Ekesodu 28:1-43
28 “Tsua anngôu Aron kua ônov nav ken Mbaiserael, sha er vea eren mo tom u pristi yô+—Aron+ vea Nadabi man Abihu+ man Eleasar man Itamar,+ ônov mba Aron.+
2 Kor uicighanmbaakondov mba icivirigh man mba doonashe+ sha ci u anngôu Aron.
3 Lam a mba ve fe tomaveegh tsembelee,* mba m iv ve a jijingi u kwaghfan la cii,+ nahan vea kor akondo a Aron la, sha er a tsegha un una erem tom u pristi yô.
4 “Ka akondo a vea kor je ne: ikpa i sha vanger+ kua efodi+ man riga u lun a ave ga+ man ikyondo i karen ihiange* man tsar u kangen sha ityo*+ kua ikyondo i kangen shin iwenge;+ vea kor uicighanmbaakondov mban sha ci u anngôu Aron man ônov nav, sha er una erem tom u pristi yô.
5 Ior mba fan tom mban ve tôô zanaria man mou u buluu-buluu* man mou u nyian dindee kua mou u nyian bong man ikyondo i i er sha mou u dedoo yô, ve er akaa ne a mi.
6 “Ve er efodi la sha zanaria man mou u buluu-buluu* man mou u nyian dindee man mou u nyian bong kua ikyondo i i tume sha mou u dedoo yô, i tume a tume.+
7 A lu a abamber ahar sha akende, a a zua vegher u ken ishi man u ken ijime sha akur a na a ahar a sha akende la yô.
8 Kwange u tumen*+ u u lu sha efodi, sha er a kangen un nyôôsôô una tilen la kpaa, i er u sha akaa ne: zanaria man mou u buluu-buluu* man mou u nyian dindee man mou u nyian bong kua ikyondo i i tume sha mou u dedoo yô.
9 “Tôô awen a oniki ahar,+ gber ati a ônov mba Iserael sha mi,+
10 ati ataratar sha iwen i môm, ati ataratar a a shi la di sha iwen igen la, sha adondo adondo er yange i mar ve nahan.
11 Or u gberen akaa sha awen la nana gber ati a ônov mba Iserael sha awen a ahar la, er ka nan gber ikyav sha kwagh nahan.+ Maa gema a wa shin ikwembe i sha zanaria.
12 Var awen a ahar la sha abamber a sha akende a efodi la, a lu awen a umbur sha ci u ônov mba Iserael.*+ Aron a tôôn ati a ve la sha abamber a ahar a a lu sha akende a na la, a zaan a mi sha ishigh ki Yehova, i lu kwagh u umbur.
13 Er ikwembe i sha zanaria
14 shi tume mshirim mhar sha zanaria u wang er ka i tume kor nahan.+ Zer mshirim ma i tume mara sha ikwembe la.+
15 “Kaa or u tumen akondo nana er ikpa i sha vanger i kuren ikyaa a mi.+ I̱ er i er ka efodi la nahan, i er sha zanaria man mou u buluu-buluu* man mou u nyian dindee man mou u nyian bong kua ikyondo i i tume sha mou u dedoo yô.+
16 Zum u a gbire i yô, i lu a azongo anyiin, ilihen man igbanger i i, i lu er ka ikyevwe nahan.*
17 Var awen sha mi iniongo inyiin, nongo u hiihii la i lu rubi man topashi man emeradi.
18 Nongo u sha uhar la i lu torkoise man safir kua yasepa.
19 Nongo u sha utar la i lu iwen i leshem man agati kua ametese.
20 Nongo u sha unyiin la i lu krisolati man oniki kua yade. A var a cii shin ikwembe i sha zanaria.
21 Awen la a zua sha ati a ônov mba Iserael mba 12 mbara. I̱ gber iti sha hanma iwen er ka i gber ikyav sha kwagh nahan, hanma iti i tile sha ityough ki ipyaven i môm ken uipyaven mba 12 mbara.
22 “Tume ishiligh sha zanaria u wang sha ikpa i sha vanger la, er ka i tume kor nahan.+
23 Er ahye a sha zanaria ahar, sha ci u ikpa i sha vanger la, wa ahye a ahar la sha azongo a ahar a ikpa i sha vanger la.
24 Gema ikyor i ihiar i sha zanaria la wa ken ahye a ahar a a lu sha azongo a ikpa i sha vanger la.
25 Gema ijô ihiar i ikyor i ihiar la wa ken ikwembe i ihiar la, maa zer i sha abamber a sha akende a ahar a efodi la ken ishi.
26 Er ahye ahar sha zanaria, wa a sha vegher u ken atô u azongo a ahar a ikpa i sha vanger, a a ne ishigh ken efodi la.+
27 Shi er ahye ahar agen sha zanaria ken ishigh ki efodi la, shin inya u abamber a sha akende, ikyua a ape i zua la, a lu kwange u tumen* u efodi la sha aôndo.+
28 Ta kor u buluu-buluu* sha ahye a sha ikpa i sha vanger la, va zer sha ahye a sha efodi la, u kôr i ijiir i môm. Kwagh ne una na ikpa i sha vanger la ia tema ijiir i môm sha efodi, ia lu kwange u tumen* la sha aôndo.
