Ekesodu 32:1-35
32 Zum u ior nenge er lu tôôn Mose shighe gôgônan u hungwan sha uwo yô,+ ve za kase Aron ve kaa a na ér: “Mough sha er se aôndo u una hemen se yô,+ sha ci u Mose, or u yange due a vese ken tar u Igipiti kera ne yô, se fa kwagh u a za er un ga.”
2 Tsô Aron kaa a ve ér: “Yô tsua ase nen mbaabinkwini mba* sha zanaria+ mba ken ato a kasev enev man ônov enev mba nomso man mba kasev la va nam nen.”
3 Tsô ior cii gba tsuan mbaabinkwini ken ato a ve* van a mi hen Aron.
4 Maa a ngohol zanaria la hen a ve, a sôr un sha kanji, a er eev mbu wanbua a mi.+ Tsô ve gba kaan ér: “Iserael, ka aôndo wou u yange due a we ken tar u Igipiti kera je ne.”+
5 Aron nengen nahan yô, a ta atse a nanden nagh hen ishigh ki eev mbura, maa Aron kaa ér: “Kper ka iniongo i Yehova.”
6 Nahan ve mough kpernan tugh tugh ve gba nan iniav mbi nanden kua iniav mbi bem. Ka been yô, ior cii tema inya ya kwagh shi ma kwagh. Maa ve mough ve gba ember.+
7 Tsô Yehova kaa a Mose ér: “Hungwa yem, gadia ior ou mba u due a ve ken tar u Igipiti kera ne hôngor ayol a ve.+
8 Fese nahan ve undu gbenda u yange m kaa a ve mer ve zaan sha mi la.+ Ve er eev mbu wanbua sha ci ve, mba guren mbu inya shi nan mbu iniav kaan ér, ‘Iserael, ka aôndo wou u yange due a we ken tar u Igipiti kera je ne.’”
9 Yehova shi kaa a Mose ér: “M nenge yô, ior mban ka ior mba taver ityough.*+
10 Nahan yô, de m tim ve sha ishimavihin yam ne, m gema u hingir ikyurior i vesen.”+
11 Tsô Mose zamber a Yehova Aôndo+ na kaa ér: “Yehova, a er nan man ishimavihin you ia mough a ior ou, er u due a ve ken Igipiti kera sha tahav mbu vesen man sha uwegh ku ageegh kera cii ne nahana?+
12 Ka nyi man Mbaigipiti vea gba va kaan ér: ‘Yange due a ve lu sha awashima u bo, lu u za wuan ve sha iwo, timin ve sha tar kera’ nahana?+ Hide a ishima i i lu vihin we tsung la ijime, shi gema ishima* sha kwaghbo u u we ishima u van a mi sha ior ou la.
13 Umbur mbayev ou Aberaham man Isaka man Iserael, mba u bum a ve sha iyol you u kaa wer: ‘Me na ônov enev* vea ngee kpishi er asan a sha kwavaôndo nahan,+ shi me na ônov enev* tar u m ver sha ci ve ne cii, sha er vea ngohol u ua hingir kwagh ve gbem yô.’”+
14 Tsô Yehova gema ishima* sha kwaghbo u kaa ér una va a mi sha ior nav la.+
15 Mose maa kar hungwa sha uwo la a ikpandeawen i ihiar i Shiada la+ ken uwe.+ I nger kwagh sha ikpandeawen la keen man keen; i nger ken ishi man ken ijime cii.
16 Ikpandeawen la lu tomaveegh u Aôndo, shi kwaghngeren la kpaa lu ingeren i Aôndo, i gber a gber sha ikpande shon.+
17 Zum u Yoshua ungwa ayôôso a ior lu ngoron la yô, a kaa a Mose ér: “Mba geren amo a utya ken afo.”
18 Kpa Mose kaa ér:
“Ka amo a mba wan atsam a mhembe ga,Shi ka amo a mba gberen kwelegh u kwaghtseren kpaa ga;Kpa m ngu ungwan ka amo agen kposo.”
19 Mose va mgbôghom a afo la, nengen a wanbua la+ kua amar a ior lu vinen la yô, ishima vihi un ker, a gema ikpandeawen i a lu a mi sha ave la a ta hen itinewoogh la, i hembe avur avur.+
20 A tôô wanbua u ve er la a nande un ken usu, shi a wua un hingir mwem,+ a gema ma a tsenda sha mnger a na Mbaiserael ve ma.+
21 Mose pine Aron ér: “Ka nyi ior mban ve er a we ve u ve a zege isholibo sha ve nahana?”
22 Aron gema kaa ér: “Ishima i de vihin we ga, terem. U fa er ior mban ve ver asema a ve cii sha u eren kwagh u ifer yô.+
23 Ve kaa a mo ér, ‘Er se aôndo u una hemen se yô, sha ci u Mose, or u yange due a vese ken tar u Igipiti kera ne yô, se fa kwagh u a za er un ga.’+
24 Nahan m kaa a ve mer, ‘Hanma or u nan lu a zanaria yô nana tsua a nam.’ Tsô m gema m haa ken usu maa wanbua ne due.”
25 Mose nenge er ior mbara ve ar ave yô, sha ci u Aron de ve, ve ar ave, nahan ve hingir kwagh u ihyeenegh hen ishigh ki mbahyomov vev.
26 Maa Mose za tile sha hunda u afoogh, a kaa ér: “Ka an nan te ikyaa a Yehova? Nana va kohol mo!”+ Nahan Mbalevi cii za kase un.
27 Maa a kaa a ve ér: “Ka kwagh u Yehova Aôndo u Iserael a kaa je ne, ‘Hanmô wen nana kange sanker u nan iwenge, nana kar ken afo sha ihinda ihinda, nana wua anmgbian u nan man or u wan ndor a nan kua huror u nan kpaa.’”+
28 Mbalevi er kwagh u Mose kaa la. Nahan i wua ior sha iyange la kuma nomso 3,000.
29 Tsô Mose kaa ér: “Tsegha nen ayol a en* sha ci u Yehova nyian, gadia hanmô wen nan ta num sha wan u nan man sha anngô u nan;+ nyian ne una na ne iveren.”+
30 Ka ker ken sev mbugen yô, Mose kaa a ior ér: “Ne er isholibo i vesen kpishi, nahan me kôndo me za hen Yehova, me za zamber a na* aluer ka u una de ne isholibo yen yô.”+
31 Tsô Mose hide za hen Yehova za kaa ér: “Sha mimi yô ior mban er isholibo i vesen! Ve er aôndo u sha zanaria!+
32 Nahan kpa wea lumun yô, de ve isholibo ve;+ kpa wea lumun ga yô, gba koughun mo iti ken takeda wou u u nger la sha tsô.”+
33 Kpa Yehova kaa a Mose ér: “Or u nan erem isholibo la, ka nan me kough iti i nan ken takeda wam kera ye.
34 Yem, za hemen ior mbara za a ve hen ijiir i yange m ôr u kwagh u i la. Nenge! Ortyom wam una lu zan we sha hemen,+ nahan sha iyange i me va u ôron ijir la, me tsaha ve sha isholibo ve la.”
35 Tsô Yehova haa ior mbara bouange sha ci u wanbua u ve er la, un shon u Aron er la.
