Kroniku u sha Uhar 25:1-28
25 Amashia lu anyom 25 shighe u tema tor la, a hemen ken Yerusalem anyom 29. I yilan ngô na ér Yehoadan, lu kwase u ken Yerusalem.+
2 A za hemen u eren kwagh u vough sha ishigh ki Yehova, kpa lu eren sha ishima i môm ga.
3 Yange tartor na ngu va taver yô, fese je a wua mbatomov nav mba ve wua ter na u lu tor la.+
4 Kpa a wua ônov vev ga, sha u zuan sha kwagh u i nger ken Tindi ken takeda u Mose la. Heela Yehova kaa ér: “Uter ve de kpe sha ci u ônov vev ga, ônov kpa ve de kpe sha ci u uter vev ga; kpa hanma or nana kpe sha ci u isholibo i nan.”+
5 Tsô Amashia kohol Yuda imôngo; a ôr ve ve tile sha uya mba uter vev, sha mbahemen ior dubu dubu man mbahemen ior deri deri mba Yuda man mba Benyamin cii.+ I nger ve ati hii sha mba ve lu anyom 20 yem hemen la,+ nahan i zua a ior kuma 300,000 mba i tsaase ve* u nôngon ityav, mba ve fa u keren iwange shi kôron perutya u vesen yô.
6 Heela tseegh ga, a za yam mbautyaav mba ageev iorov 100,000 ken Iserael sha azurufa utalenti* 100.
7 Kpa or u Aôndo u mimi va hen a na va kaa a na ér: “Tor, de deen wer ikyumutya i Iserael i za vea we ga, gadia Yehova ngu a Iserael ga,+ shi ngu a ma Oreferaim kpaa ga.
8 Kpa we za, za nôngo kwagh, taver ishima ken utya, gayô, Aôndo u mimi una na u nôngo gbeev sha ishigh ki orhyom, sha ci u Aôndo ngu a tahav mbu wasen+ shi nan gbeev mbu nôngon.”
9 Tsô Amashia ôr a or u Aôndo u mimi la ér: “Kpa utalenti 100 mba m ne mbautyaav mba Iserael la ye?” Or u Aôndo u mimi la gema kaa ér: “Yehova ngu a tahav mbu nan we kwagh u a hembe ngula yô.”+
10 Nahan Amashia kaa a ushoja mba ve mough ken Eferaim ve va hen a na la ér ve hide ve yem hen ijiir ve. Kpa ishima vihi ve a Yuda kpishi, nahan ve hide hen ijiir ve a ishimavihin tsung.
11 Maa Amashia taver ishima hemen ikyumutya na yem a mi hen Pev u Bar,+ a za ta ityav sha ior i Seir a wua ve iorov 10,000.+
12 Nahan ior i Yuda kôr iorov 10,000 uma. Ve unde a ve sha atô u vandegh, ve za kende ve ve va gba ve hembe avur avur.
13 Kpa ior mbagen ken ikyumutya i Amashia kaa ér ve hide ve yem, ve de za veren un ityav ga la,+ lu tan num sha agar a Yuda; ve wua iorov 3,000 hii ken Samaria+ zan zan va nyôr Bete-horon;+ shi ve ya ishar kpishi.
14 Kpa Amashia za woo Mbaedom ngur hiden yô, a kura mbaaôndo mba ior i Seir a hide a mi a va ver, ve hingir mbaaôndo nav,+ maa a gba guren ve inya shi nanden iniav mnyim duen.
15 Tsô ishima vihi Yehova a Amashia kpishi, nahan a tindi profeti va kaa a na ér: “Er nan ve u lu dondon mbaaôndo mba ior mbara, mba yange ve fatyô u yiman ve sha ikyev you ga laa?”+
16 Er lu lamen a na la, tor kaa ér: “Ka an nan ver u orwan tor kwagha?+ Kuma nahan!+ U soo wer i wua u wee?” Profeti la maa de iliam, kpa a kaa ér: “M fa Aôndo soo ér we u tim, sha ci u ú er kwagh ne shi u vende u ungwan kwaghwan wam yô.”+
17 Amashia tor u Yuda ze idyu a mbawan un kwagh yô, a tindi loho hen Yehoashi wan u Yehoahashi wan u Yehu tor u Iserael, a kaa ér: “Va, se nôngo ityav.”*+
18 Yehoashi tor u Iserael tindi loho ne hen Amashia tor u Yuda ér: “Asagher u ken Lebanon tindi loho hen sedar u ken Lebanon ér, ‘Na wan wam, wan wou u kwase a vôso.’ Nahan kpa, inyamkyume i ken Lebanon kar ndyar sagher la angahar.
19 U kaa wer, ‘Nenge! M* hemba Edom ityav.’+ Nahan vanger hagher we ker, u soo wer i na u icivir. Kpa tema hen ya wou.* Er nan u soo u van a kwaghbo sha iyol you wer u gba, shi u na Yuda a gba vea we imôngo?”
20 Kpa Amashia ungwa ga,+ gadia Aôndo u mimi soo u nan ve sha ikyev i orhyom,+ sha ci u ve dondo mbaaôndo mba Edom.+
21 Nahan Yehoashi tor u Iserael kôndo za, un vea Amashia tor u Yuda, ve za nôngo ityav ayol a ve hen Bete-shemeshi+ u Yuda.
22 Iserael hemba Yuda ityav, nahan hanma or yevese yem hen ya u* nan.
23 Yehoashi tor u Iserael kôr Amashia wan u Yehoashi wan u Yehoahashi* tor u Yuda hen Bete-shemeshi. Maa a va a na ken Yerusalem, a va hembe kpekpe u Yerusalem, hii hen Hunda u Eferaim+ zan zan nyôr hen Hunda u hen Zongo+ kuma aseva 400.*
24 A kura zanaria man azurufa cii man akaa a a lu ken iyou i Aôndo u mimi sha ikyev i Obedi-edom la, man akaa a a lu ken ayou a koson akaainjaa a hen ya u tor la cii,+ shi a kôr ior a yem a mi uikyangen. Maa a hide a yem ken Samaria.
25 Yehoashi+ wan u Yehoahashi tor u Iserael+ kpen kera yô, Amashia+ wan u Yehoashi tor u Yuda hide tsa anyom 15.
26 Akaa agen ken yiase i Amashia cii, ken mhii zan zan mkur yô, nenge! i nger ken Takeda u Ator a Yuda man a Iserael.
27 Shighe u Amashia de u dondon Yehova la, ve zua zwa+ sha a na ken Yerusalem, nahan a yevese a yem ken Lakishi, kpa ve tindi ior za ken Lakishi za wua un ker.
28 Nahan ve tôô un shin ikyekyeutya ve hide a na, ve va ii un vea uter nav ken gar u Yuda.
Ngeren mba shin kpe
^ Zwa Heberu, “i tsua ve.”
^ Talenti môm yange a lu ukilogeram 34.2. Nenge Ngeren u Seer u B14 la.
^ Shin “va se zua ishigh a ishigh.”
^ Zwa Heberu, “U.”
^ Shin “ya u tor.”
^ Zwa Heberu, “utenti mba.”
^ Shi i yila un ér Ahashi.
^ Nôngo u kuman umita 178 (angahar 584). Nenge Ngeren u Seer u B14 la.
