Ekesodu 8:1-32
8 Yehova maa kaa a Mose ér: “Za hen Farou, za kaa a na wer, ‘Ka kwagh u Yehova a kaa je ne: “De ior av ve yem ve za civir mo.+
2 Aluer u zer vendan wer ve de yemen ga yô, me er tar wou cii ican, sha u van a mbaatungwa.+
3 Ifi u Nil una iv a mbaatungwa, vea due vea nyôr ken ya wou, man ken iyou you i tsan man sha gambe wou, kua ken ayou a mbatomov ou man ior ou, man ken atse a ou a kaan kwagh man shin mkam ou ma hôron mwem kpaa.+
4 Mbaatungwa mbara vea due vea va iv hen a we man hen ior ou man hen mbatomov ou cii.”’”
5 Shighe kar yô, Yehova kaa a Mose ér: “Kaa a Aron wer, ‘Tôô gbough ough, naregh uwegh sha uifi man sha mbaakpa mba Nil kua sha uber, nahan mbaatungwa ve due ve va sha tar u Igipiti.’”
6 Nahan, Aron naregh uwegh nagh sha mngerem ma Igipiti, tsô mbaatungwa gba duen, ve samber ken tar u Igipiti.
7 Nahan kpa, mbaahiriv mbara kpaa er kwagh shon ne môm sha ahir a ve la, ve er mbaatungwa due va ken tar u Igipiti.+
8 Farou maa yila Mose man Aron kaa a ve ér: “Zamber nen a Yehova, a kar a mbaatungwa mban her a mo man hen ior av kera,+ gadia m soo u nan ior mban ian mer ve yem ve za na Yehova nagh.”
9 Maa Mose kaa a Farou ér: “M ngu nan we icivir ne mer, ka we ôrom shighe u u soo wer m zamber, i kar a mbaatungwa mban hen a we kua hen mbatomov ou man ior ou man hen uya ou kera ye. Ka shin Ifi u Nil tseegh vea shi ye.”
10 Tsô a kaa ér: “Kper je.” Nahan Mose kaa ér: “A lu vough er u kaa nahan, sha er u fa er or môm nan lu er Yehova Aôndo wase ga yô.+
11 Mbaatungwa mbara vea kar hen a we kera, man ken ayou a ou man hen mbatomov ou kua hen ior ou kpaa cii kera. A lu shin Nil tseegh vea mase shin ye.”+
12 Tsô Mose man Aron kar hen ishigh ki Farou kera, nahan Mose za zamber a Yehova sha kwagh u mbaatungwa mba a va a mi sha Farou la.+
13 Maa Yehova er er Mose sôn un nahan, tsô mbaatungwa mbara gba kpen ken ayou man ken ityembeya man ken akôngo kpaa.
14 Ve kohol ve ve ta atihi atihi ngee je gande ôron; ihyuma ger ken tar la.
15 Zum u Farou nenge er i pever iyol yô, a cighir ishima na,+ a venda u wan imo ve ikyo, vough er Yehova yange ôr nahan.
16 Yehova maa kaa a Mose ér: “Kaa a Aron wer, ‘Kende gbough ough gbidye vuulevu u hen inya, u hingir inyarev mbi nyiman ken tar u Igipiti cii.’”
17 Maa ve er nahan. Aron kôr gbough ken uwegh nagh, naregh ku gbidye vuulevu hen inya, maa inyarev due gba nyiman ior man zendenya cii. Vuulevu u hen inya cii hingir inyarev mbi nyiman ken tar u Igipiti jimin cii.+
18 Mbaahiriv mbara kpa nôngo ér vea er inyarev mbi nyiman mbi va sha ahir a ve la,+ kpa ve fatyô ga. Tsô inyarev gba nyiman ior man zendenya.
19 Nahan mbaahiriv mbara kaa a Farou ér: “Kwagh ne ka hôwe u Aôndo je!”+ Kpa ishima i Farou za hemen u cighir her, a venda u keghen ato a ve, vough er Yehova vande ôron nahan.
20 Maa Yehova kaa a Mose ér: “Mough tugh tugh za sha ishigh ki Farou. Nenge! Ngu zan hen kpemnger! Za kaa a na wer, ‘Ka kwagh u Yehova a kaa je ne: “De ior av ve yem ve za civir mo.
21 Kpa aluer u de ior av wer ve yem ga yô, me na akughô* aa va sha a we man sha mbatomov ou man sha ior ou man sha uya ou kpaa, uya mba ken Igipiti cii vea iv a akughô; aa ngee je aa cir inya i ve* til sha mi la cii.
22 Sha iyange la, me pav tar u Goshen ape ior av ve lu la me ver kposo, akughô la aa lu ker ga.+ Ka sha kwagh ne man ne fa er mo Yehova, m lu hen tar ne ye.+
23 Me tese mkposo hen atô u ior av man ior ou. Kper ivande ne ia er.”’”
24 Tsô Yehova er kwagh ne, nahan ikpela i akughô cir ken ya u Farou, kua sha uya mba mbatomov nav man ken tar u Igipiti cii.+ Akughô la vihi tar la.+
25 Ken masejime yô, Farou yila Mose man Aron kaa a ve ér: “Za na nen Aôndo wen nagh hen tar ne.”
26 Kpa Mose kaa ér: “Doo u eren nahan ga, sha ci u kwagh u se lu za nan Yehova Aôndo wase nagh a mi la, una lu kwagh u ndôhôr Mbaigipiti ishima.+ Aluer se na nagh ku ndôhôr Mbaigipiti ishima sha ashe a ve nahan, vea ta se awen gaa?
27 Se za zende u ayange atar ken taaikyôngo, se za na Yehova Aôndo wase nagh ker, vough er a kaa se nahan.”+
28 Farou maa kaa ér: “Me na ne ian za na nen Yehova Aôndo wen nagh ken taaikyôngo. Kpa de yemen nen ica ga. Sôn nen sha ci wam.”+
29 Maa Mose kaa ér: “Hegen m ngu karen sha ishigh you kera, me za sôn Yehova, nahan kper akughô ne aa kar hen Farou man hen mbatomov nav man hen ior nav cii kera. Kpa Farou a de u eren asenge a vese,* sha u vendan u nan ior mban ian ér ve za na Yehova nagh.”+
30 Maa Mose due hen ishigh ki Farou kera, za zamber a Yehova.+
31 Nahan Yehova er sha imo i Mose la, akughô la kar hen Farou man hen mbatomov nav man hen ior nav kera. Ikyughô i môm kpa kera shi ga.
32 Nahan kpa, Farou shi cighir ishima na, venda u nan ior mbara ian ér ve yem.
