Anzaakaa 25:1-28
25 Angan kpa ka anzaakaa a Solomon,+ a ior mba Hesekia+ tor u Yuda yange ve nger inya yô:
2 Icivir i Aôndo yô, ka u koson kwaghmyer,+Gema di icivir i utor yô, ka u tôvon sha ma kwagh.
3 Er usha ve tav sha, tar kpa u ze shimi nahan,Kape asema a utor kpaa a gande u tôvon fan la.
4 Kura atsaase a azurufa keraNahan una hingir wang.+
5 Kar a iferor sha ishigh ki tor kera,Nahan ikyônough nagh ki torough kia tile dông sha perapera.+
6 De tesen icivir you sha ishigh ki tor ga,+Shi de lu hen atô u ashagbaaior ga,+
7 Gadia guda u a̱ kaa a we ér, “Kôndo va heen,”A u a̱ hee u sha ishigh ki shagbaor la.+
8 De torough yemen a or ken ijir ga,Gadia aluer ken masejime orwanndor a we va hee u yô, u er nena?+
9 Kure kwagh u a zough u a orwanndor a we la vea nan,+Kpa de pasen kwaghmyer u i ôr u la ga,*+
10 Sha er or u nan lu ungwan la nana hee u gaShi u samber a ibaver i bo i* u va kera fatyô u hiden a mi ga la ga yô.
11 Mkaanem ma i ôr ma sha shighe vough yô,+Ma er atam a apu a zanaria, a i we shin agbande a azurufa nahan.*
12 Mkôôm u orfankwagh ngu ken tough ku or u ungwan kwaghEr abinkwini u sha zanaria man kwagh u hweegh u sha zanaria u wang nahan.+
13 Ortyom u jighjigh ngu hen mba ve tindi un laEr ka mndôhôr u senou sha iyange i sunda nahan,Gadia ka nan na i kundu orvesen u nan iyol.*+
14 Or u nan tan ave vanger a iyua i nan ne ga la* yôNan ngu er ibyeenegh man ahumbe a a ve a ura ga nahan.+
15 Ka sha ishimawan ka i ôr kwagh i kuma orhemen ken to ye,Shi nombor u legh legh kpaa ka u hembe kuhe.+
16 Aluer u zua a iyough yô, ya i er a kuma u di tsô,Sha ci u aluer u ya kpishi yô u sua i kera.+
17 Angahar a ou a de kumbur hen ya u orwanndor a we ga,Sha er a va due nan ishima a we, nahan kwagh wou una vihi nan ga yô.
18 Or u nan eren shiada u aiegh sha iyol i orwanndor a nan yôNan ngu er gbough ku nôngon ityav a mi man sanker man ivaan i horon nahan.+
19 U suur sha or u nan kuma u a na nan jighjigh ga* sha shighe u ican laNgu er inyigh ki tsever shin nguhar ku ndivir nahan.
20 Or u nan we or u ishima i vihi nan ker atsam yô,+Nan ngu er or u nan er ikyondo sha iyange i wuhegh nahanMan er or u nan haa viniger sha mtse yô.*
21 Aluer ijen kôr orhyom wou yô,* na nan kwaghyan nana ya;Aluer imura kôr nan yô, na nan mngerem nana ma,+
22 Nahan u lu haan nan akaausu a kpenger kpenger sha ityo,*+Nahan Yehova una ver u doo doo.
23 Ahumbe a ken imbusutarimese nga ve a zegeura,Nombor u eren anger kpaa ngu ve a ishigh ki vihin sha.+
24 Guda u teman sha zongough ku haav mbu iyoughoughA u lun hen ya môm vea kwase u zôhôn zwa.*+
25 Ibaver i dedoo i ken tar u icaaNgi er mngerem ma ndôhôr hen or u nan vôr nahan.+
26 Orperapera u nan lumun u dondon iferor yô,*Nan ngu er imbormnger i hundun man ijôr i saan ishe nahan.
27 Doo u yan iyough za karen ikyaa inya ga,+Shi ka kwagh u icivirigh u keren icivir you iyol you kpaa ga.+
28 Or u nan fetyô u kighir ishimanyoon i nan ga yô,*+Nan ngu er gar u lun a igyar ga, u i te ityav sha mi nahan.
Ngeren mba shin kpe
^ Shin “akaamyer a mbagen ga.”
^ Shin “anger a.”
^ Shin “ipelengi i sha azurfa nahan.”
^ Shin “i kundu uma u orvesen u nan iyol.”
^ Zwa Heberu, “iyua i icughugh.”
^ Shin a fatyô u kaan ér, “or u wan atseregh.”
^ Mtsem ma i ôr kwagh u ma heen ne, ka zarkwagh u yange a nungwa sha wain u angen ve a mbua hugh kpishi yô.
^ Zwa Heberu, “or u nan ker u ihyom yô.”
^ Ka u nôngon wer nana gba ishima shimi, shi nana hingir ishima legh legh je la.
^ Shin “kwase u wan ivever.”
^ Shin “nan de iferor i mee nan.” Zwa Heberu, “nan zende ze-ze-ze sha ishigh ki iferor yô.”
^ Shin “or u nan lu a tahav sha jijingi u nan ga yô.”
