Anzaakaa 6:1-35
6 Wan wam, aluer u ngohol or u wan ndor a we uwegh,+Shi u zua uwegh* a orvannya,+
2 Aluer i hôn u sha ityendezwa you i dugh,I kôr u sha akaaôron a sha zwa wou yô,+
3 Er kwagh ne, wan wam, nahan u war,Gadia u gba sha ikyev i orwanndor a we:
Za za hide a iyol ijime zamber a orwanndor a we sha gbashima.+
4 De lumun wer ashe a ou a yav ga,Akurashee a ou kpaa, a de meer ga.
5 Osough kera er morya ka a osough sha uwegh ku ortato nahan,Man er inyon ka i osough sha uwegh ku orkôroninyon yô.
6 Za hen ishondo, we oruhwe;+Za nenge gbenda u i eren kwagh la, nahan hingir orfankwagh.
7 Shin er i lu a orhemenShin orvesen shin tyoor ga nahan kpa,
8 Ka i kohol kwaghyan u i inyom,+I koso kwaghyan u i sha shighe u sunda.
9 We oruhwe ne, u yav heela a kuma shighe nan je?
Ka hanma shighe jim u ndere?
10 Mnyam ma seer yaven man mnyam ma seer meer,Kua ave a seer wan ikyum memen+
11 Aa na yô, ican ia va bur u er ka ornumungbenda nahan,Ibanave kpaa er ka or u lun a ikyav mbi tswamev yô.+
12 Gbilinor u wan ifer ka nan zenden nan tsughun ior.+
13 Ka nan kamen or ashe,+ nan ôron kwagh sha nguha,Shi nan tesen akav sha ahôaveegh.
14 Ka nan eren ayom a bulan or+Man a van a ayôôso+ ken boshima u nan la.
15 Sha nahan yô, kwaghtseren una va sha a nan aburabur;A sombo nan fese, nana kera fatyô u waren ga.+
16 Akaa nga ataratar a Yehova a ker a ihyom yô;Een, ataankarahar je kpaa, a a ndôhôr un* ishima yô:
17 Ka ashe a imangeregh,+ man nombor u aiegh+ man ave a haan awambe a ishôôgh inya,+
18 Man ishima i eren ayom a ifer,+ man angahar a zan ayem u za eren ifer,
19 Man orshiada u aiegh, u aie a been ken zwa u nan ga yô,+Man hanma or u nan senden anmgbianev ityough cii.+
20 Wan wam, kuran tindi u teru,Shi kwaghwan* u ngôu kpaa de te un kera ga.+
21 Kange ve sha ishima hanma shighe,Zer ve sha mon wou.
22 Zum u u lu zenden yô, una hemen we,Zum u u yav inya yô, una tile una kuran we,Zum u u nder kpaa, una lam a we.*
23 Gadia tindi ka imenger,+Ityesen* kpaa ka iwanger,+Shi mkôôm u tsaha u ve a mi la ka gbenda u uma.+
24 Vea kura u sha ikyev i bokwase,+Sha ikyev i zwanyohon u idyakwase.*+
25 Mdoom nam ma de saren we ken ishima you ga,+Shi de den wer ashe a na a kpen ikyôr la a kôr u ken ishima kpaa ga.
26 Gadia gbagakwase ka a na or nan gba ican jeNan mase shin a kpenberedi môm tseegh+Kwase u orgen di ka a gema a yar ikyôr sha uma u or jighilii.
27 Or a fatyô u haan usu sha vanger u nan, a u ikyondo i nan hian shio kpa?+
28 Shin or a fatyô u ndyaren akaausu a kpenger kpengerA u angahar a nan hughum shio?
29 Kape or u nan yav a kwase u orwanndor a nan kpaa kwagh u nan a lu je la;Ma or u nan bende a na, u nana due iyolishô je kpa nan ngu ga.+
30 Ormbaiv ka nana ii sha u been ijen i i lu kôron nan la yô,Mba lahan nan ga.
31 Nahan kpa, zum u i ker nan yô, nana kimbi kwa taankaruhar;Nana na akaainjaa a hen ya u nan cii.+
32 Hanma or u nan eren idya a kwase cii, nan ban a mkav;*Or u nan eren nahan la, nan ngu van a mtim sha iyol i nan.*+
33 Ka avav man ihyeen tsô, nana zua a mi ye,+Kunya u nan kpaa, a ese u kera ga.+
34 Gadia iyuhwe ka i na ishima i vihi nom ker kpishi;Nana zungwe mhôônom zum u nan lu oron iyev la ga.+
35 Nana lumun ipaan i môm i môm ga,Shi aluer u na nan iyua kehe nan nan je kpaa, ia na ishima a gba nan shimi ga.*
