Kroniku u sha Uhar 18:1-34
18 Yehoshafati lu a inyaregh man icivir kpishi,+ kpa a lu wankem u Ahaba.+
2 Anyom nga karen yô, a sen a za shin Ahaba hen Samaria,+ nahan Ahaba na iniav sha iyôngo man ibua kpishi sha ci na man sha ci u ior mba ve lu a na la. Maa zer a na ér vea kôndo vea za ityav sha Ramoti-gileadi.+
3 Ahaba tor u Iserael maa pine Yehoshafati tor u Yuda ér: “U za vea mo ken Ramoti-gileadi?” A gema a kaa a na ér: “Mo man we se mba môm, ior ou ka ior av, nahan me wase u ityav.”
4 Kpa Yehoshafati kaa a tor u Iserael ér: “Wea lumun yô, vande pinen Yehova kwagh sha kwagh ne.”+
5 Tsô tor u Iserael kohol uprofeti imôngo, iorov 400, pine ve ér: “M za nôngo ityav a Ramoti-gileadi, shin m de ze ga?” Ve gema ve kaa ér: “Kôndo za, Aôndo u mimi una na un sha ikyev i tor.”
6 Yehoshafati maa pine ér: “Ma profeti u Yehova ngu heen gaa?+ Nan kpa ma se pin kwagh sha ikyev i nan.”+
7 Nahan tor u Iserael kaa a Yehoshafati ér: “Or shi môm+ u se fatyô u pinen Yehova kwagh sha ikyev i nan yô; kpa m soo kwagh u nan ga, sha ci u nan ôron akaaôron a profeti a dedoo sha a mo ga, saa a bo.+ Ka Mikaia wan u Imla.” Nahan kpa, Yehoshafati kaa ér: “Tor a de er imbakwagh la ga.”
8 Tsô tor u Iserael yila orgen u eren tom hen ya u tor, kaa a na ér: “Va a Mikaia wan u Imla fese.”+
9 Hen shighe ne, tor u Iserael man Yehoshafati tor u Yuda tema, hanma ve sha ikyônough ki torough ki nan, ve wuha iyol i tor, ve tema hen vande u gbidyen iyiav, hen hundagar u Samaria la, shi uprofeti mbara cii lu ôron kwaghôron u profeti sha ishigh vev.
10 Maa Sedekia wan u Kenaana, er akor a sha iyô sha ci na, maa kaa ér: “Ka kwagh u Yehova a kaa je ne, ér, ‘U ta num sha* Mbashiria a akor ne, zan zan u tim ve kera.’”
11 Uprofeti mbagen mbara cii, lu ôron kwaghôron u profeti shon môm, kaan ér: “Kôndo za ken Ramoti-gileadi, nahan u hemba ityav;+ Yehova una na un sha ikyev i tor.”
12 Tsô orôron-loho u za, u za yilan Mikaia la kaa a na ér: “Nenge! Uprofeti gba zwa môm, mba ôron tor kwagh u a doo un u ungwan yô. Wea lumun yô, kwaghôron wou a lu er u ve nahan;+ ôr kwagh u una doo un u ungwan yô.”+
13 Kpa Mikaia kaa ér: “Mimi je, er Yehova a lu u uma ne, ka kwagh u Aôndo wam a kaa la me ôr ye.”+
14 Nahan a nyôr a za hen tor, tor maa pine un ér: “Mikaia, se za nôngo ityav a Ramoti-gileadi, shin m de ze ga?” Fese je, a gema a kaa ér: “Kôndo za nen, ne hemba ityav; a na ve sha ikyev yen.”
15 Tor maa pine un ér: “Ka kwa me me kaa a we mer, bum wer u ôrom kwagh ugen ga, saa kwagh u mimi ken iti i Yehova?”
16 Nahan a kaa ér: “M nenge a Mbaiserael cii hingir sarem sarem sha iwo, er iyôngo i i lu a orkuran ga nahan.+ Yehova kaa ér: ‘Mban ne mba a orvesen ga. De hanmô ve nana hide a yem hen ya u nan bem bem.’”
