Kroniku u sha Uhar 29:1-36
29 Hesekia+ lu anyom 25 shighe u tema tor la, a hemen ken Yerusalem anyom 29. I yilan ngô na ér Abiya, lu wan u Sekaria.+
2 Lu eren kwagh u vough sha ishigh ki Yehova,+ vough er ter na u tamen Davidi er nahan.+
3 Ken uwer u hiihii, ken inyom i hiihii i tema tor la, a bugh ihinda i iyou i Yehova a sôr í.+
4 Maa a va a upristi man Mbalevi a va kohol ve imôngo ken tembe, vegher u sha ityoughkitaregh la.
5 A kaa a ve ér: “Kegh nen ato a mo, ne Mbalevi. Wanger nen ayol a en+ shi wanger nen iyou i Yehova Aôndo u uter enev, shi due nen a kwagh u wang ga hen icighanjiir kera.+
6 Gadia uter asev er kwagh sha mimi ga, ve er kwaghbo sha ishigh ki Yehova Aôndo wase.+ Ve undu un shi ve gema ishigh vev hen tabernakel u Yehova kera, shi ve gema ijime a na.+
7 Shi ve wuhe ihinda i varenda+ shi ve pir amenger.+ Ve de u nanden insensi+ shi ve de u nan Aôndo u Iserael iniav mbi nanden+ hen icighanjiir.
8 Sha nahan yô, ishimavihin i Yehova sen sha Yuda man Yerusalem,+ nahan a gema ve ve hingir kwagh u cieryol man kwagh u kpilighyol man kwagh u ior vea nenge yô ve gbidye iwer* yô, er ne lu nengen sha ashe a en nahan.+
9 Kwagh ne na yô, uter asev kpe ku u sanker,+ shi i yem a ônov asev mba nomso man mba kasev kua kasev asev uikyangen.+
10 Hegen yô, sarem u yan ikyur vea Yehova Aôndo u Iserael,+ sha er ishima ia de u vihin un a vese yô.
11 Ônov av, hegen ka shighe u haan iyol inya ga,* sha ci u Yehova tsua ne ér ne tilen sha ishigh nagh, ne lu mbatomov nav,+ shi ne nanden un iniav mnyim ma duen.”+
12 Tsô Mbalevi mough sha: Ve yô lu Mahati wan u Amasai man Yoel wan u Asaria ken Mbakohati;+ ken Mbamerari yô,+ lu Kishi wan u Abedi man Asaria wan u Yahalelel; ken Mbagershon yô,+ lu Yoa wan u Shima man Eden wan u Yoa;
13 ken ônov mba Elisafan yô, lu Shimiri man Yeuel; ken ônov mba Asav yô,+ lu Sekaria man Matania;
14 ken ônov mba Heman yô,+ lu Yehiel man Shimei; ken ônov mba Yedutun yô,+ lu Shemaia man Ushiel.
15 Maa ve kohol anmgbianev vev imôngo shi ve wanger ayol a ve, er tor ôr sha mkaanem ma Yehova nahan, sha er vea wanger iyou i Yehova yô.+
16 Nahan upristi nyôr ken iyou i Yehova sha u vea wanger i yô; ve due a hanma kwagh u wang ga, u ve zua a mi ken tempel u Yehova la cii, ve va a mi ken tembe+ u iyou i Yehova. Mbalevi di tôô due a mi ken won, yem a mi shin Pev u Kideron.+
17 Tsô ve hii u wanger tempel la sha iyange i hiihii ken uwer u hiihii la. Sha iyange i sha anigheni ken uwer shon la, ve nyôr hen varenda u Yehova.+ Ve wanger iyou i Yehova ayange anigheni, maa ve bee sha iyange i sha 16 i uwer u hiihii la.
18 Mba been yô, ve nyôr ve za ôr a Tor Hesekia ér: “Se wanger iyou i Yehova jimin cii, se wanger atse a nanden nagh+ man ikyav mbi a cii,+ kua tebul u beredi u veren sha ishigh ki Aôndo+ man ikyav nav cii.
19 Shi ikyav mbi Tor Ahashi yange due a mi ken tempel kera shighe u lu hemen ve va er kwagh sha mimi ga la+ cii kpa, se sôr mbi se ver shi se wanger mbi,+ se ver mbi hen kpe u atse a Yehova.”
