Anzaakaa 28:1-28
28 Mbaaferev ka ve gbaa yevese tsô, or kpa nan zendan ve ga,Kpa mbaperapera yô mba cie kwagh ga er begha nahan.*+
2 Ken tar u tindi u peren* a lu yô,Ka i ngôôr ga tsô orhemen nan kar kera, ugen shi nan gba hemen,+Kpa sha iwasen i or u lun a mkav man mfe yô, orhemen nana lu gbem.+
3 Icanor u nan nyighen mbaatsanev yô,+Nan ngu er ura u u kua a kwaghyan kera cica nahan.
4 Mba ve undu tindi yô, ka ve wuese iferor,Kpa mba ve kuran tindi yô ishima ka i vihi ve a ve.+
5 Aferaior aa fatyô u kaven ijirôron i mimi ga,Kpa mba ve keren Yehova yô vea fatyô u kaven akaa cii.+
6 Guda icanor u nan zenden sha mimi u nanA ornyar u igbenda i nan i lu i mimi ga la.+
7 Wan u kaven kwagh nan kor tindi,Kpa or u nan lu ijende i mbahuav yô nana va ter u nan ahenge.+
8 Or u nan seer inyaregh ki nan sha u zuan a mtsera+ u sha mimi gaMan liba i karen ikyaa inya yô,Nan ngu kohol ki ka sha ci u or u nan eren a mbaatsanev doo doo la.+
9 Or u nan vendan u keghen ato a tindi yô—Msen u nan je kpa ka kwagh u ndôhôrshima.+
10 Or u nan lu meen or u mimi ér nana er iferkwagh cii,Nana hide a gba shin ihyungwa i nan iyol i nan,+Kpa mbamimi yô kwagh u dedoo una lu dyako ve.+
11 Ken ishima i ornyar yô nan ngu orfankwagh,+Kpa icanor u nan lu a mkav yô nana fa nan vindi vindi.+
12 Zum u mbaperapera ve hembe yô, icivir ka i lu kpishi,Kpa mbaaferev ka vea zua a tahav yô ior ve yer.+
13 Or u nan cirin akaabo a nan yô nana za ikyura ga,+Kpa or u nan pase a shi nan undu a yô, a zungwe nan mhôônom.+
14 Saan or u ka nan lu tsevaa hanma shighe* la iyol,Kpa or u nan cighir ishima yô nana gba ken ican.+
15 Iferor u nan hemen ior mba ve lu a kwagh u eren nan ga yô,Nan ngu er begha u tan kume man er biya* i i nure van sha or nahan.+
16 Orhemen u banen a mkav ka nan nzughul a tahav mbu nan,+Kpa or u mtsera u bo a vihi nan ishima yô nana seer ayange a uma u nan.+
17 Or u iboawambe i ker nan sha ci u nan wua or* yô,Nana zer yevese zan zan nana kar senen shin uwar.*+
Or môm nana de wasen nan ga.
18 Or u nan zenden a mshi shio yô a yima nan,+Kpa or u igbenda i nan i cimin yô nana ngôôr gban ga.+
19 Or u nan kahan utsa mba nan yô nana lu a kwaghyan kpishi,Kpa or u nan zendan agbilinakaa yô nana kungu ican.+
20 Orjighjigh nana zua a averen kpishi,+Kpa or u i torough nan iyol u hingir ornyar yô nana due iyolishô ga.+
21 Doo u sangen a sange sha dooshima ga;+Kpa alaghga or a er kwagh u kpeegh sha ci u anivur beredi.
22 Ka i torough oryuhwee* iyol u hingir ornyar,Ka nan kera fa er ibanave ia va ta sha a nan ga.
23 Or u nan kôôm orgen yô,+A va hemba soon kwagh u nan+A or u nan wuese or sha ikparashe la.
24 Or u nan ii ter u nan man ngô u nan,Kpa nan kaa ér, “Ka kwaghbo ga” yô,+Nan ngu ijende i or u van a mtim.+
25 Or u wan hua* nan ve a ayôôso,Kpa or u nan suur sha Yehova yô nana za ikyura.*+
26 Or u nan suur sha ishima i nan yô nan ngu ibumeor,+Kpa or u nan zenden sha kwaghfan yô nana war.+
27 Or u nan ne mbaatsanev kwagh yô, kwagh a ban nan ga,+Kpa or u nan gema ashe a nan hen a ve kera yô, a wa nan afan kpishi.
28 Mbaaferev ka vea zua a tahav yô ior ve yer,Kpa zum u ve kpe kera yô, mbaperapera ve seer ngeen.+
Ngeren mba shin kpe
^ Shin “er gumbegha nahan.”
^ Shin “ayôôso.”
^ Shin “u nan banen a mciem ga.”
^ Ka inyamkyume i i yer ken zwa Buter ér bear la.
^ Shin “nan haa awambe a or inya.”
^ Shin “shin ihyungwa; shin gema.”
^ Shin “or u wan hua.”
^ Shin a fatyô u kaan ér, “Or u taver inja.”
^ Zwa Heberu, “nana gba ikyôr.”
