Ekesodu 21:1-36
21 “Ka atindiakaa a u za pase ve je ne:+
2 “Aluer u yam kpan u Heberu yô,+ nana er tom u kpan anyom ataratar. Kpa inyom i sha utaankaruhar la yô, a pase nan nana due ken kpan kera a u kimbin kwagh shio.+
3 Aluer nan va tswen yô, shi nana due nana yem tswen. Kpa aluer ka or u nan lu a kwase yô, kwase u nan a yem vea nan imôngo.
4 Aluer orvesen u nan na nan kwase, man kwase la mar nan ônov mba nomso shin mba kasev yô, kwase la kua ônov mbara cii vea hingir mba orvesen u nan, nana yem tswen.+
5 Kpa aluer kpan la nan sendegh her, nan kaa ér, ‘Orvesen wam doom ishima kua kwase wam man ônov av, m soo u duen ken kpan kera ga’ yô,+
6 orvesen u nan la a va a nan sha ishigh ki Aôndo u mimi. Maa a va a nan, nana va lian sha hunda shin sha kpandehunda, orvesen u nan la a pev nan tough sha sua, nahan nana lu kpan na sha ayange a uma u nan cii.
7 “Aluer or tee wan u nan u kwase za hingir kpan yô, wankwase la una yem er kpan u nomso ka nan yem nahan ga.
8 Aluer a kera doo orvesen na ishima ga, man a kera soo ér a lu kwase na u sha uikya ga, kpa a soo u geman un teen orgen* yô, a gba u una gema un una tee or u ken tar ugen ga, sha ci u a nzughul a na.
9 Aluer a tsôr kwase sha ci u wan na yô, a̱ er a na er ka i er a wan u kwase nahan.
10 Aluer a za vôso kwase ugen yô, a naan kwase u hiihii la kwaghyan man akondo, shi a eren un kwagh u i gbe u nom nana eren a kwase u nan la kpaa,+ kwagh a de panden ga.
11 Aluer a lumun u eren un akaa a atar ne ga yô, una due ken kpan kera a u kimbin inyaregh shio.
12 “Hanma or u nan gbidye or je nan kpe yô, i wua nan kpee je.+
13 Kpa aluer nan er ka sha apera ga, shi Aôndo u mimi la de ér kwagh a er nahan yô, me tese ne ijiir i nana yevese nana yem yô.+
14 Aluer or vihi ishima a orgen je nan wua nan sha apera yô, or la kpa i wua nan kpee je,+ aluer ka u a za kôr nan sha atse am a nanden nagh kera je kpaa.+
15 Or u nan gbidi ter u nan shin ngô u nan cii, i wua nan kpee je.+
16 “Aluer or ii or+ za tee shin i va kôr nan a mi yô,+ i wua nan kpee je.+
17 “Or u nan toho ter u nan shin ngô u nan cii, i wua nan kpee je.+
18 “Ka kwagh u una za hemen zum u nomsombaiorov ve lu eren ayôôso, man or môm ker nan te orgen iwen shin iju,* man nan kpe ga kpa nan lu sha gambe u uange je ne:
19 Aluer nan fatyô u moughon sha zenden ken won sha gbo yô, or u yange gbidye nan la nana war mtsaha. Nana kimbi kwagh sha shighe u or u i vihi nan iyol la nan lu eren tom ga la tseegh, zan zan vihiyol u nan la una kar been.
20 “Aluer or gbidye kpan u nan u nomso shin kpan u nan u kwase sha gbo man a kpe nan sha ave yô, i or iyev sha ci u kpan la keng je.+
21 Kpa aluer iyange kar i môm shin ayange kar ahar cii ve kpan la a kpe yô, i de oron iyev sha ci u nan ga, sha ci u i yam a yam nan sha inyaregh ki orvesen u nan je.
22 “Aluer nomsombaiorov mba nôngon num, man ve za ta sha kwaseuya maa nan mar kôugh+ kpa kwagh ugen u vihin er ga yô,* or u nan er kwagh la nana kimbi kwagh u nom u kwase la a kaa ér nana kimbi la kpee je; nana kimbi sha ikyev i mbaajiriv.+
23 Kpa aluer kwagh u vihin ugen er yô,* i kimbi uma sha uma, i de bundu ga,+
24 ishe sha ishe, inyigh sha inyi, uwegh sha uwe, nguhar sha nguha,+
25 kwaghhian sha kwaghhian, ivav sha ivav, gbidiv sha ugbidi.
26 “Aluer or gbidye kpan u nan u nomso shin kpan u nan u kwase kwagh sha ishe* man ishe la pir yô, nana de kpan la a yem gbilin sha ishe i nan la.+
27 Man aluer nan tsua kpan u nan u nomso shin kpan u nan u kwase inyigh yô, nana de kpan la a yem gbilin sha inyigh ki nan kira.
28 “Aluer nombua tume nomsoor shin kwase man nan kpe yô, i ta bua la awen a kpe kpee je,+ shi i de yaan inyam na ga; kpa or u bua la yô, i de tsahan nan ga.
29 Kpa aluer nombua la vanden tumen ior kera, man i ôr or u a lu u nan la kpa nan kôr un ga zan zan a va wua nomsoor shin kwase yô, i ta bua la awen, shi or u i lu u nan la kpaa i wua nan.
30 Aluer i kaa ér nana kimbi kwagh sha u paan uma u nan yô, a gba u nana kimbi hanma kwagh u i kaa ér nana kimbi sha u paan uma u nan la cii.
31 Aluer a tume ka wan u nomso shin wan u kwase kpaa, kape a kure ijir i or u i lu nombua u nan la je ne.
32 Aluer nombua la tume ka kpan u nomso shin kpan u kwase yô, or u i lu bua u nan la nana̱ na orvesen u kpan la ushekel 30,* shi i ta bua la awen a kpe.
33 “Aluer or undu ihyungwa ivegher shin nan time ihyungwa nan cir zwa u i ga, maa bua shin jaki va gba shimi yô,
34 or u nan time ihyungwa la nana kimbi.+ Nana kimbi or u i lu ilegh ki nan la ishe i ki, nahan ilegh ki kpen kira kia hingir ki nan.
35 Aluer bua u orgen vihi bua u orgen iyol man a kpe yô, ve tee bua u uma la, ve kar inyaregh kira; shi ve kar bua u a kpe la kpa ker ayol a ve.
36 Kpa aluer kera je i vande fan ér bua la tumen kpa or u bua la kôr un ga yô, nana̱ kimbi bua sha bua keng keng, nahan bua u kpen la una hingir u nan.
Ngeren mba shin kpe
^ Zwa Heberu, “a soo ér orgen nana va paa un.”
^ Shin a fatyô u kaan ér, “nan gbidi nan kwagh.”
^ Shin “ngô la shin wan la nan vihi iyol kehelee ga yô.”
^ Shin “aluer or ve môm nan kpe yô.”
^ A fatyô u lun u tan nan sambe sha ishe kpaa.
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
