Kroniku u sha Uhar 14:1-15
14 Tsô Abiya kpe, i ii un vea uter nav ken Gar u Davidi;+ maa wan na Asa kar tema tor sha ityough nagh. Sha ayange a na la, tar la zua a mmem anyom pue.
2 Asa er kwagh u dedoo man u vough sha ishigh ki Yehova Aôndo na.
3 A bee a atse a nan nagh a akuraior+ man ajiir a taven sha; a hembe mtôm ma akombom ma awenem+ shi a gber mtôm ma akombom ma sha ikyon* kera.+
4 Heela tseegh ga, a ôr Mbayuda ér ve ker Yehova Aôndo u uter vev, shi ve kuran Tindi na man hanma kwagh u a kaa ér ve eren cii.
5 Tsô a bee a ajiir a taven a ken agar a Yuda la cii, kua atse a nanden insensi.+ Shighe u lu hemen la, bem gba ken tartor la.
6 A maa agar a lun a ugir mba taver ken Yuda,+ gadia bem gba ken tar la; shi ken anyom la cii i nôngo ityav a na ga, sha ci u Yehova na un mmem.+
7 A kaa a Yuda ér: “De se maa nen agar ne, se wa a ugir se ningir se tser shi se maa ayou a kuran,+ se wa ihinda* man uishindan. Gadia tar ne ngu sha ikyev yase her, sha ci u se ker Yehova Aôndo wase. Se ker un, nahan a na se mmem sha ikyev i mbahyomov asev mba ve kase se la cii.” Tsô ve maa hanma kwagh ve bee.+
8 Asa lu a ikyumutya iorov 300,000; ve lu ior mba ken Yuda, mba ve lu a ipyerutya i vesen man awange yô. Ken Benyamin yô, lu a mbautyaav mba ageev 280,000 mba ve lu a ipyerutya i kiriki* shi ve fa u hendan ada yô.+
9 Shighe kar yô, Sera Oretiopia va a ikyumutya iorov 1,000,000 man akekeautya 300 va ta num sha a ve.+ Za nyer Maresha yô,+
10 Asa due u za nôngon ityav a na, nahan ve kase u nôngon ityav shin Pev u Sefata hen Maresha.
11 Asa maa yila Yehova Aôndo na+ kaa ér: “We Yehova, aluer mba u lu wasen ve la vea ngee shin vea lu a tahav ga kpa, ka kwagh u kwagh a gbe u sha mi la ga.+ Wase se Yehova Aôndo wase, sha ci u se mba suur sha a we,+ shi ka ken iti you se ve u nôngon ityav a ikpelaior ne ye.+ We Yehova, u ngu Aôndo wase. De deen wer orumace u kaka ne a hemba se ityav ga.”+
12 Tsô Yehova hemba Mbaetiopia ityav sha ishigh ki Asa man sha ishigh ki Yuda, nahan Mbaetiopia yevese.+
13 Asa man ior mba ve lu vea na la zenda ve ijime zan zan za nyôr Gerar,+ nahan Mbaetiopia kpe zan zan or ve môm kera shi uma ga, gadia Yehova man ikyumutya na tim ve gburu gburu. Mba been yô, ve kura ishar kpishi ve yem a mi.
14 Heela tseegh ga, ve tim agar a a kase Gerar la cii, gadia Yehova na mciem gba ve iyol; nahan ve ya ishar ken agar la cii, sha ci u akaa a yan ishar sha mi lu ker kpishi.
15 Shi ve ta num sha utenti mba ior mba ve lu a ilev la, ve kura iyôngo man urakumi kpishi. Mba been yô, ve hide ve yem ken Yerusalem.
Ngeren mba shin kpe
^ Nenge Ngeren u Pasen Asember, “Ityôgh ki akombough ki sha kon.”
^ Zwa Heberu, “ihinda i bughun gbidyen keen man keen.”
^ Perutya u kiriki u ashighe kpishi mbakerenavaan yange ve lu a mi la.
