Anzaakaa 17:1-28
17 Guda u yan beredi u ombor ape bem a lu yô*+
A u lun hen ya u i lu eren iniongo her* kpa ayôôso a gema a lu la.+
2 Kpan u a lu a kwaghfan yô, una hemen wan u a eren kwagh u kunya yô;Una ya kwar u dyako er un kpa ngu anngô ve nahan.
3 Ka i sôr azurufa shin itye, shi i sôr zanaria ken atse,+Kpa asema yô ka Yehova a tôvon ye.+
4 Iferor ka nan kegh ato a akaaôron a nyoon,Or u ayomough kpaa ka nan kegh ato a nombor u ifer.+
5 Or u nan naha icanor tar yô, ka un u a gbe nan la je nan lu lahan ye,+Shi or u nan ember sha kwagh u a tser orgen kpaa nana war mtsaha ga.+
6 Ônov mba ônov ka idyer i icivirigh i mbabeenyol.
Shi ônov kpaa mba te ihyagh a uter* vev.
7 Kwaghôron u perapera* ka a tuna sha ibumeor kpekpe.+
Kape kwaghôron u aiegh kpaa ka a tuna sha orhemen* je la!+
8 Iyua ngi er iwen i injaa* nahan, hen or u nan lu nan i la;+Ka i na nan za ikyura.+
9 Or u nan den kwaghbo* yô nan ngu keren dooshima,+Kpa or u nan sendegh sha kwagh yum yô, nan paven azende a kôôsôô.+
10 Or u kaven kwagh yô, ka a kôôm nan kwa môm tseegh kpa nan zua a kwaghfan,+Kpa ibumeor yô a gbidye nan kwa deri je kpa nana kav kwagh ga.+
11 Orbo ka nan keren u hemban ato tseegh,Kpa a tindi or u wan tswam nana za tsaha nan.+
12 Guda u tagher a biya* i i lu vaan ônov mba iA u tagher a ibumeor shighe u nan lu neer ibumegh la.+
13 Aluer or tôô kwaghbo kimbi kwagh u dedoo a mi yô,Kwaghbo una kar hen ya u nan kera ga.+
14 Num hiin ngu er u bughun mngerem ian ér ma ande nahan;Cii ve ayôôso a hii yô, kar her kera.+
15 Or u nan ne iferor ishô kua or u nan ne orperapera ibo la,+—Ve cii mba Yehova kwagh u ndôhôrshima.
16 Aluer ibumeor ngu a gbenda u zuan a kwaghfan,Kpa gema ngu a ishima i lun a kwaghfan shon ga yô,Ka a inja sha nyi?+
17 Ijende i mimi i tesen dooshima hanma shighe cii,+Shi ngi anmgbian u i mar sha ci u ashighe a ican yô.+
18 Or u banen a mkav* ka nan zua uwegh a orShi nan lumun u ngohol nan uwegh sha ishigh ki or u wan ndor a nan.+
19 Or u soon ayôôso yô ka tindi u peren a doo nan ishima ye.+
Or u nan er hunda u nan u lu sha geng kpaa ka gbeev nan keren ye.+
20 Or u nan lu a ishima i ayomough* yô nana za ikyura ga,*+Shi or u nan ôron mimi ga kpaa nana gba ken mtim.
21 Or u nan mar ibumewan yô nana zua a ishimavihin;Ter u wan u nan a lu a mkav ga kpaa ka saan nan iyol ga.+
22 Ishima i saan saan ka icigh ki dedoo,*+Kpa iyolkpen yô ngi been or agee iyol.*+
23 Iferor ka nan ngohol inyaregh ki yamen ishô ken myerSha u nzughul a ijir.+
24 Mfe ngu sha ishigh ki orkavenkwagh jighilii,Kpa ashe a ibumeor yô ka a yenge a yem sha akighir a tar je.+
25 Ibumewan ka nan na ter u nan ijungwenShi nan na u a mar nan la ishimavihin.+
26 Doo u tsahan orperapera* ga,U gbidyen ior mba lun a icivir kpaa ka kwagh u shami ga.
27 Or u lun a mfe ka nan kôr nombor u nan tsaha,+Or u kaven kwagh kpaa ka nan gba ishima shimi.*+
28 Ibumeor je kpa aluer nan ngu ving yô a nenge ér nan ngu orfankwagh,Or u nan kusu zwa u nan kpaa a nenge ér nan ngu orkavenkwagh.
Ngeren mba shin kpe
^ Zwa Heberu, “ya u i lu nan iniav her.”
^ Shin “ape i lu ving.”
^ Shin “mbamaren.”
^ Shin “orcivirigh.”
^ Shin “Kwaghôron u dedoo.”
^ Shin “iwen i ka i na kwagh u or a doo ior.”
^ Zwa Heberu, “Or u nan cirin akaabo.”
^ Ka inyamkyume i i yer ken zwa Buter ér bear la.
^ Zwa Heberu, “Or u banen a ishima.”
^ Zwa Heberu, “nana zua a kwagh u dedoo ga.”
^ Shin “ishima i ifer.”
^ Shin “ka i bee angev.”
^ Shin “Kpa jijingi u uren yô uman akuhe.”
^ Shin “yan orperapera zwajirigh.”
^ Zwa Heberu, “jijingi u nan ka a lu ving.”