20 Tsô Tor Hesekia mough tugh tugh kohol mbahemenev mba gar la imôngo, ve kôndo ve za sha iyou i Yehova.
21 Ve za a anomabua ataankarahar man anomaiyôngo ataankarahar man agumaiyôngo ataankarahar kua ukpev utaankaruhar, u za nan nagh ku isholibo sha ci u tartor la, man sha ci u icighanjiir la, man sha ci u Yuda.+ Nahan a kaa a upristi, ônov mba Aron ér ve na iniav a mbi sha atse a Yehova.
22 Nahan ve sôngo ibua la,+ upristi tôô awambe a mbi mishi sha atse a nan nagh;+ maa ve sôngo anomaiyôngo la ve mishi awambe a mbi sha atse a nan nagh, shi ve sôngo agumaiyôngo la ve mishi awambe a mbi sha atse a nan nagh.
23 Ve va a ukpev mba nan nagh ku isholibo la sha ishigh ki tor man nongoior la, ve va penda ave sha ukpev mbara.
24 Upristi sôngo mbi na nagh ku isholibo a awambe a mbi sha atse a nan nagh la, u nan iwom sha ci u Iserael cii, gadia tor kaa ér nagh ku nanden man nagh ku isholibo la ku lu sha ci u Iserael cii.
25 Hen shighe ne, a kohol Mbalevi ken iyou i Yehova; ve lu a myôm ma kuhwan man akaa a kuhwan kwagh a lun a ikyar man mbaadiguve,+ u dondon tindi u Davidi+ man Gadi,+ ornengen tor mbampase man profeti Natan+ wa la, gadia lu Yehova wa tindi ne sha ikyev i uprofeti nav ye.
26 Nahan Mbalevi tile a ikyav mbi kuhwan kwagh mbi Davidi, upristi gema lu a ibusa.+
27 Maa Hesekia kaa ér i na nagh ku nanden sha atse a nan nagh.+ Mba hiin u nanden nagh yô, i gba wan icam i Yehova shi tôngon ibusa, u zuan sha kwaghkuhwan u Davidi tor u Iserael.
28 Er i lu wan atsam shi tôngon ibusa la, nongoior la cii gure inya—ve er kwagh ne zan zan i kar nanden nagh been.
29 Mba ne nagh mba been nahan maa tor man mba ve lu vea na la ve gure inya, shi ve yav inya.
30 Tor Hesekia man mbahemenev maa kaa a Mbalevi ér ve wuese Yehova a mkaanem ma Davidi+ man Asav+ ornengenmbampase la. Nahan ve wa atsam sha iember tsung, ve gure inya, maa ve yav inya.
31 Hesekia maa kaa ér: “Hegen u i dugh ne i ver kposo* sha ci u Yehova ne, va nen a iniav yenegh man iniav mbi iwuese ken iyou i Yehova.” Nahan nongoior la, gba nan iniav man iniav mbi iwuese, shi hanma or u nan lu a ishima i nan kwagh cii, nan va a iniav mbi nanden.+
32 Iniav mbi nanden mbi nongoior la va a mi yô, lu ibua 70 man anomaiyôngo 100 man agumaiyôngo 200—ve va a akaa ne cii sha u va nan Yehova nagh ku nanden+—
33 ve na iniav mbi tseghan mbigenev sha ibua 600 man iyôngo 3,000.
34 Kpa upristi ngee kuma u bughun ilev mbi i va a mi u nan iniav mbi nanden la akôv cii ga, nahan anmgbianev vev Mbalevi va wase ve+ zan zan i kar eren tom la been, shi zan zan upristi kar wanger ayol a ve,+ sha ci u Mbalevi hemba veren ishima* u wanger ayol a ve a upristi.
35 Shi iniav mbi nanden lu kpishi,+ kua aci a ahôm a iniav mbi bem+ man iniav mbi kwaghman sha ci u iniav mbi nanden mbira.+ Kape i hide i lu eren tom u ken iyou i Yehova je la.
36 Nahan Hesekia man ior cii ember sha kwagh u Aôndo u mimi er sha ci u ior la,+ gadia kwagh ne cii er fese je ngôôr ga.
