Anzaakaa 1:1-33
1 Anzaakaa a Solomon,+ wan u Davidi,+ tor u Iserael:+
2 Sha u henen* kwaghfan+ shi ngohol ityesen;Man u kaven akaaôron a sha kwaghfan;
3 Sha u ngohol ityesen+ i i ne mkav,Shi i wasen or u eren kwagh u perapera,+ man u vough*+ man u mimi* la;
4 Sha u tesen orlanenkwagh u eren kwagh sha inja;+Shi tesen gumor mfe, man u henen kwagh sha inja.+
5 Orfankwagh ka nan kegh ato, nan seer zuan a kwaghwan;+Orkavenkwagh kpa ka nan fa kwaghwan tsembelee+
6 Sha u kaven injakwagh man kwaghôron u cimin,Kua mkaanem ma mbafankwagh man ukikya vev.+
7 Mcie u cian* Yehova ka mhii u mfe.+
Ka abumeaior tseegh a vende kwaghfan kua ityesen ye.+
8 Wan wam, ungwan ityesen i teru,+Shi kwaghwan* u ngôu kpaa, de te un kera ga.+
9 Gadia ka kwagh u hweegh u sha ityough you+Kua ishiligh ku dedoo sha mon wou kpaa.+
10 Wan wam, aluer mbaasorabo mee u yô, de lumun ga.+
11 Vea kaa a we ér: “Va vea vese.
Se za yer sha gbenda sha u haan awambe inya.
Se var inya, se keghen or u ishôôgh a ityôkyaa shio.
12 Se mena ve uma er ka Uwar* nahan,Se mena ve jimin er ka mba ve senen shin ihyungwa yô.
13 Se kura akaa a ve a injaa cii;Se iv uya asev a ishar.
14 Va kohol se,*Nahan se cii se kar kwagh u se ii la kwaghmôm.”*
15 Wan wam, de dondon ve ga,Angahar a ou a palegh gbenda ve.+
16 Gadia angahar a ve nga ze ayem u za eren ifer;Ka ve torough sha u za haan awambe inya.+
17 U hônon kper sha ashe a inyon bong la ka gbilinkwagh.
18 Ka nahan ve ka ve yer ve keghen sha u haan awambe inya ye;Ka ve var inya, ve yer sha u wuan uuma mba iorov.
19 Ka igbenda i mba ve keren mtsera u aiegh je ne,Ia bee a uma u mba ve zough a mi la kera.+
20 Kwaghfan u mimi+ ngu genger imo sha godobi.+
Ngu kaan imo taver taver ken ityembegar.+
21 Ngu yôôn kwagh sha akahar a igbenda,* ape ior ve karen kpishi yô.
Ngu kaan hen ihindagar ér:+
22 “Ne mba banen a mkav,Ka hanma shighe je man mban u mkav una de u doon ne ishima?
Ne mba nahan tar, ka hanma shighe je man tarnahan ua de u doon ne?
Man ka hanma shighe je ne mba lanen kwagh ne de u kôron mfe ihyomo?+
23 Wa nen ikyo sha mkôôm wam.*+
Nahan me haa ne jijingi wam;Me pase ne akaaôron a am.+
24 Sha ci u m lu yilan ne, kpa ne lu vendan,M dugh ave a am, kpa mô wen môm wa ikyo her ga.+
25 Kwaghwan wam cii kwagh gba ne sha mi ga,Shi ne lu vendan mkôôm wam kpaa.
26 Nahan, mo kpaa me se ne zum u kwagh a tser ne yô;Me naha ne tar zum u kwagh u ne cie la una va yô,+
27 Zum u kwagh u ne cie la una va er ka uraahumbe,Man kwaghtseren kpaa, una va sha a ven er ka ijeverahumbe,Zum u ican man zayol a tser ne la.
28 Zum la vea yilam kpa me bugh zwa ga;Vea kerem sha gbashima, kpa vea zua a mo ga,+
29 Sha ci u ve kôr mfe ihyom,+Ve tsua mcie u cian Yehova ga.+
30 Ve venda kwaghwan wam;Mkôôm wam cii kpaa, ve laha un.
31 Nahan vea zua a kwagh u ve keren la,*+Shi vea ide sha mbamhen vev.*
32 Gadia lanegh ku mba banen a mkav ku a wua ve,Shi ishar i haan iyol i abumeaior kpaa, ia tim ve.
33 Kpa or u nan keghen ato a mo yô nana tema bem bem+Shi nana cia kwaghtseren ga.”+
Ngeren mba shin kpe
^ Zwa Heberu, “Sha u fan.”
^ Shin “kwagh u shami.”
^ Shin “kwagh u dedoo.”
^ Shin “Icivir i nan.”
^ Shin “tindi.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “Nahan ikpa (ikpanyar) yase ia lu i môm.”
^ Shin “Va er ishor vea vese imongo.”
^ Zwa Heberu, “ityough ki godobi.”
^ Shin “De nômbon nen ikyôr ga.”
^ Zwa Heberu, “vea ya atam a igbenda ve.”
^ Shin “sha ayom a ve.”
