Kroniku u sha Uhar 34:1-33
34 Yoshia+ lu anyom anigheni shighe u hingir tor la, a hemen anyom 31 ken Yerusalem.+
2 A er kwagh u vough sha ishigh ki Yehova, a zende sha igbenda i ter na u tamen Davidi, a goom a yem ken iyan shin ken imese ga.
3 Ken inyom i sha anigheni i hemen na la, er lu wanye la je, a hii u keren Aôndo u ter na u tamen Davidi;+ maa ken inyom i sha 12 la, a hii u wanger Yuda man Yerusalem,+ a bee a ajiir a taven+ man mtôm ma akombom ma sha ikyon* man ieev mbi gban a gba,+ kua ieev mbi iyôôgh.*
4 Heela tseegh ga, ve hembe atse a ieev mbi Baal a a lu sha ishigh nagh la kera, shi a gber atse a insensi a a lu sha a la. Shi a hembe mtôm ma akombom ma sha ikyon* avur avur, kua ieev mbi gban a gba man ieev mbi iyôôgh,* a wua mbi hingir vue, maa a kura a za haa sha iwar i ior mba ve naan mbi iniav la.+
5 Shi a nande akuhe a upristi sha atse a mbi.+ Kape a wanger Yuda man Yerusalem je la.
6 Man ken agar a Manase man Eferaim+ man Shimion zan zan nyôr Nafetali kua ajiir a a kase a, a a hingir alôgh la yô,
7 a hembe atse wue wue shi a vihi mtôm ma akombom ma sha ikyon* man ieev mbi gban a gba,+ a wua mbi hingir vue; shi a vihi atse a nanden insensi vindi vindi a a lu ken tar u Iserael la cii,+ been yô, a hide a yem ken Yerusalem.
8 Ken inyom i sha 18 i hemen na la, hen shighe u a wanger gar man tempel* la, a tindi Shafan+ wan u Asalia man Maaseia orhemen u gar, kua orngeren Yoa wan u Yoahashi ér ve za sôr iyou i Yehova Aôndo na.+
9 Ve va hen zegepristi Hilkia, ve va na un inyaregh ki i va a mi ken iyou i Aôndo, ki Mbalevi mba ve lu eren tom u kuran ihinda, kohol ken Manase man Eferaim man hen Mbaiserael mbagen cii,+ kua ken Yuda man Benyamin man ior mba ken Yerusalem la.
10 Maa ve gema ki ve na mba i tsua ve ve lu nengen sha tom u ken iyou i Yehova la. Mba ve lu eren tom ken iyou i Yehova la di, gema ki sôr iyou la.
11 Ve na mbafantomaveegh man mbamaankwagh ér ve yam awen a kuan man ikyon sha ci u eren uinderan shi manden ayou a utor mba Yuda de a gba hingir alôgh la+ a ikyon i vesen.
12 Nahan ior mbara er tom la sha mimi.+ I tsua Mbalevi ér ve lu mbahemen, ve nengen sha a ve; lu Yahati man Obadia ken Mbamerari,+ kua Sekaria man Meshulam ken Mbakohati.+ Mbalevi mbagen mba ve fa u wan atsam tsema tsema cii yô,+
13 ve lu nengen sha mbatomov* shi ve lu mbahemenev mba ior mba ve lu eren ityom kposo kposo la cii; shi Mbalevi mbagen lu mbaakawe man mbavesen kua mbakuran ihinda.+
14 Er ve lu duen a inyaregh ki i va a mi ken iyou i Yehova la,+ pristi Hilkia za zua a takeda u Tindi u Yehova,+ u i na sha ikyev i* Mose la.+
15 Tsô Hilkia kaa a akawe Shafan ér: “M zua a takeda u Tindi ken iyou i Yehova.” Maa Hilkia gema takeda la na Shafan.
16 Tsô Shafan va a takeda la hen tor va kaa a na ér: “Mbatomov ou mba eren ityom i yange i na ve la cii.
17 Ve dugh inyaregh ki ken iyou i Yehova la, ve gema ki ve wa sha ikyev i ior mba i tsough ve la, kua mba ve lu eren tom la.”
