Ekesodu 7:1-25
7 Yehova maa kaa a Mose ér: “Nenge, m er u u hingir er Aôndo nahan* hen Farou, Aron anngôu di una hingir profeti wou.+
2 Ôron Aron anmgbian wou hanma kwagh u m kaa u yô, Aron di una lamen a Farou, nahan una na Mbaiserael ian ér ve due ken tar na kera.
3 Mo me gema me de ishima i Farou ia cighir,+ nahan me er akaa a kpilighyol man uivande ken tar u Igipiti kpishi.+
4 Kpa Farou una lumun u keghen ato a ven ga, nahan me naregh uwegh agh sha Igipiti me tsaha un, me due a ikpelaior yam,* ka ior av Mbaiserael je la, ken tar u Igipiti kera.+
5 Nahan zum u me naregh uwegh agh sha Igipiti, me due a Mbaiserael ken atô u Mbaigipiti kera la, Mbaigipiti vea fa wang er mo m lu Yehova yô.”+
6 Mose man Aron er kwagh u Yehova kaa ve la; ve er nahan vough.
7 Mose lu anyom 80, Aron di lu anyom 83 shighe u ve za lam a Farou la.+
8 Tsô Yehova kaa a Mose man Aron ér:
9 “Aluer Farou kaa a ven ér, ‘Er nen ivande’ yô, kaa a Aron wer, ‘Gema gbough ough kura kende inya sha ishigh ki Farou.’ Nahan kua hingir zegeiyô.”+
10 Nahan Mose man Aron ve nyôr hen Farou, ve za er vough er Yehova kaa ve nahan. Aron gema gbough nagh kura kende inya sha ishigh ki Farou man mbatomov nav, maa ku hingir zegeiyô.
11 Nahan kpa, Farou yila mbafankwagh man mbaakombov, nahan mbaahiriv mba ken Igipiti mbara+ kpaa er kwagh la sha ahir a ve.+
12 Hanmô ve kende gbough ku nan hen inya, maa ku hingir zegeiyô; kpa gbough ku Aron kura gema mena igbough vev mbira.
13 Nahan cii kpa, ishima i Farou cighir her,+ a kegh ato a ve ga, vough er Yehova vande ôron nahan.
14 Maa Yehova kaa a Mose ér: “Ishima i Farou cighir her.*+ A venda u nan ior av ian ér ve yem.
15 Za hen Farou pepe. Nenge! Ngu zan shin kpemnger! Nahan za, za tile shin kpe u Ifi u Nil keghen un; tôô gbough ough ku yange ku gema ku hingir iyô la kôr ken uwe.+
16 Kaa a na wer, ‘Yehova, Aôndo u Mbaheberu, tindim hen a we,+ a kaa ér: “De ior av ve yem ve za civir mo ken taaikyôngo,” kpa u ungwa imo na ga zan zan hegen.
17 Nahan Yehova ngu kaan ér: “Ka sha kwagh ne man u fa er mo m lu Yehova ye.+ M ngu gbidyen gbough ku m lu a mi ken uwegh agh kun sha mngerem ma shin Ifi u Nil, ma a gema a hingir awambe.
18 Ishu i shin Nil ia kpe, nahan Nil una huma, Mbaigipiti vea kera fatyô u man mngerem ma shin Nil ga.”’”
19 Yehova maa kaa a Mose ér: “Kaa Aron wer, ‘Tôô gbough ough kura, naregh uwegh sha mngerem ma ken tar u Igipiti,+ sha uifi nav man mbaakpa nav*+ man uber nav kua atungu a na cii, sha er vea hingir awambe yô.’ Awambe aa lu hanma ijiir ken Igipiti cii, shin mkam ma sha ikyon man ma sha awen je kpaa.”
20 Fese je maa Mose man Aron er er Yehova kaa nahan. A kende gbough kura a gbidye sha mngerem ma shin Ifi u Nil la, sha ashe a Farou man mbatomov nav, maa mngerem ma shin ifi la cii gema hingir awambe.+
21 Maa ishu i shin ifi la kpe,+ ifi la gba human, nahan Mbaigipiti kera fatyô u man mngerem ma shin Nil ga,+ tar u Igipiti cii hingir awambe tseegh.
22 Nahan cii kpa, mbaahiriv mba ken Igipiti kpa er nahan sha ahir a ve,+ nahan ishima i Farou za hemen u cighir her, a kegh ato a ve ga, vough er Yehova vande kaan nahan.+
23 Tsô Farou hide hen ya na, shi kwagh gba un sha kwagh ne kpaa ga.
24 Nahan Mbaigipiti cii gba timen azôr sha akpe a Nil, keren mngerem ma man, sha ci u ve fatyô u man mngerem ma shin Nil mara ga.
25 Yehova yange gema mngerem ma shin Nil hingir awambe, ayange kar ataankarahar jigh jigh.
