Kroniku u sha Uhar 28:1-27
28 Ahashi+ lu anyom 20 shighe u tema tor la, a hemen ken Yerusalem anyom 16. A er kwagh u dedoo sha ishigh ki Yehova, er ter na u tamen Davidi er nahan ga.+
2 Kpa a gema a zende sha igbenda i ator a Iserael,+ shi a er ieev* mbi Baal mbi sha iyô+ je kpaa.
3 Heela tseegh ga, a na nagh shin Pev u Wan u Hinom* mnyim due, shi a nande ônov nav mba nomso ken usu,+ a dondo aeren a ndôhôrshima a akuraior+ a Yehova zenda a sha ishigh ki Mbaiserael kera la.
4 Lu nan iniav shi nanden iniav, mnyim duen sha ajiir a taven,+ man sha agungu man shin hanma itinekon u lun gese gese.+
5 Nahan Yehova Aôndo na na un sha ikyev i tor u Shiria,+ ve hemba un ityav, ve kura ior kpishi ve yem a mi uikyangen ken Damaseku.+ Shi i na un sha ikyev i tor u Iserael, a wua un ior kpishi.
6 Gadia Peka+ wan u Remalia wua iorov 120,000 ken Yuda iyange i môm; ve cii ve lu nomso mba taver asema, sha ci u ve undu Yehova Aôndo u uter vev.+
7 Shi Shikeri, orutya u Eferaim, wua Maaseia wan u tor man Aserikam, un u nengen sha ya u tor la, kua Elkana u cir ken tor la.
8 Heela tseegh ga, Mbaiserael kura anmgbianev vev 200,000 yem a mi uikyangen—kasev man ônov mba nomso man mba kasev; shi ve ya ishar kpishi, maa ve kura ishar la ve yem a mi ken Samaria.+
9 Kpa profeti u Yehova ugen lu her, i yilan un ér Odedi. A due a za kohol ikyumutya i i lu van ken Samaria la, a kaa a ve ér: “Nenge! Ka er yange ishima vihi Yehova Aôndo u uter enev a Yuda ve a gema ve a na sha ikyev yen ye,+ man ne wua ve sha ishimavihin je Aôndo ungwa kwagh ne.
10 Man hegen yô, ne soo u geman ior i Yuda man Yerusalem ikpan yen i nomso man i ukase.+ Man yô, ne kpa ne mba a ibo sha ishigh ki Yehova Aôndo wen.
11 Yô kegh nen ato a mo, hide nen a ior mba ne ker ken anmgbianev enev ne yem a ve uikyangen la, sha ci u ishima vihi Yehova a ven tsung.”
12 Sha nahan yô, mbahemenev mba Eferaim, Asaria wan u Yehohanan man Berekia wan u Meshilemoti man Yehisekia wan u Shalum man Amasa wan u Hadelai, ve hendan kwagh a mba ve hide ityav la,
13 ve kaa a ve ér: “De nyôron nen a mba ne hidi a ve uikyangen la heen ga, sha ci u kwagh la una na se lu a ibo sha ishigh ki Yehova. Kwagh u ne we ishima u eren la una na asorabo a ase aa seer ngeen, shi ibo yase kpa ia seer, gadia se vande mban a ibo kpishi shi ishima vihi Aôndo a Iserael tsung.”
14 Tsô ushoja mba ve lu a ikyav mbi utyaav la, gema ior mba ve hide a mi uikyangen la kua ishar i ve ya la,+ ve na mbahemenev man nongoior la cii.
15 Maa ior mba i tsua ve, mba i ter ati a ve la mough ngohol ior mba i hide a ve uikyangen la, shi ve dugh akondo ken ishar i i ya la ve na mba ve lu a ikyondo ga la cii. Nahan ve na ve akondo shi ve na ve akôv man kwaghyan man kwaghman man mkurem ma shighen. Ve hide a mba taver ve iyol ga la sha ujaki ve za na anmgbianev vev ken Yeriko, gar u avilegh la. Maa ve hide ken Samaria.
16 Hen shighe la, Tor Ahashi sôn ator a Ashiria iwasen.+
17 Mbaedom shi va nyôr ta ityav sha Yuda, ve kura ior ve yem a mi uikyangen.
18 Mbafiliti+ kpa va ta ityav sha Shefela+ man Negebi, agar a ken Yuda; ve ngohol Bete-shemeshi+ man Aiyalon+ man Gederoti man Soko kua ugeri nav mba ve kase un la, man Timna+ kua ugeri nav mba ve kase un la, man Gimso kua ugeri nav mba ve kase un la; maa ve tema her.
19 Yehova hide a Yuda ijime sha ci u Ahashi tor u Iserael, gadia a na Yuda taver ityough, ve er asorabo kpishi nahan ve hemba Yehova ato.
20 Ken masejime yô, Tilgati-pilneser+ tor u Ashiria va ta ityav sha a na, er un ican,+ a wase un ga.
21 Gadia Ahashi kura akaa a hen iyou i Yehova man a hen ya u tor+ man a hen uya mba mbahemenev za na tor u Ashiria iyua a mi; kpa wase un ga.
22 Hen shighe u Tor Ahashi lu yan ican la je kpa, hemba eren kwagh a Yehova sha mimi ga cii.
23 Maa a gba nan mbaaôndo mba Damaseku+ mba ve hemba un ityav la+ nagh, a kaa ér: “Mbaaôndo mba tor u Shiria mba wasen ve, nahan me na ve nagh sha er mo kpa vea wasem yô.”+ Kpa ve gema ve na un vea Iserael cii gbeev mbu nôngon.
24 Heela tseegh ga, Ahashi ngohol ikyav mbi ken iyou i Aôndo u mimi la; a hembe ikyav mbi ken iyou i Aôndo u mimi la avur avur,+ maa a wuhe ihinda i iyou i Yehova,+ a er atse a nan nagh sha ci na sha akahar a igbenda a ken Yerusalem cii.
25 Shi a er ajiir a taven sha ken agar a Yuda cii, sha u i naan mbaaôndo mbagenev iniav mnyim ma duen yô,+ nahan a vihi Yehova Aôndo u uter nav ishima.
26 Akaa agen ken yiase na cii, akaa a a er ken mhii zan zan mkur cii, i nger ken Takeda u Ator a Yuda man a Iserael.+
27 Tsô Ahashi kpe, i ii un vea uter nav ken gar ken Yerusalem, sha ci u ve za a na hen ajiir a i iin ator a Iserael la ga.+ Maa wan na Hesekia kar tema tor sha ityough nagh.
