Anzaakaa 12:1-28
12 Or u tsaha u doo nan ishima yô, ka mfe je a doo nan ye,+Kpa or u nan kôr mkôôm ihyom yô, nan fa kwagh ga.*+
2 Or u dedoo yô Yehova ka a lumun nan,Kpa or u eren ayom a ifer yô, ka A venda nan shia shia.+
3 Or môm nana fatyô u taver sha ifer i eren ga,+Kpa orperapera yô, a wuhe nan kera mayange ga.
4 Kwase u injaa ka idyer i nom u nan i icivirigh,+Kpa kwase u eren kwagh u kunya yô,Nan ngu nom u nan kwagh u hôôn ken akuhe.+
5 Mbamhen mba mbaperapera ka mba vough,Kpa kwaghwan u aferaior yô, ka u icughugh.
6 Akaaôron a aferaior ka a yer a keghen sha u haan awambe inya,+Kpa zwa u mbamimi yô, ka u yima ve.+
7 Ka a tim aferaior kera yô, a kera lu ga,Kpa ya u orperapera yô, una lu her taveraa.+
8 Ka i wuese or sha kwaghfan u ken zwa u nan,+Kpa or u ishima i nan i cimin yô, a laha nan.+
9 Guda u lun a icivir kpishi ga kpa lun a or u shiren we,A u kenden a iyol sha kpa geman lun a kwaghyan* ga la.+
10 Orperapera ka nan nengen sha ilev mbi nan doo doo,*+Kpa mhôônom ma zungwen ma iferor yô, ka tswam.
11 Or u nan kaha tsa u nan yô, nana lu a kwaghyan a kuma nan,+Kpa or u nan zendan ugbilinmbaakaav yô, nan ban a mkav.*
12 Iferor ka nan tômon kwagh u aferaior agen a kôr yô,Kpa mise u orperapera yô, ngu umen atam.
13 Kwaghôron u ifer u orbo ka a hide a hôn nan a dugh,+Kpa orperapera yô ka nan war ican.
14 Atam a iliam i or* ka a iv nan a akaa a dedoo,+Shi tom u ave a nan kpaa, ua va nan a injar.
15 Sha mnenge u ibumeor yô, gbenda u nan ngu vough,+Kpa orfankwagh yô, nan lumun kwaghwan.+
16 Ibumeor ka nan tese ishimavihin i nan fele,*+Kpa orfankwagh yô, nan we ilyahan ikyo ga.*
17 Or u nan eren shiada u mimi yô, nana ôr kwagh u mimi,*Kpa orshiada u aiegh yô, nan er kwagh u aiegh.
18 Kwaghôron u gagher ngu er mkuma u sanker nahan,Kpa nombor u orfankwagh yô, ngu ne mkpeyol.+
19 Zwa u ôron kwagh u mimi ua lu gbem sha won,+Kpa nombor u aiegh yô, ua lu sha anshighe kpuaa di tsô.+
20 Icugh ngi ken ishima i mba keren zayol,Kpa mba keren bem yô,* vea ember.+
21 Kwaghbo môm una tser orperapera ga,+Kpa mbaaferev yô, ican a tser ve kpishi.+
22 Zwa u eren aie ndôhôr Yehova ishima,+Kpa mba ve eren kwagh sha mimi yô, ka ve na i saan un iyol.
23 Orfankwagh ka nan yer kwagh u nan fe la,Kpa ishima i ibumeor yô, ka i yôôn ibumegh ki nan.+
24 Ave a mba eren tom kpoghuloo aa ya tor,+Kpa ave a shirin a shir yô, a kighir a a tom.+
25 Ishimanyian ka i na or nan ure,+Kpa kwaghôron u dedoo ka a na nan saan.+
26 Orperapera ka nan ker ijiir i ilev mbi nan yan toho,Kpa gbenda u mbaaferev yô ka u tsume a ve.
27 Oruhwe yaren ikyôr zendan swase ga,+Kpa u veren ishima eren tom kpoghuloo yô,Ka kwagh u injaa hen or.
28 Gbenda u perapera ngu ze ken uma,+Ku ngu sha u ga.
Ngeren mba shin kpe
^ Shin “nan ngu ibumeor.”
^ Zwa Heberu, “beredi.”
^ Shin “nan wa uma u zendenya u nan ikyo.”
^ Zwa Heberu, “nan ban a ishima.”
^ Zwa Heberu, “zwa u or.”
^ Shin “sha iyange la je.”
^ Zwa Heberu, “nan cirin ilyahan.”
^ Zwa Heberu, “kwagh u perapera.”
^ Zwa Heberu, “mba kwaghwan ve a van a bem yô.”
