Kroniku u sha Uhar 9:1-31
9 Hen shighe ne, torkwase u Sheba+ ungwa gwa u Solomon, nahan a va ken Yerusalem u va pinen Solomon mbampin* mba taver sha u karen un. Mbatomov* kpishi dondo un ijime, a va a urakumi mba ve tôô mkurem ma balsam man zanaria kpishi+ man awen a injaa yô. A nyôr a za lam a Solomon sha hanma kwagh u lu un ken ishima cii.+
2 Tsô Solomon na un mlumun sha mbampin nav cii. Kwagh môm taver* Solomon gande u pasen un ga.
3 Torkwase u Sheba nengen kwaghfan u Solomon+ man ya u maa la,+
4 man kwaghyan u sha tebul na+ man gbenda u mbatomov nav teman la, man er ior nav mbanan kwaghyan karen kwaghyan sha tebul la, kua iyolwuhan ve man ior nav mbatoon kwaghman kua iyolwuhan ve, man iniav nav mbi nanden mbi naan hanma shighe hen iyou i Yehova la yô,+ kpiligh un iyol saa her.
5 Nahan a kaa a tor ér: “Kwagh u yange m ungwa ken tar wam sha kwagh u akaa a u er,* man sha kwagh u kwaghfan wou la ka mimi.
6 Kpa m na jighjigh a akaa a m ungwa la ga, zan zan m va m va nenge a mi sha ashe a am.+ Man m va nenge yô, yange i ôrom kwagh u kwaghfan u u lu a mi kpishi la+ cuku tsô kpaa ga. Kwagh u m nenge a mi ne hemba kwagh u yange m ungwa la yem zende zende.+
7 Saan ior ou iyol, kua mbatomov ou mba ve tilen sha ishigh you hanma shighe, ve ungwan kwaghfan wou la!
8 I wuese Yehova Aôndo wou, un u i doo un a we, nahan a pende u sha ikyônough nagh ki torough, u tem tor sha ci u Yehova Aôndo wou la. Er ior i Iserael ve doo Aôndo wou ishima,+ a soo ér ve lu her gbem yô, a tsua u ér u lu tor ve, u ôron ijir sha mimi shi u hemen sha perapera.”
9 Tsô a na tor zanaria utalenti* 120,+ shi a na un mkurem ma balsam kpishi kua awen a injaa. Mayange or shi kera va a mkurem ma balsam imba er ma torkwase u Sheba na Tor Solomon la ga.+
10 Heela tseegh ga, lu mbatomov mba Hiram man mbatomov mba Solomon mba ve tôô zanaria hen Ofir+ ve va a mi la shi ve va a ikyon i algum man awen a injaa ye.+
11 Tor gema ikyon i algum la er akaa a unden sha iyou i Yehova+ man sha iyou i tor*+ kua mbaadiguve man akaa a kuhwan a lun a ikyar sha ci u mbawanatsam.+ I gbe je i lu a nenge a ikyon imba la nahan ken tar u Yuda ga.
12 Tor Solomon kpa na torkwase u Sheba hanma kwagh u sar un shi sôn cii, hemba* kwagh u va na tor la. Tsô a hide a yem ken tar na vea mbatomov nav imôngo.+
13 Nahan zanaria u i va Solomon a mi ken inyom i môm la yuhwa kuma utalenti mba zanaria 666,+
14 i wa zanaria man azurufa u mbazendenkasua man mbaerenkpenga kua utor mba Arabia man ugomna mba tar la cii, lu van a mi hen Solomon la ker ga.+
15 Tor Solomon er ipyerutya i vesen 200 sha zanaria u i nungwa iyôgh sha mi yô,+ (lu zanaria u i nungwa iyôgh sha mi yô ushekel* 600, i tôô i er hanma perutya ye)+
16 man ipyerutya i kiriki* 300 i i er sha zanaria u i nungwa iyôgh sha mi yô (lu zanaria umina* utar, i tôô i er hanma perutya u kiriki ne a mi ye). Tor maa ver i ken Iyou i Ikyô i Lebanon la.+
17 Tor shi er ikyônough ki torough ki zegenan sha anyi a nortar, cir ki zanaria u wang iyol.+
18 I er angahar ataratar a unden zan hen ikyônough ki torough kira, shi kwagh u pendan angahar u i er un sha zanaria yô zua a ikyônough kira; ki lu a ave keen man keen, i gema i er ubegha uhar+ tile ken akpe a ave a ikyônough kira keen man keen.
