Anzaakaa 15:1-33
15 Imo i legh legh* ngi bundu ishimanyoon,+Kpa kwaghôron u sha tswam* yô, nderen ishimavihin.+
2 Nombor u orfankwagh ka u eren kwagh a mfe sha inja,+Kpa zwa u ibumeor yô ka u pasen ibumegh.
3 Ashe a Yehova nga hanma ijiir cii,Nga kenger ior mba bov man mba dedoo cii.+
4 Nombor u bem* ka kon u uma je,+Kpa kwaghôron u cimin yô, ne iuren.
5 Ibumeor ka nan laha tsaha u ter u nan,+Kpa orfankwagh yô, ka nan lumun mkôôm.+
6 Ya u perapera ka a lu a akaainjaa kpishi,Kpa akaa a iferor a zuan a mi la yô, ka a gbihi nan ken zayol.+
7 Zwa u orfankwagh ka u samber a mfe,+Kpa ishima i ibumeor yô i eren nahan ga.+
8 Nagh ku mbaaferev ka kwagh u ndôhôr Yehova ishima,+Kpa msen u mbaperapera yô, ka kwagh u nan un iember.+
9 Igbenda i iferor ndôhôr Yehova ishima,+Kpa or u nan zende perapera ityô yô, nan doo un ishima.+
10 Tsaha ka u lu or u nan undu gbenda la er ka kwagh u vihin* nahan,+Kpa or u nan ker tsaha ihyom cii nana kpe.+
11 Uwar* man ijiir i mtim* je kpa mba sha ishigh ki Yehova tseer tseer,+Man hide asema a ior yee?+
12 Orpuunakaa nan soon kwagh u or u kôôm nan la ga,+Nana lumun u pinen orfankwagh mhen ga.+
13 Ishima i saan saan ka i na ishigh ki saan sha,Kpa ishima i vihin yô, i ne iuren.+
14 Ishima i kaven kwagh ka i keren mfe,+Kpa zwa u ibumeor yô ka u zendan* ibumegh.+
15 Ayange a or u yan ican cii ka a bo,+Kpa or u nan lu a ishima i saan saan* yô, ka nan yaan iniongo gbem.+
16 Guda u lun a kwagh kpuaa kpa geman cian Yehova,+A u lun a inyaregh kpishi kua ishimanyian.*+
17 Guda u yan ikyaiue ape dooshima a lu,+A u yan bua u kehen dindim dindim ape ihyom i lu la.+
18 Or u nyoon ishima kpishi nan ve a ayôôso,+Kpa or u vihin ishima fefa ga yô, ka nan bunde zwazôhôn.+
19 Gbenda u oruhwe ngu er ka igyar i sha saa nahan,+Kpa gbenda u orperapera yô ngu er ka igbudu i vaanaan yô.+
20 Wan u fan kwagh ka nan na ter u nan iember,+Kpa ibumeor yô, ka nan laha ngô u nan.+
21 Hen or u banen a mkav* yô, ibumegh ka kwagh u nan nan iember,+Kpa or u lun a mkav yô, ka nan zenden jighilii.+
22 Idyu i tumen ka ia lu ga yô, mbaawashima ve saa ishe,Kpa mbawasenmhen ka vea lu kpishi yô, i kôrcio u eren kwagh.+
23 Ka i saan or iyol zum u nan ne mlumun u vough sha kwagh yô,*+Kwaghôron u sha shighe vough ka a doo tsô!+
24 Or u lun a mkav nan ngu sha gbenda u uma u u kôndo sha yô,+Sha u palegh nan a Uwar* u u lu shin inya la.+
25 Yehova una yôhôr ya u ormoronyol,+Kpa una kura akighir a kwasecôghol.+
26 Ayom a iferor ndôhôr Yehova ishima,+Kpa akaaôron a dedoo yô ka Un kwagh u wang.+
27 Or u nan ye mtsera u sha anyighe yô, nan ngu van a kwaghtseren* sha ya u nan,+Kpa or u nan kôr inyaregh ki yamen ishô ihyom yô nana lu uma her.+
28 Ishima i orperapera ka i hen sha kwagh u ia ôr yô,*+Kpa zwa u iferor yô, ka u gbaa ôron akaabo tsô.
29 Yehova ngu ica a aferaior,Kpa ongo msen u mbaperapera.+
30 Ashe a wanger* nga ne ishima iember;Loho u dedoo kpaa ngu taver akuhe.*+
31 Or u nan keghen ato a mkôôm u nan uma yô,Nan ngu vea mbafankwagh imôngo.+
32 Or u nan lu vendan tsaha yô,Ka uma u nan je nan lu vendan ye,+Kpa or u nan keghen ato a mkôôm yô nan zough a kwaghfan.*+
33 Mcie u cian Yehova ka a tese or kwaghfan,+Shi iyol hiden a mi ijime ngi ve a icivir.+
Ngeren mba shin kpe
^ Shin “u sôôn iyol.”
^ Shin “Imo i kundu kundu.”
^ Shin “Nombor u legh legh.”
^ Shin “kwagh u nyoon tsung.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “Abadon.”
^ Zwa Heberu, “ka u yaan.”
^ Shin “ishima i dedoo.”
^ Shin “kpa geman fan kwagh u u lu sha mi ga la.”
^ Zwa Heberu, “or u banen a ishima.”
^ Zwa Heberu, “zum u zwa u nan u ne ikyar i vough yô.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “ihyeen.”
^ Shin “i hen tsembelee man i na imo ye; i hen cii ve i ôr kwagh ye.”
^ Zwa Heberu, “ngu kehen akuhe.”
^ Shin “Ashe a kpen ikyôr.”
^ Zwa Heberu, “nan zough a ishima.”
