Ekesodu 4:1-31
4 Nahan kpa, Mose gema kaa ér: “Kpa aluer m za man ve nam jighjigh ga, shi ve kegh ato a kwaghôron wam kpaa ga ye?+ Gadia vea kaa ér, ‘Yehova ande hen a we ga.’”
2 Maa Yehova pine un ér: “Ka nyi u lu a mi ken uwe laa?” A gema a kaa ér: “Ka gbough.”
3 A kaa a na ér: “Gema ku kende hen inya.” Nahan a gema ku a kende hen inya, maa ku hingir iyô;+ tsô Mose yevese kar her kera.
4 Yehova maa kaa a Mose ér: “Za uwegh kôr i shin tsa.” Nahan a za uwegh a kôr i, maa i gema i hingir gbough ken uwegh nagh.
5 Aôndo maa kaa ér: “Ka sha u ve na jighjigh ér Yehova Aôndo u uter vev, Aôndo u Aberaham man Aôndo u Isaka man Aôndo u Yakob+ ande hen a we yô.”+
6 Yehova maa shi kaa a na ér: “Za ase uwegh ken ikyondo you sha vanger.” Tsô a za uwegh ken ikyondo na. Dughun yô, nenge, uwegh nagh gba imande, kungu pung er ka senou nahan!+
7 Maa a kaa ér: “Hide za uwegh ken ikyondo you sha vanger.” Maa a hide a za uwegh ken ikyondo na, dughun ku ken ikyondo na sha yô, ku hide ku lu her doo doo er iyol na cii lu nahan!
8 A kaa ér: “Aluer vea na u jighjigh ga, shin vea wa ivande i hiihii la ikyo ga yô, vea wa i dondon ne ikyo kpee je.+
9 Aluer uivande mba uhar mban kpa ve na jighjigh a mi ga, shi ve lumun u keghen ato a we ga yô, kese mngerem shin Ifi u Nil haa hen inya, nahan mngerem ma u kese shin Nil la ma a hingir awambe hen inya.”+
10 Tsô Mose kaa a Yehova ér: “Yam anyi Yehova, mo m fetyô u lamen tsembelee ga, kera cii je iliam nem ican,* hegen u u lamen a wanakiriki wou ne kpa kaha ga; shi nombor wam kpa peese ga.”+
11 Yehova gema pine un ér: “Ka an nan gbe or zwa? Shin ka an nan er orkondonikyer man orkondonato man or u nengen tsembelee shin orapirashe? Kera ka mo Yehova gaa?
12 Yô za ase, me lu a we er u lu lamen la,* shi me tese u kwagh u u ôr la kpaa.”+
13 Kpa a kaa ér: “Yam anyi Yehova, wea lumun yô, gba tindin orgen u u soo u tindin cii tsô.”
14 Maa ishima vihi Yehova a Mose, a kaa ér: “Nahan anngôu Aron+ Orlevi la di ye? M fa, a fa iliam tsembelee. Man hegen ngu van sha gbenda u va kohol we heen. Zum u una nenge a we yô, a saan un iyol.+
15 Nahan lam a na, wa un mkaanem ken zwa,+ me lu a we man un zum u ne lu lamen la,+ shi me tese ne kwagh u ne er yô.
16 Una lamen a ior sha ci wou, shi una lu orshua wou, we di u lu un er ka Aôndo nahan.*+
17 U kôr gbough kun ken uwegh ough, u eren uivande a mi.”+
18 Nahan Mose hide za hen ter na kem Yetero,+ za kaa a na ér: “Wea lumun yô, ma m yem. M soo u hiden zan hen anmgbianev av mba ve lu ken Igipiti la za nengen vea lu uma her yô.” Yetero gema kaa a Mose ér: “Za bem bem.”
19 Tsô Yehova kaa a Mose ken Midian ér: “Hide yem ken Igipiti, sha ci u ior mba yange ve soo u wuan we* la cii ve kpe.”+
20 Mose maa penda kwase na man ônov nav sha jaki, mough gba yemen ken tar u Igipiti. Mose shi kôr gbough ku Aôndo u mimi la ken uwe.
21 Maa Yehova kaa a Mose ér: “Zum u u hide ken Igipiti yô, er uivande mba m ne u tahav mbu eren mban cii sha ashe a Farou.+ Kpa me de ishima na ia cighir,+ nahan una de ér ior mbara ve yem ga.+
22 Kaa a Farou wer, ‘Yehova ngu kaan ér: “Iserael ka wan wam, wan wam u iunda je.+
23 Nahan m ngu kaan a we mer, De wan wam a yem a za civir mo. Kpa aluer u venda u den wer a yem yô, me wua wan wou, wan wou u iunda la.”’”+
24 Mba ngur yemen, mba za nyer hen ijiir i tsan yô, Yehova+ va kohol un her gba nôngon u wuan un.+
25 Tsô Shipora+ tôô aniwen u esen* tsôngo wan na a mi, maa a er kwav u ken won la bende un sha nguhar, a kaa ér: “Ka sha ci u u ngum orkwasehe u awambe.”
26 Nahan a de un a yem. Hen shighe la kwase la kaa ér, “orkwasehe u awambe,” sha ci u icôngo la.
27 Tsô Yehova kaa a Aron ér: “Mough za ken taaikyôngo za kohol Mose.”+ Nahan a mough a za zua a na hen uwo u Aôndo u mimi la,+ a sugh un a suse un zwa.
28 Nahan Mose ôr Aron mkaanem ma Yehova tindi un la cii,+ kua uivande mba a kaa ér a za er la kpaa cii.+
29 Tsô Mose vea Aron ve yem ve za kohol mbatamen mba Mbaiserael cii imôngo.+
30 Aron ôr ve akaa a Yehova ôr Mose la cii, maa a er uivande mbara+ sha ashe a ior mbara.
31 Tsô ior mbara na jighjigh.+ Mba ongo ér Yehova umbur Mbaiserael+ shi a nenge a ican ve yô,+ ve gure ve kuma ishiv inya.