17 Tor u Iserael maa kaa a Yehoshafati ér: “Ashen m ôr u mer, ‘Una ôr akaaôron a profeti a dedoo sha a mo ga, a lu a bo tseegh’ gaa?”+
18 Mikaia gema kaa ér: “Nahan yô, ungwa kwaghôron u Yehova ne: M nenge a Yehova tema sha ikyônough nagh ki torough,+ akum a sha+ cii tile un ken iyan man ken imese.+
19 Tsô Yehova pine ér, ‘Ka an nana za bume Ahaba tor u Iserael, una kôndo a za kpe hen Ramoti-gileadi?’ Or môm nan ôr kwagh ngun, orgen nan ôr kwagh ngura.
20 Maa jijingi*+ ugen due va tile sha ishigh ki Yehova, kaa ér, ‘Mo me bume un.’ Yehova maa pine un ér, ‘U bume un nena?’
21 A gema a kaa ér, ‘Me due me za er uprofeti nav cii, vea ôr akaa a aiegh.’ Nahan a kaa ér, ‘U bume un, een, u fatyô u bumen un. Za ase za er nahan.’
22 Man hegen yô, Yehova er uprofeti ou mban ôr akaa a aiegh,+ Yehova kaa ér kwagh a tser u.”
23 Tsô Sedekia+ wan u Kenaana kporom za ta Mikaia+ sambe sha wase,+ pine un ér: “Ka hanma gbenda jijingi u Yehova a undum, a kar a za lamen a wee?”+
24 Mikaia gema kaa ér: “Nenge! U nenge a gbenda la sha iyange i u yevese, u za nyôr ken iyou i ken atô wer u yer la.”
25 Tor u Iserael maa kaa ér: “Kôr Mikaia za na sha ikyev i Amon orhemen u gar, man Yoashi wan u tor.
26 Kaa a ve wer, ‘Ka kwagh u tor a kaa ne, ér: “Kende nen orne ken purusu,+ naan nen un beredi man mngerem cuku cuku zan zan me kar hiden bem bem.”’”
27 Kpa Mikaia kaa ér: “Aluer u hide bem bem yô, Yehova ôr kwagh a mo ga.”+ Shi a kaa ér: “Ver nen ishima, ne ior cii.”
28 Tsô tor u Iserael man Yehoshafati tor u Yuda kôndo za ken Ramoti-gileadi.+
29 Tor u Iserael maa kaa a Yehoshafati ér: “Mo me yer iyol me za ken utya, kpa we gema hua akondo ou a tor.” Nahan tor u Iserael yer iyol, maa ve za nyôr ken utya.
30 Hen shighe ne, tor u Shiria kaa a ukurmbautyaav mba akekeautya a na ér: “De nôngon nen ityav a orgen ga, mbautyaav shin mbahemenev kpaa ga, saa tor u Iserael tseegh.”
31 Ukurmbautyaav mba akekeautya la mba nengen a Yehoshafati nahan maa, ve ôr a ayol a ve ér: “Ka tor u Iserael je ne.” Nahan ve gema ishigh ve ver sha a na ér vea nôngo ityav a na; maa Yehoshafati gba vaan ér i wase un,+ tsô Yehova wase un, maa fese je Aôndo kar a ve hen a na kera.
32 Ukurmbautyaav mba akekeautya la, mba nengen ér ka tor u Iserael ga yô, fese je, ve de u zendan un.
33 Kpa orgen gba keren ivaan tsô,* maa i za ta tor u Iserael hen ijuan i rigautya na. Nahan tor kaa a orhendan un ikyekyeutya ér: “Goom due a mo ken utya* kera, sha ci u i vihim iyol kehelee.”+
34 I nôngo ityav taveraa sha iyange la cii, nahan ve sue tor u Iserael tema sha, shin ikyekyeutya na la, ver ishigh sha Mbashiria zan zan aikighe; maa a va kpe hen shighe u iyangemiren.+