18 Shi akawe Shafan kaa a tor ér: “Takeda ugen ngu u pristi Hilkia a nem yô.”+ Shafan maa gba ôron u sha ishigh ki tor.+
19 Tor ongo akaaôron a ken Tindi la yô, fese je a ande akondo a na.+
20 Tsô tor kaa a Hilkia man Ahikam+ wan u Shafan, man Abedon wan u Mika, man akawe Shafan kua Asaia ortom u tor ér:
21 “Za nen, za pine nen Yehova kwagh sha kwagh u akaa a i ôr ken takeda u i zough a mi ne sha ci wam man sha ci u mba ve shi her ken Iserael man ken Yuda la; gadia ishima i i vihi Yehova tsung la ia va sen sha a vese, sha ci u uter asev ungwa kwagh u Yehova ôr, sha u eren akaa a i nger ken takeda ne la cii ga.”+
22 Tsô Hilkia vea ior mba tor tindi la, za hen profeti u kwase Hulda.+ Un lu kwase u Shalum wan u Tikiva wan u Harhashi. Shalum lu or u nengen sha akondo, Hulda lu hen Vegher u He u Yerusalem; lu her ve za lam a na ye.+
23 A kaa a ve ér: “Ka kwagh u Yehova Aôndo u Iserael a kaa ne ér, ‘Za kaa nen or u a tindi ne hen a mo la ner:
24 “Ka kwagh u Yehova a kaa ne ér, ‘Me va a kwaghtseren sha ijiir ne man sha ior mba ve tem her la,+ me va a afan a i nger ken takeda+ u ve ôr sha ishigh ki tor u Yuda la cii.
25 Er ve undum+ ve yem ve lu za nanden mbaaôndo mbagen iniav, mnyim ma lu duen sha u vea vihim ishima+ sha tom u ave a ve cii yô, me haa ishimavihim yam sha ijiir ne je, or a fatyô u pirin i ga.’”+
26 Kpa tor u Yuda u a tindi ne ér ne va pine Yehova kwagh la yô, ka kwagh u ne ôr a na je ne ner, “Ka kwagh u Yehova Aôndo u Iserael a kaa ne, ér: ‘Sha kwagh u akaa a u ongo la yô,+
27 er u ongo akaa a A ôr sha kwagh u ijiir ne man ior mba ve tem her la, nahan u vaa afanyô* shi u hidi a iyol you ijime sha ishigh ki Aôndo, shi u hidi a iyol ijime sha ishigh yagh shi u ande akondo a ou, u vaa sha ishigh yagh yô, mo kpa m ungwa u,+ kape Yehova a kaa la.
28 Ka nahan ve me yem a we u za kohol uter ou mba tsev* ye, a ii u ken uwar wou bem bem, nahan ashe a ou aa nenge a kwaghtseren u me va a mi sha ijiir ne, man sha ior mba ve lu her cii la ga.’”’”+
Tsô ve hide ve va ôr tor nahan.
29 Tsô tor tindi loho i za ôr mbatamen mba Yuda man Yerusalem cii ve kohol imôngo.+
30 Tor maa kôndo za ken iyou i Yehova vea ior i Yuda cii, man ior mba ken Yerusalem, man upristi kua Mbalevi; ior cii, hii sha mbakiriki zan zan nyôr sha mbavesen. A ôr akaa a i nger ken takeda u ikyuryan, u i zua a mi ken iyou i Yehova la cii, ve ungwa.+
31 Tor tile hen ijiir na hide ya ikyur+ sha ishigh ki Yehova ér, una dondo Yehova shi una kuran atindi a na shi una eren sha akaaumbur a na, man akaawan a na, a ishima na cii man a uma na cii,+ sha u eren sha akaaôron a ken ikyuryan, a yange i nger ken takeda ne la.+
32 Heela tseegh ga, a taver ior mba ve lu ken Yerusalem man Benyamin la cii ishima ér ve lumun i̱. Nahan ior mba ken Yerusalem er sha ikyuryan i Aôndo, Aôndo u uter vev la vough.+
33 Yoshia maa bee a akaa a ndôhôrshima* ken tar u Iserael cii,+ shi a taver ior mba ken Iserael cii ishima ér ve civir Yehova Aôndo ve. Hen shighe u lu uma la cii,* ve kaha ve undu gbenda u Yehova Aôndo u uter vev ga.
Ngeren mba shin kpe
^ Nenge Ngeren u Pasen Asember, “Ityôgh ki akombough ki sha kon.”
^ Shin “ieev mbi keren a ker.”
^ Nenge Ngeren u Pasen Asember, “Ityôgh ki akombough ki sha kon.”
^ Shin “ieev mbi keren a ker.”
^ Nenge Ngeren u Pasen Asember, “Ityôgh ki akombough ki sha kon.”
^ Zwa Heberu, “iyou.”
^ Shin “mbatôônikyav.”
^ Zwa Heberu, “sha uwegh ku.”
^ Zwa Heberu, “ishima you i hingir dem dem.”
^ Ka gbenda u ôron kwagh u kuugh sha injakwagh.
^ Shin “ieev.”
^ Zwa Heberu, “Sha ayange a uma na cii.”
