Ekesodu 2:1-25
2 Tsô hen shighe la, orgen hen ya u Levi vôso wan u Levi u kwase.+
2 Kwase la wa iyav mar wan u nomso. Zum u kwase la nenge er wan la a doo ishima yô, a yer un iwer itiar.+
3 Va kera fetyô u yeren un ga yô,+ a tôô ikyese i i tume* sha ikyenaikya* yô, a shighe i tsur man mningem, a gema wan la a wa shimi a za ver ken ayegh a shin kpe u Ifi u Nil.
4 Anmgbian na u kwase+ gema tile ken ica daalaa, sha er una nenge er kwagh na a za yô.
5 Wan u Farou u kwase ve iyolôôn shin Nil yô, mbayevkasev mba shiren un gema lu zenden shin kpe u Nil. Tsô a ta ashe a za nenge a ikyese i i lu ken ayegh la. Maa fese je a tindi wankwase u shiren un ér a za tôô i.+
6 Bughun i yô, a nenge a wannomso la shimi, wan shon lu vaan. Tsô a kaa ér: “Ka wan u Mbaheberu.” Nahan cii kpa mhôônom kôr un a na.
7 Maa anmgbian na u kwase la pine wan u Farou la ér: “M̱ za m za yila kwase ken Mbaheberu u nana naan we wan ne atumba yôô?”
8 Tsô wan u Farou la kaa a na ér: “Za!” Maa fese je wankwase la za yila ngô u wan la.+
9 Wan u Farou la kaa a kwase la ér: “Tôô wan ne yem a mi za naan mo un atumba, me kimbin we.” Nahan kwase la yem a wan shon gba za nan un atumba.
10 Wan la vesen yô, a za a na a za na wan u Farou u kwase la, a hingir wan na.+ Maa a ii un iti ér Mose,* a kaa ér: “Ka sha ci u m dugh un shin mnger.”+
11 Tsô sha ayange la, zum u Mose wa ikyondo kera yô,* a due a za hen anmgbianev nav sha u za nengen ican i ve lu yan la,+ maa a nenge Origipiti lu gbidyen Orheberu u lu anmgbian na la.
12 Nahan a yenge keen a yenge keen, nengen a or ga yô, a wua Origipiti la a yer un shin waarawa.+
13 Kpa kpernan shi dugh yô, a nenge Mbaheberu uhar lu nôngon num. Nahan a pine or u lu a ibo la ér: “Er nan u gbidi anngôwe?”+
14 Or la gema kaa ér: “Ka an nan ver u tor man orjir sha a vese? Mo kpa u soo u wuan mo er u woo Origipiti la nahanaa?”+ Tsô mciem gba Mose iyol, a kaa ér: “Mimi je ior fa kwagh ne!”
15 Farou ongo kwagh ne yô, a gba nôngon ér una wua Mose; kpa Mose yevese Farou yem ken tar u Midian,+ a za tema hen kpejôr.
16 Pristi u Midian+ gema lu a ônov mba kasev utaankaruhar, nahan ve va u va kesen mngerem haan shin mkam ma nan ilev mngerem, sha er ilev mbi ter ve mbia ma yô.
17 Kpa mbakuranilev va va zenda ve kera, er ve vanden eren nahan. Mose nengen nahan yô, a mough a wase* kasev mbara, shi a na ilev vev mngerem kpaa.
18 Mba hidi hen ya, hen ter ve Reuel* yô,+ kpiligh un iyol, a pine ve ér: “Er nan ne hidi nyian fele nahana?”
19 Ve gema ve kaa a na ér: “Origipiti ugen+ yima se sha ikyev i mbakuranilev mbara, shi a wase se u kesen mngerem nan ilev yasev je kpaa.”
20 A gema a pine ônov nav ér: “Or shon ngu hana? Er nan ne undu unu? Za yila un nen a va ya kwagh vea vese imôngo.”
21 Tsô Mose lumun u lun vea or la, nahan a na Mose Shipora,+ wan na u kwase, ér a vôso.
22 Tsô kwase na va mar un wan u nomso, a ii un iti ér Gershom,*+ gadia a kaa ér, “M hingir shiror ken tar ugen.”+
23 Ayange nga kar kpishi yô tor u Igipiti kpe,+ kpa Mbaiserael za hemen u toghor iyol sha ci u tom u kpan la, shi ve lu vaan kpaa. Nahan mliam ma ve lu vaan ér i yima ve ken tom ve u kpan la lu kôndon zan hen Aôndo u mimi la.+
24 Shighe kar yô, Aôndo ungwa mtoghor ve la,+ shi Aôndo umbur ikyur i ya a Aberaham man Isaka man Yakob la.+
25 Nahan Aôndo gema ishima ver sha kwagh u Mbaiserael; Aôndo nenge ican i ve lu yan la.
