Anzaakaa 31:1-31
31 Mkaanem ma Tor Lemuel, akaaôron a zan shimi a ngô na ôr un sha u tesen un la:+
2 Ka nyi m̱ ôr u we, wan wama?
Ka nyi, we wan u u dugh ken iyav av ne?
Shi ka nyi m̱ ôr u we, we wan u uiceghzwa av?+
3 De vihin agee a ou sha ukase ga,+Shi de dondon igbenda i i timin utor la kpaa ga.+
4 Wain doo sha ci u tor ga, Lemuel wam,Doo u utor vea maan wain ga,Shin u mbahemenev vea kaa ér,“Kwaghman wam ngu hana?”+ kpaa ga.
5 Sha er vea ma vea hungur a tindi,Nahan vea hingir u za nzughul a ijir i mbaatsanev ga yô.
6 Na mba ve lu timin la msôrom ma taver,*+Mba ve ure kpishi la kpaa na ve wain.+
7 Ve̱ ma ve hungur ibanave ve;Ve de kera umbur mbamzeyol vev ga.
8 Bugh zwa ôr kwagh sha ci u mba ve lamen ga la;Nôngo kwagh sha ci u mba ve lu timin la kpaa.+
9 Bugh zwa ôr ijir sha perapera;Nôngo kwagh sha ci u* mbaibanave man mbaatsanev.+
א [Alefa]
10 Ka an nana fatyô u zuan a kwase u injaa?*+
A gba kwagh hemba awen a korali* ica je.
ב [Beti]
11 Nom na na un jighjigh a ishima na i môm,Kwagh môm u injaa ban nom na ga.
ג [Gimel]
12 Kwase na ka a er a na doo doo, eren un kwagh u vihin ga,Ken ayange a uma na cii.
ד [Daleti]
13 Ka a za zua a aive man mou;Ka i saan un iyol u eren tom sha ave a na.+
ה [He]
14 Ngu er ka utso mba mbakasuav nahan,+Ka a va a kwaghyan na ica je.
ו [Woo]
15 Ka a nder er sev mbu lu a wanger ga la je,A na ya na kwaghyanShi a na ikpan na i ukase ci ve.+
ז [Sayin]
16 Ka a ver ishima sha sule ugen, shi a yam u;Ka a lôô sule u wain sha iusa na.*
ח [Heti]
17 Ka a wa iyol u eren tom u taver,+Shi a taver ave a na kpaa.
ט [Teti]
18 Ka a nenge er kasua na a lu van un a mtsera yô;Imenger na i pirin tugh ga.
י [Yodi]
19 Ave a na ka a kôr gura,Shi akevaveegh a na a kôr majir.*+
כ [Kafi]
20 Ka a naregh akevaveegh a na hen oribanave,Shi a bugh ave a na hen icanor kpaa.+
ל [Lamedi]
21 Ishima ze un iyol sha kwagh u mba hen ya na hen shighe u senou ga,Gadia mba hen ya na cii mba a akondo a wuhegh.*
מ [Mem]
22 Ka a tume akondo a taren sha gambe na iyol na.
Akondo a na ka a sha mou u dedoo man a sha mou u nyian dindee.
נ [Nun]
23 I fa nom na hen ihindagar tsembelee,+Hen ape a teman vea mbatamen mba hen tar la imôngo la.
ס [Sameki]
24 Ka a er akondo sha mou u dedoo* a tee,Shi a teen mbakasuav ikyange.
ע [Ayin]
25 A haa agee man icivir iyol er ka ikyondo nahan,Ishima te un kwe sha kwagh u ken hemen ga.*
פ [Pe]
26 Ka a bugh zwa na sha kwaghfan;+Tindi u erdoo* ngu un sha nombor.
צ [Tsade]
27 Ka a nenge sha tom u hen ya na tsembelee,Ye kwaghyan u hweev ga.+
ק [Kofi]
28 Ônov nav ka ve mough sha ve wuese un;Nom na kpaa ka a mough a wuese un.
ר [Reshi]
29 Kasev mba injaav* mba kpishi,Kpa we u hemba ve cii.
ש [Shin]
30 Kumashe a fatyô u lun icugh, dooashe kpa una fatyô u karen kera,*+Kpa kwase u nan cie Yehova yô, ka nan a wuese nan ye.+
ת [Towi]
31 Na nan injar i tom u nan er la,*+Shi ityom i nan i̱ wuese nan sha ihindagar.+
Ngeren mba shin kpe
^ Shin “ikyôhô.”
^ Shin “Ôr ijir i.”
^ Nenge Ngeren u Pasen Asember.
^ Shin “kwase u dedoo?”
^ Shin “sha inyaregh nagh.” Zwa Heberu, “sha atam a ave a na.”
^ Gura man majir ka akaa a i te mou a mi yô.
^ Zwa Heberu, “akondo ahar ahar.”
^ Shin “akondo a huan ken atô.”
^ Shin “Ishima ze un iyol sha kwagh u kper ga.”
^ Shin “Ityesen i sha dooshima; Tindi u dooshima u been ga.”
^ Shin “mba dedoo.”
^ Shin “una fatyô u lun gbilinkwagh.”
^ Zwa Heberu, “na nan atam a ave a nan.”
