Ekesodu 30:1-38
30 “Er atse a nanden insensi sha mi;+ er a sha kon u akashia.*+
2 A lu azongo anyiin,* ilihen i a i lu ishiva i môm,* igbanger i a i lu ishiva i môm, ityaven i a i gema i lu aseva ahar. Akor a a, a lu kwaghmôm a a, ijoron i de lu ga.+
3 Cir a zanaria u wang iyol: cir sha atô u a man ken ambusu a a man sha akor a a cii; er ato a na la sha zanaria ningir tser.
4 Er ahye a sha zanaria shin inya u gir la ken ambusu a atse la, ahar keen ahar keela, a wa igbough mbi tôôn a a mi la ken ahye la.
5 Gba igbough sha kon u akashia, cir mbi zanaria iyol.
6 Ver a hen ishigh ki ikyondo i yisan i i lu ikyua a areki u Shiada la,+ hen ishigh ki kuur u a lu sha Shiada ape me vaan hen a we la.+
7 “Aron+ una nanden insensi u human doon+ sha a,+ hanma shighe u a ze u za sôron amenger la pepe cii, a nande un sha atse la.+
8 Shi zum u Aron a ze u za tsaren amenger la aikighe kpaa, una nanden insensi la. Ka insensi u a nanden un gbem sha ishigh ki Yehova sha ikyov yen cii yô.
9 De nanden insensi ugen kposo sha a ga,+ shin nagh ku nanden shin nagh ku sha samuyia ga, shi de haan nagh ku kwaghman sha a kpaa ga.
10 Aron a naan iwom sha akor a a kwa môm ken inyom.+ Una naan iwom sha a kwa môm ken inyom, sha awambe a nagh ku isholibo ku nan iwom la,+ zan zan sha ikyov ikyov. Ka icighankwagh tsung sha ishigh ki Yehova.”
11 Maa Yehova shi kaa a Mose ér:
12 “Zum u u lu ôron iyengeior sha er u fa ingyegh ki ônov mba Iserael yô,+ hanma or nana na Yehova nagh ku paan uma u nan, sha shighe u ôron iyengeior la, sha er bouange una va sha ve zum u i nger ve ati la ga yô.
13 Ka kwagh u hanma or u i nger nan iti cii nana na je ne: vegher shekel* sha shekel u hen icighanjiir la.*+ Ugera ikyundu* ka shekel môm. Vegher shekel, ka iyua i a na Yehova je la.+
14 Hanma or u nan hii anyom 20 i yem hemen, u i nger nan iti cii, nana na iyua i Yehova.+
15 Ornyar nana de naan i hemban vegher shekel ga,* shi icanor kpa nana de naan i yinan vegher shekel la ga. I lu iyua i wamen Yehova sha ci u uuma enev.
16 Ngohol inyaregh ki nan iwom ki sha azurufa la hen Mbaiserael, gema na sha ci u tom u ken tenti u kohol ker la, sha er kia hingir kwagh u umbur sha ishigh ki Yehova sha ci u Mbaiserael yô, sha u nan iwom sha ci u uuma enev.”
17 Yehova shi ôr kwagh a Mose kaa ér:
18 “Er gbangi sha togula kua kwagh u veren un sha mi,+ maa ver un hen atô u tenti u kohol ker man atse a nanden nagh la, haa mngerem shimi.+
19 Aron man ônov nav vea ôôn ave man angahar her.+
20 Zum u ve lu nyôron ken tenti u kohol ker shin ve lu mgbôghom a atse a nanden nagh, sha u eren tom shin nanden Yehova nagh sha usu yô, vea ôô ave man angahar sha mnger sha er vea kpe ga yô.
21 Gba u vea ôôn ave man angahar sha er vea kpe ga yô. I hingir tindi hen Aron man ônov nav gbem, sha ikyov ikyov.”+
22 Yehova shi kaa a Mose ér:
23 “A been yô, tôô usenti mba hemban doon: akpoghor a mire uikyaren 500* man sinamon u human doon, uikyaren 250* man kalamu u human doon uikyaren 250
24 man kashia uikyaren 500, u i kar sha ikyaren i shekel i ken icighanjiir la yô,*+ kua mkurem ma olev ikyaren i hin i môm.*
25 Maa gema akaa ne er icighanmkure u tseghan kwagh a mi; i nungwa ma sha inja.*+ Ma lu icighanmkure u tseghan kwagh a mi.
26 “Tsegha tenti u kohol ker+ kua areki u Shiada la a ma,
27 kua tebul la man ikyav nav cii, man daarimenger la man ikyav nav cii, kua atse a nanden insensi la,
28 man atse a nanden nagh kua ikyav mbi a cii, kua gbangi la man kwagh u pendan un sha mi la.
29 Tsegha ve sha er vea hingir uicighanmbaakaav mimi je yô.+ Or u nan bende a ve cii i lu or u nan lu wang yô.+
30 U shighe Aron+ man ônov nav mkurem,+ u tsegha ve sha er vea erem tom u pristi yô.+
31 “Lam a Mbaiserael kaa a ve wer, ‘Mkurem man ma a za hemen u lun mo icighanmkure u tseghan kwagh a mi sha ikyov yen cii.+
32 I de shigh ma sha iyol i or ga, shi de nungwan nen kwagh ugen môm u lun er ma nahan kpaa ga. Ka icighankwagh. Ma a za hemen u lun icighankwagh her a ven.
33 Hanma or u nan er mkurem ma lun er ma, shin nan shigh orgen iyol, man i lu or u i ne ian ér i shighe nan ga* yô, i wua nan kpee je.’”*+
34 Maa Yehova shi kaa a Mose ér: “Kar akaa a human doon ne sha ikyaren i môm:+ mningem ma setaketi man onika man galbanu u human doon kua ferankinsensi u wang.
35 Er insensi a mi;+ i nungwa ilyôghonov mbira sha inja* i wa bar sha mi,+ i lu kwagh u wang, shi i lu icighankwagh.
36 Pande un kume a hingir mwem ma vian lueen, shi pande un ver hen ishigh ki Shiada, ken tenti u kohol ker, ape me vaan hen a we la. A lu ne icighankwagh tsung.
37 De eren nen insensi a ilyôghonov mbi u lu eren ne sha ci wen iyol yen ga.+ I lu ne icighankwagh u a lu sha ci u Yehova yô.
38 Or u nan er kwagh u a lu inja er un nahan, sha er nana ungwa ihyuma na i doon la yô, i wua nan kpee je.”*
Ngeren mba shin kpe
^ Akashia ka kon u lun a asaa. Ngu kposo a kashia u ior ve fe un nyian ne.
^ Shin “A lu ilihen man igbanger kwaghmôm.”
^ Ishiva i môm yange i kuma usentimita 44.5 (uinci 17.5). Nenge Ngeren u Seer u B14 la.
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “sha icighan shekel.”
^ Gera môm yange a yuhwa i kuma geram 0.57. Nenge Ngeren u Seer u B14 la.
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Ka ukilogeram 6 je la.
^ Ka ukilogeram 3 je la.
^ Shin “sha icighan shekel.”
^ Hin môm yange a kuma ulita 3.67. Nenge Ngeren u Seer u B14 la.
^ Shin “er or u fan mkurem ma nungwan ka nan nungwa nahan.”
^ Zwa Heberu, “or u ken inya,” inja na yô, ka or u nan lu ken tsombor u Aron ga je la.
^ Zwa Heberu, “i gber nan hen ior mba nan kera.”
^ Shin “er or u fan mkurem ma nungwan ka nan nungwa nahan.”
^ Zwa Heberu, “i gber nan hen ior mba nan kera.”