29 “Aron a tôôn ati a ônov mba Iserael sha ikpa i sha vanger i kuren ikyaa a mi la sha vanger na,* zum u a lu nyôron ken Icighankpar la yô, i lu kwagh u umbur sha ishigh ki Yehova hanma shighe cii.
30 Gema Urim man Tumim*+ wa ken ikpa i sha vanger i kuren ikyaa la, ve luun Aron sha vanger* zum u a lu nyôron van sha ishigh ki Yehova yô. Aron a tôôn kwagh u ôron ijir u Mbaiserael ne sha vanger na, sha ishigh ki Yehova hanma shighe cii.
31 “Kor riga u efodi u lun a ave ga la cii sha mou u buluu-buluu.*+
32 A lu a mon* hen atôatô. Or u tumen akondo nana tume mon la i ningir i tser. U lu er ka mon u rigautya u iyôôgh nahan, sha er ua ande ga yô.
33 Er anzôr shin akur a riga la er ka pomegraneti nahan ningir tser, sha mou u buluu-buluu* man mou u nyian dindee man mou u nyian bong, shi er amem a sha zanaria hen atô u anzôr la.
34 Zeren amem a sha zanaria la musan vea pomegraneti la, imemegh ki sha zanaria ki lu maa pomegraneti a lu, zan zan i ningir akur a riga u lun a ave ga la i tser.
35 Aron a huan i sha er una eren tom yô, nahan amem la a tsongor zum u a lu nyôron ken icighanjiir sha ishigh ki Yehova shi duen yô, sha er una kpe ga yô.+
36 “Er ankpande u engem sha zanaria u wang, nger kwagh sha mi er ka i gber ikyav sha kwagh nahan, wer: ‘Yehova ngu icighan.’+
37 Gema un kange sha tsar u kangen sha ityo la,+ sha mou u buluu-buluu;* a luun hen ishigh ki tsar u kangen sha ityo la hanma shighe.
38 A luun Aron sha icul, nahan zum u or nan er isholibo sha uicighanmbaakaav+ mba Mbaiserael ve tsegh ve ér ka icighanyua la yô, ibo la ia lu sha ityough ki Aron, una luun Aron sha icul hanma shighe cii, sha er Yehova una lumun ve yô.
39 “Tume ikyondo i karen ihiange* sha mou u dedoo, shi er tsar u kangen sha ityo* sha mou u dedoo, tume ikyondo i kangen shin iwenge kpaa.+
40 “Kor ônov mba Aron akondo, kua atsar a zeren shin iwenge man akondo a kangen sha ityo,+ a lu a icivirigh shi a doo ashe.+
41 Hua anngôu Aron kua ônov nav akondo la, shighe ve mkurem,+ ver ve sha tom,*+ shi tsegha ve, ve eren mo tom u pristi.
42 Kor ve atôôn a wondo* sha mou u dedoo, sha er vea cirin idyelegh ve yô.+ A mough sha iwenge a gba hen anam.
43 Aron vea ônov nav ve huan a, zum u ve lu nyôron ken tenti u kohol ker, shin ve lu zan hen atse a nanden nagh sha u za eren tom hen icighanjiir la yô, sha er vea kpela ibo vea kpe ga yô. I lu tindi hen a na man ônov nav* gbem.
Ngeren mba shin kpe
^ Zwa Heberu, “mba ve lu a kwaghfan ken ishima.”
^ Yange i tume ikyondo ne i lu a ihiange i senen a sen man i telan a tela kpaa.
^ Shin “adikpo.” Yange i kange tsar ne sha ityo a lu er ka idyer nahan.
^ Shin “mou u kwer.”
^ Shin “mou u kwer.”
^ Shin “tsar u shin iwenge.”
^ Shin “mou u kwer.”
^ Shin “awen a umbur ônov mba Iserael a mi.”
^ Shin “mou u kwer.”
^ Ka igbanger i mough hen ihôwe i tamen va hen ihôwe i kiriki la, zum u i san uwegh yô. Kuma usentimita 22.2 (uinci 8.75). Nenge Ngeren u Seer u B14 la.
^ Shin “tsar u shin iwenge.”
^ Shin “kor u kwer.”
^ Shin “tsar u shin iwenge.”
^ Zwa Heberu, “sha ishima na.”
^ Nenge Ngeren u Pasen Asember.
^ Zwa Heberu, “sha ishima.”
^ Shin “mou u kwer.”
^ Shin “ian i wan ityough.”
^ Shin “mou u kwer.”
^ Shin “mou u kwer.”
^ Yange i tume ikyondo ne i lu a ihiange i senen a sen man i telan a tela kpaa.
^ Shin “adikpo.” Yange i kange tsar ne sha ityo a lu er ka idyer nahan.
^ Zwa Heberu, “iv ave a ve.”
^ Shin “akondo a huan ken atô.”
^ Zwa Heberu, “vor na.”