19 Shi i er ubegha 12+ tile sha angahar a unden a ataratar la; hanma nguhar ku unden yô, ubegha uhar tile her keen man keen, sha angahar a ataratar la cii. Ma tartor ugen lu a vande eren ikyônough ki torough er kin nahan ga.
20 I er ukôôpu mba man kwagh a mi mba Tor Solomon cii sha zanaria, shi i er ikyav mbi Iyou i Ikyô i Lebanon la cii sha zanaria u wang. I er kwagh môm sha azurufa ga, sha ci u sha ayange a Solomon la i nengen ér azurufa gba kwagh ga.+
21 Tor lu a utso mba ve zaan ken Tarshishi yô;+ lu mbatomov mba Hiram+ nahan ve ye. Utso mba Tarshishi ve wa zanaria man azurufa man anyi a nortar+ man mbaambo kua upikôku,* ve va a mi kwa môm ken atô u anyom atar.
22 Nahan Tor Solomon hemba utor mbagenev cii sha tar inyaregh man kwaghfan.+
23 Shi utor mba sha tar cii ve soo u van hen* Solomon, sha u vea ungwa kwaghfan u Aôndo u mimi na un la yô.+
24 Hanma ve nan vaan a iyua, ka ikyav mbi sha azurufa man ikyav mbi sha zanaria man akondo+ man ikyav mbi utyaav, man mkurem ma balsam man anyinya kua mbaalfadari* je la; i vaan a uiyua mban nahan hanma inyom.
25 Shi Solomon lu a ayouanyinya 4,000 sha ci u anyinya a na, man akekeautya man anyinya* 12,000;+ a ver ve ken agar a akekeautya man ikyua a tor ken Yerusalem.+
26 A hemen utor mbara cii, hii hen Ifi* la zan zan nyôr hen tar u Mbafiliti man ikighirtar i Igipiti.+
27 Tor er azurufa ngee ken Yerusalem er awen nahan, shi a er ikyon i sedar ngee kpishi er ikyon i sikamor* i ken Shefela nahan.+
28 Lu ken Igipiti man ken ityar igen la cii, ve va Solomon a anyinya ye.+
29 Akaa agen ken yiase i Solomon cii,+ ken mhii zan zan mkur, i nger ken akaaôron a profeti Natan,+ man ken kwaghôron u profeti Ahiya+ Orshilo, kua ken mbampase mba sha mnenge mba Ido,+ ornengenmbampase nger sha kwagh u Yeroboam,+ wan u Nebati la.
30 Solomon tema tor sha Iserael cii ken Yerusalem anyom 40.
31 Tsô Solomon kpe, i ii un vea uter nav, nahan ve ii un ken Gar u ter na Davidi;+ maa wan na Rehoboam kar tema tor sha ityough nagh.+
Ngeren mba shin kpe
^ Shin “ior.”
^ Shin “tan Solomon ukikya.”
^ Zwa Heberu, “kwagh môm lu myer hen.”
^ Shin “akaaôron a ou.”
^ Talenti môm yange a lu ukilogeram 34.2. Nenge Ngeren u Seer u B14 la.
^ Shin “ya u tor.”
^ Shin a fatyô u kaan ér, “seer sha uiyua mba ve kuma sha.”
^ Shekel môm yange a lu ukilogeram 11.4. Nenge Ngeren u Seer u B14 la.
^ Perutya u kiriki, u ashighe kpishi mbakerenavaan ve lu a mi la.
^ Mina u i ter kwagh na ken Ruamabera u ken zwa Heberu ne, yange a lu ugeram 570. Nenge Ngeren u Seer u B14 la.
^ Annyon u lun a ukala mba doon tsung, u lun er tôki nahan. Ka i yila annyon ne ken zwa Buter ér peacock.
^ Zwa Heberu, “ve soo u nengen a ishigh ki.”
^ Alfadari ka wan u jaki i unde nyinya a mar yô.
^ Shin “mbahendananyinya.”
^ Ka Uferati je la.
^ U kpa ka kon u tur.
