Ekesodu 38:1-31
38 A er atse a nanden nagh sha kon u akashia.* A lu a azongo anyiin,* ilihen i a lu aseva ataan,* igbanger i a kpa lu aseva ataan, ityaven i a lu aseva atar.+
2 Maa a er akor a a sha azongo a anyiin la. Akor la lu kwaghmôm a a, ijoron lu ga. Maa a cir atse la togula iyol.+
3 Been yô, a er ikyav mbi atse la cii, lu ubokoti man ushebul man atasa man ufôôku man agbande a usu. A er ikyav mbi a cii sha togula.
4 Shi a er kper u atse la, a er un sha togula,* a wa un poso kurugh nagh wa senen hen atô u a.
5 A er ahye anyiin sha azongo anyiin ikyua a kper u sha togula la, sha er a shindi igbough mbira ker yô.
6 Been yô, a gba igbough sha kon u akashia, a cir mbi togula iyol.
7 A wa igbough mbira ken ahye a a lu ken ambusu a atse la, sha er a tôôn a a mi yô. A er atse la lu er ka ikpande i i mande i, ho u lu hen atô nahan.
8 A er gbangi u sha togula,+ shi a er kwagh u veren un sha mi u sha togula; a er akaa ne sha ujingi* mba kasev mba i ver ve ér ve eren tom hen hunda u tenti u kohol ker la.
9 Tsô a er tembe la.+ A er akondo a kasen a ken vegher u imbusutariyan u a ne ishigh ken imbusutariyan la sha mou u dedoo u i tume a tume yô, lihe kuma aseva 100.+
10 Mtôm lu 20 man agbur 20 a sha togula a lun a aan sha mi, uiwever mba mtôm mara kua uishindan vev* cii i er sha azurufa.
11 Shi ken vegher u imbusutarimese la kpaa, a er akondo a kasen la lihe kuma aseva 100. A er mtôm ma a 20 kua agbur a ma 20 a sha togula a lun a aan sha mi, uiwever mba mtôm mara kua uishindan vev* cii lu mba sha azurufa.
12 Kpa vegher u shin ityôtar la yô, akondo a kasen la lu aseva 50. Mtôm lu pue kua agbur pue a lun a aan sha mi, shi uiwever mba mtôm mara kua uishindan vev* lu mba sha azurufa.
13 Igbanger i sha ityoughkitaregh vegher u iyangeduen la, lu aseva 50.
14 Sha hunda u nyôron la, akondo a kasen a ken vegher u môm kuma aseva 15, a mtôm mtar kua agbur atar a lun a aan sha mi.
15 Ken vegher ugen u sha hunda u nyôron ken ikyasen i tembe la kpaa, akondo a kasen la lu aseva 15, a mtôm mtar kua agbur atar a lun a aan sha mi.
16 Akondo a i kase tembe la a mi i ningir i tser la cii, i er a sha ikyondo i dedoo i i tume a tume yô.
17 I er agbur a lun a aan sha mi sha ci u mtôm mara sha togula, uiwever mba mtôm mara kua uishindan vev* lu sha azurufa, i cir azurufa sha mtom ma mtôm mara, i er uishindan mba mtôm ma i kase tembe la a mi la cii sha azurufa.+
18 I tume ikyondo i yisan i sha hunda u nyôron ken tembe la sha mou u buluu-buluu* man mou u nyian dindee man mou u nyian bong kua ikyondo i i tum sha mou u dedoo yô. Ilihen i i̱ lu aseva 20, ityaven i i̱ lu aseva 5. I̱ lu ityaven kwaghmôm a akondo a i kase tembe la a mi la.+
19 Mtôm ma i̱ ma mnyiin mara kua agbur a ma anyiin a lun a aan la cii, i er sha togula. I er uiwever kua uishindan vev* sha azurufa, shi i cir azurufa sha mtom ma ma.
20 Amande a tenti u tabernakel la man amande a ikyasen i tembe la cii, i er sha togula.+
21 Ka iyenge i akaa a i er tabernakel a mi je ne, tabernakel u Shiada la,+ lu iyenge i Mose na zwa ér i ôr yô; Mbalevi+ ôr iyenge ne sha hemen u Itamar+ wan u pristi Aron.
22 Besalel+ wan u Uri wan u Hur u ken ipyaven u Yuda er hanma kwagh u Yehova kaa a Mose ér i er cii.
23 Oholiabi+ wan u Ahisamaki u ken ipyaven u Dan, lu vea na. Un lu orvareniwa man or u eren hwe sha akaa man or u tumen akondo sha mou u buluu-buluu* man mou u nyian dindee man mou u nyian bong man sha ikyondo i dedoo.
24 Zanaria u i er tom u hen icighanjiir la a mi la cii, kohol kuma sha ingyegh ki zanaria u nagh ku cian la,+ lu utalenti* 29 man ushekel* 730 sha shekel u hen icighanjiir la.*
25 Shi azurufa u mba i nger ve ati ken nongoior la yô, lu utalenti 100 man ushekel 1,775 sha shekel u hen icighanjiir la.*
26 Vegher shekel u hanma or va a mi la lu vegher shekel u sha shekel u hen icighanjiir la,* sha ityough ki hanma nomsoor u i nger nan iti cii, hii mba ve lu anyom 20 yem hemen yô,+ kohol cii lu 603,550.+
27 I er agbur a lun a aan a hen icighanjiir la kua agbur a lun a aan a ikyondo i yisan la cii, kohol lu utalenti 100, agbur a lun a aan 100 lu utalenti 100, talenti môm sha igbur i môm i lun a ian.+
28 A er uiwever mba mtôm mara kuma ushekel 1,775, a cir mtom ma mtôm mara shi a zua ma kpaa.
29 Togula u i na nagh* a mi yô, lu utalenti 70, man ushekel 2,400.
30 A er agbur a lun a aan a sha hunda u tenti u kohol ker la a mi, kua atse a sha togula man kper u a u sha togula* la man ikyav mbi atse la cii,
31 man agbur a lun a aan a a kase tembe la, man agbur a lun a aan a sha hunda u nyôron ken ikyasen i tembe la, man amande a tenti a tabernakel kua amande a tenti+ a ikyasen i tembe la kpaa cii.
Ngeren mba shin kpe
^ Ishiva i môm yange i lihe i kuma usentimita 44.5 (uinci 17.5). Nenge Ngeren u Seer u B14 la.
^ Akashia ka kon u lun a asaa. Ngu kposo a kashia u ior ve fe un nyian ne.
^ Shin “ilihen i a man igbanger i a lu kwaghmôm.”
^ Shin “sha iyôgh ki togula.”
^ Ka ujingi mba iyôôgh mba i kôô ve tsembelee yô.
^ Shin “ahye a ve.” Ahye la lu sha u zuan kwagh a mi.
^ Shin “ahye a ve.” Ahye la lu sha u zuan kwagh a mi.
^ Shin “ahye a ve.” Ahye la lu sha u zuan kwagh a mi.
^ Shin “ahye a ve.” Ahye la lu sha u zuan kwagh a mi.
^ Shin “mou u kwer.”
^ Shin “ahye a ve.” Ahye la lu sha u zuan kwagh a mi.
^ Shin “mou u kwer.”
^ Shin “icighan shekel.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Talenti môm yange a yuhwa i kuma ukilogeram 34.2. Nenge Ngeren u Seer u B14 la.
^ Shin “icighan shekel.”
^ Shin “icighan shekel.”
^ Shin “nagh ku cian.”
^ Shin “u sha iyôgh ki togula.”
