Ekesodu 23:1-33
23 “De samber a ibaver i aiegh ga.+ De zough zwa vea iferor sha u eren shiada u bo ga.+
2 De dondon ikpelaior ijime sha u eren iferkwagh ga, de eren shiada u aiegh sha u dondon ikpelaior ga.*
3 De gbe nan icanor ishô tsô ga.+
4 “Aluer u za asegh sha bua shin jaki i orhyom wou i i tsum yô, hide a mi hen nan kpee je.+
5 Aluer u nenge ikyav kighir jaki i or u nan ker u ihyom yô, de gbe karen yemen ga, kpa wase nan u saghen i ikyav mbira.+
6 “De nzughul ijir i icanor u hen atô wou ga.+
7 “De we uwegh sha kwagh u i we or iyol* ga, shi de wuan orishôôgh man orperapera ga, sha ci u mayange me na iferor ishô ga.+
8 “De ngohol inyaregh ki yamen ishô ga, sha ci u inyaregh ki yamen ishô ka ki pir mba ve nengen tsembelee la ashe, shi ki nzughul kwaghôron u mbaperapera kpaa.+
9 “De eren shiror ican ga. Ne kpa ne lan er or ka nana lu shiror ve i lu ga,* sha ci u yange ne lu ushirmbaiorov ken tar u Igipiti.+
10 “Kahan iyiav hen inya you shi sundan mbi anyom ataratar.+
11 Kpa inyom i sha utaankaruhar la yô, de kahan i ga, de i gba lun tsô, sha er atsanaior a ken ior ou aa zua a kwaghyan her yô, man kwagh u ve undu la, inyam i ken toho di ia ya. Ishule yen i wain kua ishule yen i olev kpaa kape ne er a i je la.
12 “Er tom wou ayange ataratar; kpa sha iyange i sha utaankaruhar la yô, de eren ma tom ga, sha er bua wou man jaki you vea mem, shi wan u kpan wou u kwase kua or u a ve a va la kpaa vea mem yô.+
13 “Wa nen ikyo sha er ne eren hanma kwagh u m ôr ne cii yô,+ de teren nen ati a mbaaôndo mbagenev ga; a de dugh sha ijô yen ga.+
14 “Eren nen mo iniongo kwa tar ken hanma inyom.+
15 Eren nen Iniongo i Beredi u I We Kwa sha Mi Ga la.+ Yaan nen beredi u i we kwa sha mi ga la ayange ataankarahar, sha shighe u i ver ken uwer u Abiba* la,+ vough er m vande ôron ne nahan, sha ci u ka shighe u ne due ken Igipiti je la. Or môm nana de ve sha ishigh yagh ave ave ga.+
16 Heela tseegh ga, eren nen Iniongo i Sunda,* i iyiav yenev mbi mbi hii vian ken akaa a yange ne lôô ken ityev la;+ kua Iniongo i Kurun a Iyiav* sha mbee u inyom, zum u ne kohol iyiav mbi ne zough a mi ken tom wen ne kur a mi la.+
17 Nomso ou cii, ve vaan sha ishigh ki Yehova Ter u mimi kwa tar ken inyom.+
18 “De nungwan kwagh u i we kwa sha mi sha awambe a nagh ku i lu nan mo la ga. Shi ahôm a i nem iniav a mi sha uiniongo av la a de tse her ga.
19 “Va a iyiav mbi hiihii mbi hemban doon, mbi u zough a mi ken sule wou la hen iyou i Yehova Aôndo wou.+
“De jiidi wanivo sha atumba a ngô na ga.+
20 “M ngu tindin ortyom nana zaan we sha hemen,+ sha u kuran we sha gbenda shi zan a we hen ijiir i m ser m ver la.+
21 Kegh ato a na, ungwan imo na. De hendan nen a na ga, gadia una de ne asorabo a en ga,+ sha ci u iti yam ngi ken a na.
22 Nahan kpa, aluer u ngu ungwan imo na vindi vindi shi eren hanma kwagh u m kaa yô, me vihi ishima a mbahyomov ou, shi me hendan a mba ve hendan a we cii.
23 Sha ci u ortyom wam una zaan we sha hemen, una za a we hen tar u Mbaamor man Mbahiti man Mbaperishi man Mbakaanan man Mbahivi man Mbayebushi, me tim ve kera.+
24 De guren mbaaôndo vev inya ga, shi or a de meen we civir ve shin dondon aeren a ve kpaa ga.+ Kpa gema hembe ve kera, shi hembe mtôm vem ma akombom ma awenem mara avur avur.+
25 Civir nen Yehova Aôndo wen,+ nahan una haa iveren sha kwaghyan* wen man mngerem enem.+ Me kar a angev her a ven kera.+
26 Kasev mba ken tar wen vea dugh iyav ga, shi vea lu ikyôm kpaa ga,+ me na ne tsa gbem.*
27 “Me na mciem am ma a zaan we sha hemen,+ me er anzughul aa gba her atô u ior mba u tagher a ve cii, shi me na kwagh a hemba mbahyomov ou cii, vea yevese we.*+
28 Me tindi iyolkpen* ia lu zan we sha hemen,+ ia na Mbahivi man Mbakaanan man Mbahiti vea yevese sha ishigh you kera.+
29 Me zenda ve kera sha ishigh you ken atô u inyom i môm tseegh ga, sha er tar la ua hingir ice nahan inyamtoho ia ngee ker a gande u ga yô.+
30 Me zendan ve sha ishigh you kera kure kure, zan zan u va mar u ngee kpishi, u ngohol tar la ua hingir u wou.+
31 “Me ver akighir a tar wou aa hii hen Zegemnger u Nyian zan zan aa za kighir hen zegemnger u Mbafiliti, shi aa hii hen taaikyôngo zan zan a za ar hen Ifi;*+ gadia m ngu nan mba ve tem ken tar la sha ikyev you, u zenda ve sha ishigh you kera.+
32 De ye ikyur a ve shin mbaaôndo vev kpaa ga.+
33 Ve de tem ken tar wou ga, sha er vea va na u erem isholibo ga yô. Aluer u civir mbaaôndo vev yô, vea hingir we kwaghhônon kpee je.”+
Ngeren mba shin kpe
^ Shin “sha ci u ior kpishi mba ôron nahan yum ga.”
^ Zwa Heberu, “kwaghôron u aiegh.”
^ Shin “ne lan uma u shiror ga.”
^ Nenge Ngeren u Seer u B15 la.
^ I yilan i kpaa ér, Iniongo i Ulahadi, shin Pentikôsti.
^ I yilan i kpaa ér, Iniongo i Atumbe (Utabernakel).
^ Zwa Heberu, “beredi.”
^ Shin “me na ayange a uma wen aa ngee.”
^ Shin “me er mbahyomov ou cii vea gema ijime a yevese we.”
^ Shin a fatyô u kaan ér, “mciem; ikyarkyase.”
^ Ka ifi u Uferati je la.
