Kroniku u sha Uhar 20:1-37
20 Mbamoabi+ man Mbaamon+ kua ior mbagen ken Mbaamonim,* va u va nôngon ityav a Yehoshafati.
2 Tsô i va kaa a Yehoshafati ér: “Zegeikpelaior i ken Edom+ mough hen haregh u zegemnger* va u nôngon ityav a we, mba ken Hasason-tamar, ka En-gedi je la.”+
3 Nahan mciem gba Yehoshafati iyol, maa a kange ishima* u keren Yehova.+ Tsô a yôô ér Yuda cii a hôr kwaghyan.
4 Ior i Yuda maa kohol imôngo ér vea pine Yehova kwagh;+ ve due ken agar a Yuda cii ve va u va pinen Yehova kwagh.
5 Tsô Yehoshafati tile sha ishigh ki nongoior u Yuda man Yerusalem ken iyou i Yehova sha ishigh ki tembe u he la,
6 maa a kaa ér:
“We Yehova Aôndo u uter asev, ka we u lu Aôndo u sha gaa?+ Ka we u hemen ityartor i akuraior cii gaa?+ Tahav man agee mba ken uwegh ough, or môm nana fatyô u nôngon kwagh a we ga.+
7 Aôndo wase, yange u zenda ior mba ve tema ken tar ne, sha ishigh ki ior ou Iserael maa u gema u, u na ônov mba* ijende you Aberaham wer u lu dyako ve gbem sha won gaa?+
8 Nahan ve tema ker, ve maa u icighanjiir her sha ci u iti you,+ ve kaa ér,
9 ‘Aluer kwaghbo va sha a vese, a lu sanker shin ijirôron i bo shin bouange gayô ijen gba yô, de se tile sha ishigh ki iyou ne man sha ishigh you (sha ci u iti you ngi hen iyou ne)+ se yila u ser wase se ken ican yase, nahan ungwa se shi yima se.’+
10 Nahan hegen yô, ior i Amon man i Moabi man i hen haregh u iwoogh u Seir+ mban; ka ve yange u venda a Mbaiserael wer ve de nyer ken tar ve shighe u ve due ken Igipiti la ga ye. Nahan Mbaiserael de ve, ve kera tim ve ga.+
11 Hegen yô, mba va oron iyev sha u va zendan se ken tar wou u u ne se wer u lu dyako wase ne.+
12 Aôndo wase, u tsaha ve gaa?+ Gadia se mba a tahav sha zegeikpelaior i i lu van ityav sha a vese ne ga; shi se fa kwagh u se er ga,+ kpa ashe a ase nga sha a we.”+
13 Hen shighe ne ior i Yuda cii, vea kasev vev man mbayev vev* mba kiriki man mbaganden cii tile sha ishigh ki Yehova.
14 Tsô jijingi u Yehova sen sha Yahashiel, wan u Sekaria wan u Benaia wan u Yeiel wan u Matania, Orlevi u ken ônov mba Asav, hen atô u nongoior la.
15 A kaa ér: “Kegh nen ato, ne Yuda cii man ne mba ne tem ken Yerusalem la, kua we Tor Yehoshafati! Ka kwagh u Yehova a lu ôron a ven je ne ér, ‘De cie nen ga, shi de gbidi nen akarkase iyol sha ci u zegeikpelaior ne kpaa ga, gadia ityav mbin ka mbi yenegh ga, kpa ka mbi Aôndo.+
16 Kper sen nen za nôngo nen ityav a ve. Vea lu kôndon van sha gbenda u i yer ér Shise la; ne zua a ve hen ape pev* la a kighir la, sha ishigh ki taaikyôngo u Yeruel.
17 Ka ne i gbe u ne nôngo ityav mbin ga. Tôô nen ian, tile nen gir gir+ nenge nen er Yehova una yima ne yô.*+ We Yuda man Yerusalem, de cie nen ga shi de gbidi nen akarkase iyol kpaa ga.+ Kper due za nôngo nen ityav a ve, Yehova una lu a ven.’”+
18 Fese je Yehoshafati gure cir ishigh inya, maa Yuda man ior mba ken Yerusalem cii yav inya sha ishigh ki Yehova, u civir Yehova.
19 Tsô Mbalevi mba ve lu ônov mba Kohati+ man mba ve lu ônov mba Kora la, mough sha wuese Yehova Aôndo u Iserael sha ikyenge i genger genger.+
20 Kpernan ve due pepe pepe ve yem ken taaikyôngo u Tekoa.+ Shighe u ve due u yemen la, Yehoshafati mough tile sha kaa ér: “Kegh nen ato a mo, we Yuda man ne ior mba ken Yerusalem! Na nen Yehova Aôndo wen jighjigh sha er ne fatyô u tilen dông* yô. Na nen uprofeti nav jighjigh,+ nahan kwagh a za a ven a doo.”
