Kroniku u sha Uhar 13:1-22
13 Ken inyom i sha 18 i Yeroboam tema tor la, Abiya hingir tor u Yuda.+
2 A hemen ken Yerusalem anyom atar. I yilan ngô na ér Mikaia,+ un lu wan u Uriel u Gibea.+ Ityav lu hen atô u Abiya man Yeroboam.+
3 Tsô Abiya za ityav a ikyumutya iorov 400,000, ve lu mbautyaav mba ageev mba i tsaase* ve yô.+ Yeroboam kpa kase u nôngon ityav a na, lu a mbautyaav mba ageev mba i tsaase* ve yô, iorov 800,000.
4 Abiya maa tile sha Uwo u Semaraim, u u lu hen haregh u iwoogh u Eferaim la, a kaa ér: “Ungwa kwagh ne, we Yeroboam man Iserael cii.
5 Ne fa er Yehova Aôndo u Iserael yange na Davidi tartor ér a hemen Iserael gbem sha won,+ un man ônov nav mba nomso+ sha ikyuryan i bar* gaa?+
6 Kpa Yeroboam+ wan u Nebati, wanye u Solomon wan u Davidi mough hendan a orvesen na.+
7 Maa agbilinaior a lun a tom ga gba va kohol un. Ve hemba Rehoboam wan u Solomon tahav shighe u lu wanye, lu a tsoghol ishima ga la, nahan a fatyô u nôngon kwagh a ve ga.
8 Hegen yô, ne hen ner ne fatyô u nôngon kwagh a tartor u Yehova u u lu sha ikyev i ônov mba Davidi la sha ci u ne ngee iyenge, shi ne mba a ônov mba ibuav mba sha zanaria mba Yeroboam er ér ve lu mbaaôndo enev la.+
9 Ne zenda upristi mba Yehova+ man ônov mba Aron kua Mbalevi gaa? Shi ne ver upristi enev er ior mba ken ityar igen ve eren nahan gaa?+ Nyityô or u nan ve a gumbua man anomaiyôngo ataankarahar cii, ka ne ver nan pristi u akaa a a lu aôndo ga yô.
10 Kpa se yô, Yehova ka Aôndo wase+ shi se undu un ga; upristi asev, ônov mba Aron mba eren Yehova tom shi Mbalevi mba wasen ve tom ne.
11 Mba nanden Yehova iniav mnyim ma duen hanma iyange pepe man aikighe,+ kua insensi u human doon.+ Beredi u veren sha ishigh ki Aôndo+ gema ngu sha tebul u i er sha zanaria u wang yô. Shi ka ve tsar amenger a a lu sha daarimenger u i er un sha zanaria la+ hanma aikighe,+ sha ci u se mba eren tom u Yehova Aôndo wase a ne se yô, kpa ne yô, ne undu un.
12 Hegen yô nenge! Aôndo u mimi ngu a vese, ngu hemen se vea upristi nav mba ve lu a ibusa i tôngon sha ci u nôngon ityav a ven la. Ne ior i Iserael, de nôngon nen ityav a Yehova Aôndo u uter enev ga, sha ci u ne fatyô u hemban ga.”+
13 Kpa Yeroboam tindi ior za yer ken ijime i ior i Yuda, nahan ve lu ior i Yuda sha hemen, mba ve yer la di ve lu ve ken ijime.
14 Ior i Yuda i gem ashe yô, ve nenge er gba u vea nôngo ityav a ior mba ve lu ve sha ishi man mba ve lu ve ken ijime la yô. Tsô ve gba vaan a Yehova,+ upristi gema lu tôngon ibusa genger genger.
15 Ior i Yuda maa ger amo a utya. Er ior i Yuda ger amo a utya la, Aôndo u mimi hemba Yeroboam man Iserael cii ityav sha ishigh ki Abiya man Yuda.
16 Mbaiserael yevese sha ishigh ki Yuda, nahan Aôndo na Mbaiserael sha ikyev ve.
17 Abiya man ior nav wua ve je falegh gba, nahan ingyegh ki Mbaiserael mba i wua la lu seer a seer, lu iorov 500,000 mba i tsaase* ve yô.
18 Nahan i hee ior i Iserael hen shighe la, kpa ior i Yuda hemba ityav sha ci u ve suur sha Yehova Aôndo u uter vev.+
19 Abiya za hemen u zendan Yeroboam zan zan a za ngohol un agar; lu Betel+ kua ugeri nav mba ve kase un la, man Yeshana kua ugeri nav mba ve kase un la, man Eferain+ kua ugeri nav mba ve kase un la.
20 Mayange Yeroboam kera tsa lu a tahav sha shighe u Abiya la ga, nahan Yehova tsaha un, maa a kpe.+
21 Kpa Abiya yô, tahav nav seer a seer. Shighe kar yô, a vôso kasev 14,+ a mar ônov mba nomso 22, mba kasev 16.
22 Akaa agen ken yiase i Abiya cii, akaa a a er man akaaôron a na, i nger a ken ungeren mba* profeti Ido.+
