iboawambe ngi sha kwagh u nan ga.
3 Kpa aluer kwagh ne er ka sha shighe u sev mbu av kera yô, iboawambe ngi sha kwagh u nan.)
“Nana kimbi kpee je. Aluer nan ngu a kwagh ga yô, i tee nan sha akaa a nan ii la.
4 Aluer i za kohol nan a kwagh u nan ii la uma her yô, a lu bua shin jaki shin iyôngo kpa nana kimbi kwa har.
5 “Aluer or due a ilev mbi nan mbi yan kwagh ken akôngo a nan shin ken sule u wain u nan, man nan de mbi za ya orgen kwagh ken sule yô, nana kimbi sha sule u nan u hemban doon shin sha sule u wain u nan u hemban doon la.
6 “Aluer usu gba man u samber sha usaa zan zan u za hia aile a uiyia shin iyiav mbi i lu a sunda ga shin sule cii yô, or u nan nande usu la nana kimbi kwagh u a hie la kpee je.
7 “Aluer or na huror u nan inyaregh shin akaa a eren hwe a mi ér nana koso nan, man i va ii a hen ya u huror u nan la, man i kôr ormbaiv la yô, nana kimbi kwa har.+
8 Kpa aluer i kôr ormbaiv la ga yô, i va a orya la sha ishigh ki Aôndo u mimi,+ sha er a tôv tsembelee a fa, aluer nan za uwegh sha akaa a huror u nan la yô.
9 Hanma shighe u anyiman a gbe sha kwagh u i lu kpelan cii, aluer ka bua shin jaki shin iyôngo shin ikyondo shin nyityôkwagh i i saa i orgen nan kaa ér, ‘Ka u wam!’ yô, iorov mba uhar mbara ve va a ikyaa la sha ishigh ki Aôndo u mimi.+ Nahan or u Aôndo a ne nan ibo la nana kimbi orgen la kwagh la kwa har.+
10 “Aluer or na orgen jaki shin bua shin iyôngo shin zendenya ugen ér nana lu a mi, man a va kpe shin a vihi iyol shin or va kôr yem a mi zum u or lu nengen ga yô,
11 nana va bum a or la sha ishigh ki Yehova ér nan za uwegh sha kwagh na ga; nahan or u kwagh kpa a lumun. Or la a de kera kimbin kwagh ga.+
12 Kpa aluer i va ii a ii ilegh kira hen a nan yô, nana kimbi or u i lu ki nan la.
13 Aluer inyamkyume ande a ande ki yô, nana va a vegher u a shi la nana va tese. Kwagh u inyamkyume i ande yô nana kimbi ga.
14 “Kpa aluer or va ngohol zendenya hen orgen ér nana za tsô nana hide a mi, man a za vihi iyol shin a kpe ken ijime i or u i lu u nan la yô, or u nan va ngohol la nana kimbi kpee.
15 Kpa aluer or u zendenya la ngu her yô, nana kimbi ga. Aluer yange nan ngohol sha inyar yô, i za sha inyaregh kira.
16 “Aluer or mee iniuunkwase i or lu a tsôr ga nan yav a mi yô, nana kem i keng keng, i hingir kwase u nan.+
17 Kpa aluer ter u wankwase la venda shia shia u nan nan wan na yô, nana kimbi inyaregh i kuma sha ishe i i kemen kwase la.
18 “De den kwase u kpehen ishor wer nana lu uma ga.+
19 “Or u nan yav a zendenya cii, i wua nan kpee je.+
20 “Or u nan ne mbaaôndo mbagen iniav i lu Yehova tseegh ga cii, i wua nan.+
21 “De nzughul a shiror ga, shi de kighir nan kpaa ga,+ sha ci u ne kpa yange ne lu ushirmbaiorov ken tar u Igipiti.+
22 “De eren nen kwasecôghol ican ga, shi wan u lun a ter ga* kpaa de eren nen nan ican ga.+
23 Aluer u er nan ican man nan vaa a mo yô, me ungwa mliam ma nan keng je a bunde ga;+
24 nahan ishima ia vihim ker, me wua ne sha sanker, kasev enev vea hingir kasevmbacôgholov, shi ônov enev kpaa vea kera lu a ter ga.
25 “Aluer u na icanor* ken ior av, ka or u hen ijiir you je la, injô i inyar yô, de hingir hen nan er ka or u nan ior inyaregh keren mtsera* nahan ga. De we nan mtsera sha ki ga.+
26 “Aluer u ngohol or ikyondo sha ityumbu yô,*+ hide nan a mi cii ve iyange ia mire ye.
27 Gadia ka cii kwagh u nan u cirin je la, ka ikyondo i nan i cirin iyol;* nahan ka nyi nana yav a cirii?+ Zum u nana vaa a mo yô, me ungwa nan kpee je, sha ci u m zungwen mhôônom.*+
28 “De tuhwan Aôndo* ga,+ shi de tuhwan orvesen* u ior ou kpaa ga.+
29 “De tangen u nan iniav sha iyiav you mbi mbi ngee, kua wain man mkurem ou ma ma ngee kpishi* la ga.+ Naan mo ônov ou mba iundav mba nomso.+
30 Ka kwagh u u eren a bua wou man iyôngo you je ne:+ Vea luun vea ngô ve ayange ataankarahar. Sha iyange i sha anigheni la yô u va nam.+
31 “Lum nen uicighanmbaiorov,+ de ye nen kwagh u inyamkyume i wua un ken toho ga.+ Gema un kende nen iwa.
Ngeren mba shin kpe
^ Shin “ancôghol.”
^ Shin “or u keren liba.”
^ Shin “or u kwagh a tser nan.”
^ Shin “sha injô i nan lu u a mi yô.”
^ Zwa Heberu, “kwavyolough u nan.”
^ Shin “m ngu inja kundu kundu.”
^ Shin “lamen sha Aôndo dang.”
^ Shin “orhemen.”
^ Shin “ma u zough a mi kpishi shin ahungwa ou a shoghor wain man mkurem.”