21 Ze idyu a ior been kera yô, a tsua nomso ér ve haa uicighanmbaakondov iyol, ve zaan mbautyaav sha hemen, ve waan Yehova icam,+ ve wuese un, ve kaan ér: “Wuese nen Yehova, gadia dooshima na ka u been mayange ga.”+
22 Mba ngur wan atsam a iwuese saan saan yô, Yehova er ityav va sha ior i Amon aburabur, kua i Moabi man ior mba hen haregh u iwoogh u Seir, mba ve nyôr ve ngohol Yuda la, nahan ve wua ayol a ve.+
23 Tsô Mbaamon man Mbamoabi hide ta ityav sha ior mba hen haregh u iwoogh u Seir,+ wua ve, tim ve kera; mba woo ior i Seir mba been yô, ve hide ve wua ayol a ve.+
24 Kpa Yuda ve hen iyoukura i ken taaikyôngo la,+ gem kenger vegher u ikpelaior lu la yô, ve nenge a akom a ve hen inya gbulugh gbulugh;+ or môm war ga.
25 Tsô Yehoshafati vea ior nav va u va yan ve ishar, nahan ve kura akaa kpishi man akondo hen ior mbara, kua akaainjaa a ve er a sha iyol i ior mba ve kpe la. Ve kura a zan zan ve fatyô u been ga.+ Yange tôô ve ayange atar u yan ishar, sha ci u i ngee je gande.
26 Sha iyange i sha unyiin yô, ve kohol imôngo hen Pev* u Beraka, sha ci u lu her ve wuese* Yehova ye. Ka nahan ve ve ii ijiir la iti ér Pev u Beraka*+—zan zan nyian ye.
27 Tsô ior i Yuda man Yerusalem cii, vea Yehoshafati u lu orhemen ve la, hide ken Yerusalem saan saan, gadia Yehova na ve ember sha er ve hembe mbahyomov vev ityav yô.+
28 Nahan ve va nyôr ken Yerusalem a akaa a kuhwan kwagh a lun a ikyar man mbaadiguve+ kua ibusa,+ maa ve kar ve za nyôr ken iyou i Yehova.+
29 Tsô mciem ma Aôndo gba ior mba ken ityartor i ken ityar la cii iyol, shighe u ve ungwa ér Yehova nôngo ityav a mbahyomov mba Iserael la.+
30 Sha nahan yô, ayôôso kera lu ken tartor u Yehoshafati ga, shi Aôndo na za hemen u nan un mmem hanma vegher cii.+
31 Yehoshafati za hemen u hemen Yuda, lu anyom 35 shighe u tema tor la, a hemen ken Yerusalem anyom 25. I yilan ngô na ér Asuba, lu wan u Shilhi.+
32 Lu zenden sha igbenda i Asa ter na.+ A undu i ga, a er kwagh u vough sha ishigh ki Yehova.+
33 Nahan kpa, i bee a ajiir a taven la ga+ shi ior lu a sôr asema a ve sha ci u Aôndo u uter vev ga.+
34 Akaa agen ken yiase i Yehoshafati cii, ken mhii zan zan mkur yô, i nger a imôngo a akaaôron a Yehu+ wan u Hanani,+ a i wa ken takeda u ator a Iserael la.
35 Shighe ne kar kera yô, Yehoshafati tor u Yuda za ya ijende a Ahashia tor u Iserael, u lu iferor la.+
36 Tsô a ya ijende a na sha u eren utso mba zan ken Tarshishi;+ nahan ve er utso hen Eshion-geber.+
37 Nahan kpa, Elieser wan u Dodavahu u Maresha ôr kwaghôron u profeti sha Yehoshafati, kaa ér: “Er u ye ijende a Ahashia yô, Yehova una vihi ityom you kera.”+ Nahan utso mbara hembe,+ ve kera fatyô u zan ken Tarshishi ga.
Ngeren mba shin kpe
^ Shin a fatyô u kaan ér, “Mbameuni.”
^ Ikyav tese ér, ka Zegemnger u Kuugh.
^ Zwa Heberu, “ver ishigh.”
^ Zwa Heberu, “vor u.”
^ Zwa Heberu, “ônov vev mba nomso.”
^ Shin “uwagh.”
^ Shin “nenge nen er Yehova una va ne a myom yô.”
^ Shin “wan ishima.”
^ Shin “Pev u Lun Gburumaa.”
^ Zwa Heberu, “ver.”
^ Inja na yô ér, “Iveren.”
