Kroniku u sha Uhar 6:1-42
6 Hen shighe la, Solomon ôr ér: “Yehova kaa ér una lu ken angôghime.+
2 Hegen yô, m maa iyou i taven i doon tsung sha ci wou m bee, ka ijiir i u lu her gbem sha won yô.”+
3 Tor maa gema ishigh na sha nongoior u Iserael cii, gba veren u doo doo; nongoior u Iserael gema tile lu ungwan.+
4 A kaa ér: “I wuese Yehova Aôndo u Iserael, un u yange tôndo zwa a terem Davidi iyol na, shi a kur kwagh ne sha uwegh nagh la; yange kaa ér,
5 ‘Hii sha iyange i m due a ior av ken tar u Igipiti la je, m ngu a tsua gar môm ken uipyaven mba Iserael cii, u a maa iyou sha u nan iti yam icivir her ga,+ shi m tsua or môm mer nana hemen ior av Iserael ga.
6 Kpa m tsua Yerusalem+ mer iti yam i lu her, shi m tsua Davidi mer a hemen ior av Iserael.’+
7 Yange sar terem Davidi u maan iyou sha ci u iti i Yehova Aôndo u Iserael.+
8 Kpa Yehova kaa a terem Davidi ér, ‘Yange sar u u maan iyou sha ci u iti yam, man doo er sar u u eren kwagh ne yô.
9 Nahan kpa, ka we u maa iyou la ga, ka wan u a mar u* la una maa iyou sha ci u iti yam ye.’+
10 Yehova kure ityendezwa i yange er la, sha ci u m kar m tile sha ityough ki terem Davidi, m tema sha ikyônough ki torough ki Iserael+ vough er Yehova yange tôndo zwa nahan.+ Shi m maa iyou sha ci u iti i Yehova Aôndo u Iserael,
11 shi ka ker m ver Areki u a lu a ikyur+ i Yehova ya a ior i Iserael la ye.”
12 Tsô a tile sha ishigh ki atse a nan nagh a Yehova, sha ishigh ki nongoior u Iserael cii, a kende ave sha.+
13 (Gadia Solomon er tsembe u sha togula ver hen atô u tembe* la.+ Tsembe ne lihe aseva* ataan, gbanger aseva ataan, gema tav aseva atar; maa a tile sha mi.) A gure sha ishigh ki nongoior u Iserael cii, a kende ave sha,+
14 maa a kaa ér: “We Yehova Aôndo u Iserael, Aôndo ugen ngu er we nahan sha shin, shin tar kpaa ga, we u u kuren ikyuryan shi u tesen mbacivir we dooshima tsung, ve mba ve zenden sha ishigh you a ishima ve cii la.+
15 U kure ityendezwa i yange u er a wanye wou Davidi terem la.+ Yange u er ityendezwa la sha zwa wou shi sha iyange ne u kure i sha uwegh ough.+
16 Hegen yô, we Yehova Aôndo u Iserael, kure ityendezwa i u er a wanye wou terem Davidi shighe u u kaa wer: ‘Aluer ônov ou ver ishima sha gbenda ve, mba zenden sha tindi wam+ vough er u zende sha ishigh yagh nahan yô,+ mayange or nana ban hen tsombor wou u nana tema sha ikyônough ki torough ki Iserael ga’ la.
17 Man hegen yô, Yehova Aôndo u Iserael, ityendezwa i yange u er a wanye wou Davidi la i̱ kure sha mi.
18 “Kpa mimi je Aôndo una tema vea uumace shin tara?+ Nenge! Usha, een, sha u usha la je kpa, kehe kuma u u tema ken a ve ga;+ man hide anyou u cuku u m maa ne ve, u tema ker yee?+
19 Hegen yô, ungwa msen u wanye wou shi zungwe un mhôônom er a sen u nahan, we Yehova Aôndo wam, shi ungwa mliam ma wanye wou a lu vaan ér we u wase un la man msen u a lu eren sha ishigh you ne.
20 Shi ver ashe a ou sha iyou ne atetan man tugh, sha ijiir i yange u kaa wer u ver iti you her,+ u ungwan msen u wanye wou una ver ishigh hen ijiir ne una er la.
21 Shi ungwa uzamber mba wanye wou, una zamber we ér we u wasen un la, kua uzamber mba ior ou Iserael shighe u vea ver ishigh hen ijiir ne vea er msen la,+ nahan ma u ongo sha ijiir you i teman sha la;+ een, ma u ongo shi ma u de se kwaghbo.+
22 “Aluer or nan er orwanndor a nan kwaghbo man i kaa a nan ér nana bum, maa nan bum ér ifyan i kôr nan, nahan hen shighe u nan bum la nan va sha ishigh ki atse a ou a nan nagh ken iyou ne yô,+
23 ungwa sha usha, er kwagh, shi ôr mbatomov ou ijir, tsaha iferor la shi hide a kwagh u nan er la sha ityough ki nan,+ gema na orperapera ishô man injar sha perapera u nan.+
24 “Shi aluer mbahyomov ve hemba ior ou Iserael ityav sha ci u ve za hemen u eren we isholibo,+ kpa ve hide ve va wuese iti you+ shi ve er msen+ ve zamber sha ishigh you ér i zungwe ve mhôônom ken iyou ne yô,+
25 ungwa sha usha,+ de ior ou Iserael isholibo shi hide a ve ken tar u yange u na ve kua uter vev ne.+
26 “Shighe u usha ve cir, ura u kera lu nôôn ga+ sha ci u Mbaiserael za hemen u eren we isholibo,+ kpa ve ne ishigh hen ijiir ne ve er msen ve wuese iti you, ve de isholibo ve, sha ci u u hide a ve ijime* yô,+
27 ungwa sha usha shi de mbatomov ou kwaghbo, ka ior ou Iserael je la, gadia u tese ve gbenda u dedoo u vea zenden sha mi yô;+ shi nôô ura+ sha tar wou u yange u na ior ou wer u lu dyako ve la.
