Kroniku u sha Uhar 2:1-18
-
I wa agoyol u maan tempel (1-18)
2 Tsô Solomon kaa ér i maa iyou sha ci u iti i Yehova,+ shi i maa iyou* sha ci u tartor na.+
2 Nahan Solomon tsua iorov 70,000 ér ve eren tom,* man iorov 80,000 ér ve tôndon awen sha iwo,+ kua iorov 3,600 ér ve nengen sha a ve.+
3 Heela tseegh ga, Solomon tindi ér i za ôr Hiram+ tor u Tiru ér: “Er a mo vough er yange u er a terem Davidi, u tindi un a ikyon i sedar wer a maa iyou i* una tsaan ker la nahan.+
4 Hegen m ngu maan iyou sha ci u iti i Yehova Aôndo wam, sha u me tsegha i sha ci na, shi me nanden insensi u humandoon+ sha ishigh nagh, man sha ci u beredi u veren sha ishigh ki Aôndo hanma shighe,+ man iniav mbi nanden pepe man aikighe,+ sha Iyange i Memen+ man uwer u he,+ kua sha ashighe a eren uiniongo+ mba Yehova Aôndo wase. Ka kwagh u Iserael una eren gbem je ne.
5 Iyou i m lu maan ne ia lu zegeyou, sha ci u Aôndo wase hemba mbaaôndo mbagen cii.
6 Man ka an nan kom u maan un iyou? Gadia, usha man sha u usha la je kpa kehe kuma u una tema ken a ve ga,+ nahan mo m ngu di nyi je u me maa un iyou? Kwagh u me fatyô u eren yô, ka u maan un ijiir, ape a nanden iniav sha ishigh nagh mnyim ma a duen yô.
7 Hegen yô, tindim a or u fan tomaveegh u nan fe u eren tom a zanaria tsema tsema kua azurufa man togula+ man iyôgh man mou u nyian dindee man mou u nyian jang man mou u buluu-buluu, shi nan fe u eren hwe sha akaa yô, nana eren tom ken Yuda man ken Yerusalem vea ior av mba fan tomaveegh tsema tsema, mba terem Davidi tsua la.+
8 Shi tindim a ikyon i sedar man i yunipa+ man i agum,+ i ken Lebanon, gadia m fa dedoo mer mbatomov ou fa u gberen ikyon i Lebanon tsembelee.+ Mbatomov av vea er tom vea mbatomov ou+
9 u gberen ikyon kpishi sha ci wam, gadia iyou i me maa ne ia lu zegeyou, shi ia doo ashe tsung.
10 Nenge! Me na mbatomov ou mba vea lu gberen ikyon la kwaghyan,+ a lu: alakema ukoor* 20,000, man barli ukoor 20,000, man wain ubav* 20,000, kua mkurem ubav 20,000.”
11 Nahan Hiram tor u Tiru, nger Solomon loho ne kaa ér: “Er ior mba Yehova ve doo un ishima yô, a ver u tor sha a ve.”
12 Hiram maa kaa ér: “I wuese Yehova Aôndo u Iserael, un u a er usha man tar la, sha ci u a na Davidi wan u lun a kwaghfan,+ u lun tsev tsev shi lun a mkav,+ u una maa iyou sha ci u Yehova man sha ci u tartor na yô.
13 Hegen yô, m ngu tindin Hiram-abi,+ or u fan tomaveegh tsema tsema, u lun a mkav,
14 un ka wan u wankwase u ken ipyaven u Dan, kpa ter na lu Ortiru. Hiram-abi fa u eren tom a zanaria tsembelee, kua azurufa man togula man iyôgh man awen man ikyon man mou u nyian dindee man mou u buluu-buluu man ikyondo i doon ashe man mou u nyian jang.+ Ka a er hanma inja hweegh cii, shi hanma hwe u i kaa ér a er cii ka a er.+ Una er tom vea ior ou mba fan tomaveegh tsema tsema man ior mba fan tomaveegh tsema tsema mba terem Davidi, teru.
15 Yô, terem a tindi ase a alakema man barli man mkurem kua wain, er a tende zwa a mbayev nav nahan.+
16 Nahan se gber ikyon i ken Lebanon+ kpishi er kwagh a gbe u a mi la, se kange i ijiir i môm, se kar a i ken mnger, se za ver hen Yopa,+ maa u va kura i, u kôndo u yem a mi ken Yerusalem.”+
17 Tsô Solomon ôr iyenge i nomso mba ve lu shir ken tar u Iserael la cii,+ nahan i zua a iorov 153,600. Hen shighe ne, ter na Davidi+ vande ôron iyenge ior kera.
18 Nahan Solomon tsua iorov 70,000 ken a ve, ver ér ve eren tom,* man iorov 80,000 ér ve tôndon awen+ sha iwo, kua iorov 3,600, ér ve nengen sha ior, ve eren tom.+
Ngeren mba shin kpe
^ Shin “ya u tor.”
^ Shin “ér ve tôôn ikyav.”
^ Shin “ya u tor.”
^ Koor môm yange a lu ulita 220. Nenge Ngeren u Seer u B14 la.
^ Bav môm yange a lu ulita 22. Nenge Ngeren u Seer u B14 la.
^ Shin “ve tôôn ikyav.”
