Anzaakaa 10:1-32
10 Anzaakaa a Solomon.+
Wan u fan kwagh ka nan na ter u nan iember,+Kpa ibumewan yô, ka nan na ngô u nan ijungwen.
2 Inyaregh ki i zough a mi sha ifer i eren yô, kia lu a inja ga,Kpa perapera yô, yiman or ken ku.+
3 Yehova una de ér orperapera nana lu ijen ga,+Kpa mbaaferev yô, una nyume ve kwagh u a sar ve la.
4 Ave a shirin a shir aa va a ibanave,+Kpa ave a eren tom taveraa yô, nga ve a inyaregh.+
5 Wan u fan kwagh ka nan kohol iyiav sha shighe u sunda,Kpa wan u eren kwagh u kunya yô, ka nan yaven a yav sha shighe u sunda.+
6 Averen nga sha ityough ki orperapera,+Kpa zwa u iferor yô, ka u yeren tswam.
7 Ka a̱ umbur kwagh u* orperapera yô, i lu u a ver nan doo doo,+Kpa iti i mbaaferev yô, ia saa ishe.+
8 Or u lun a ishima i fan kwagh yô, nana lumun kwaghwan,*+Kpa or u lamen sha ibume yô, a ndyar nan angahar.+
9 Or u nan zenden sha mimi yô, nana zende bem bem,+Kpa or u igbenda i nan i cimin yô, a va kôr nan a mi.+
10 Or u kamen ishe sha ayom nan ne ijungwen,+Shi or u lamen sha ibume kpaa, a ndyar nan angahar.+
11 Zwa u orperapera ka imbor i uma,+Kpa zwa u iferor yô, ka u yeren tswam.+
12 Ihyom nderen ayongo,Kpa dooshima yô cirin akaabo cii.+
13 Mba zough a kwaghfan sha zwa u orkavenkwagh,+Kpa i ver akpa sha ci u ijime i or u nan ban a mkav* la.+
14 Mbafankwagh ka ve koso mfe,+Kpa zwa u ibumeor yô ngu ve a mtim.+
15 Inyaregh ki* zegeor ka gar u nan u taver.
Kpa mtim u mbaatsanev yô, ka ibanave ve.+
16 Ityom i orperapera ngi ne uma;Kpa atam a iferor yô, nga ne isholibo.+
17 Or u nan lumun tsaha yô, nan ngu gbenda u uma,*Kpa or u nan vende mkôôm yô, ka nan tsume a mbagenev.
18 Or u nan yer ihyom i nan yô, nan ngu eren aie,+Shi or u nan samber a anger* kpaa nan ngu ibumeor.
19 Zum u akaaôron a lu kpishi yô, kwaghbo banen sha mi ga,+Kpa or u nan kôron zwa u nan tsaha yô, nan eren kwagh sha kwaghfan.+
20 Nombor u orperapera ngu er azurufa u hemban doon cii nahan,+Kpa ishima i iferor yô, i gba ishe ga.
21 Zwa u orperapera ka u koso* ior kpishi,+Kpa ibumeor yô, ka nan kpe sha ci u mban u mkav.+
22 Ka iveren i Yehova i ne or nan lun yôughyôugh ye,+Seer ma mnyoon* sha mi ga.
23 Ibumeor yô, ieren i kunya ngi nan er ka anumbe a eren nahan,Kpa orkavenkwagh yô, kwaghfan ngu sha ci u nan.+
24 Kwagh u iferor nan cie la, shi ka un je una tser nan ye;Kpa mbaperapera yô, a na ve kwagh u a sar ve la.+
25 Zum u uraahumbe ua kar kera yô, iferor nana kera lu ga,+Kpa orperapera yô, nan ngu imaagh ki tsôron.+
26 Er viniger ka a ange anyi, shi mnyim ma nyôr ken ashe nahan,Kape oruhwe kpaa, nan lu hen or u nan tindi nan la.*
27 Mcie u cian Yehova seer ayange,+Kpa anyom a mbaaferev yô, a pande a kera.+
28 Ishimaverenkeghen i mbaperapera i ne iember,+Kpa ishimaverenkeghen i mbaaferev yô, ia saa ishe.+
29 Gbenda u Yehova ka garutya u orishôôgh,+Kpa gema ka mtim u aferaior.+
30 A tenger a mbaperapera mayange ga,+Kpa mbaaferev yô, vea kera lu sha tar ga.+
31 Zwa u orperapera ngu duen* a kwaghfan,Kpa nombor u injaa ga yô, a tôndo u kera.
32 Zwa u orperapera fa kwagh u a doo u ungwan yô,Kpa zwa u iferor yô, ngu er kwagh u dang.