28 “Aluer ijen gba ken tar ne+ shin bouange+ va shin ahumbe a tseen shin kuruku*+ shin ikpela i ikyomon shin ikyomon i* yan kwagh kpishi+ shin aluer mbahyomov vev va kase ve wa atô ken ma gar ken tar* ne+ shin nyityô ican igen shin angev va yô,+
29 nyityô msen+ shin nyityô kwagh i ma or shin ior ou Iserael cii ve sen u ér we u zungwe ve mhôônom+ (gadia hanma or nan fa ican i nan man mnyoonom ma nan)+ shighe u ve kende ave sha, ve ver ishigh sha iyou ne yô,+
30 ungwa sha usha mba ve lu ijiir you i teman la,+ nahan de ve a kwaghbo+ shi na hanma or injar sha igbenda i nan cii, sha ci u u fa ishima i nan (ka we tseegh u fe ishima i orumace mimi ye),+
31 sha er vea cia u vea zenden sha igbenda you sha ayange a vea lu uma ken tar u u ne uter asev ne cii yô.
32 “Shi sha kwagh u shiror u nan lu môm ken ior ou Iserael ga, u nan mough ken tar u icaa nan ve sha ci u iti you i hemban*+ man uwegh ough ku ageegh kua uwegh ough ku naregh la, nan ve nan va ver ishigh sha iyou ne nan er msen yô,+
33 ungwa sha usha mba ve lu ijiir you i teman la shi er hanma kwagh u shiror la nan sen u cii, sha er ior mba sha tar cii vea fa iti you+ shi vea cia u er ior ou Iserael nahan, shi vea fa er i yer iyou i m maa ne sha iti you yô.
34 “Aluer ior ou za u za nôngon ityav a mbahyomov vev sha gbenda u u tindi ve la+ man ve ver ishigh sha gar u u tsough ne ve er msen+ hen a we shi ve ver ishigh sha iyou i m maa sha ci u iti you ne yô,+
35 ungwa msen ve sha usha, nahan er kwagh u ve sen u ér we u zungwe ve mhôônom sha mi la shi ôr ijir sha ci ve.+
36 “Aluer ve er u isholibo (gadia ma or ngu u nan eren isholibo ga ze),+ nahan ishima vihi u a ve tsung shi u kende ve a orhyom ve, orhyom ve la kura ve yem a mi uikyangen ken tar ugen, ica shin ikyua,+
37 nahan ve va gema ishima ken tar u i kura ve i yem a ve uikyangen ker la, maa ve hide hen a we shi ve zamber a we ér, u zungwe ve mhôônom ken tar u ve lu uikyangen ker la ve kaa ér, ‘Se er isholibo shi se er kwagh u shami ga; se er iferkwagh,’+
38 maa vea hide hen a we a ishima ve cii+ man a uma ve cii ken tar u ve lu uikyangen+ ape i kura ve i yem a ve uikyangen la, nahan vea ver ishigh vegher u tar ve u u ne uter vev la man vegher u gar u u tsough la+ kua iyou i m maa sha ci u iti you la, vea er msen hen a we yô,
39 ungwa msen ve sha usha mba ve lu ijiir you i teman la shi er kwagh u ve sen u ér we u zungwe ve mhôônom sha mi la, shi ôr ijir sha ci ve+ shi de ior ou mba ve er u isholibo la isholibo ve.
40 “Hegen yô Aôndo wam, wea lumun yô, ver ashe a ou man ato a ou ungwa msen u a er hen ijiir ne yô.+
41 Hegen yô, we Yehova Aôndo, kôndo za sha ijiir you i memen,+ we kua Areki u a lu ikyav i tahav ou la. We Yehova Aôndo, de upristi ou ve haa myom iyol, shi de mba ve civir we sha mimi la, ve ember sha ci u erdoo wou.+
42 We Yehova Aôndo, de vende* tor u u shigh un mkurem la ga.+ Umbur dooshima u yange u tese wanye wou Davidi la.”+
Ngeren mba shin kpe
^ Zwa Heberu, “wan wou, u una due ken iwenge you.”
^ Shin “ijiir.”
^ Ishiva i môm yange i lu usentimta 44.5 (uinci 17.5). Nenge Ngeren u Seer u B14 la.
^ Shin “na ve ican.”
^ Shin “mbaahungwa mba.”
^ Zwa Heberu, “ken tar u ihinda na.”
^ Shin “mkumbem.”
^ Shin “iti i dedoo.”
^ Zwa Heberu, “gem ijime a.”
