Kroniku u sha Uhar 10:1-19
-
Iserael hemba Rehoboam ato (1-19)
10 Tsô Rehoboam yem ken Shekem,+ sha ci u Iserael cii va ken Shekem u va nan un tor.+
2 Yeroboam+ wan u Nebati ongo kwagh ne yô, (gadia a lu ken Igipiti her, sha ci u yange yevese Tor Solomon)+ fese je Yeroboam mough ken Igipiti hide.
3 Nahan ve tindi ér a hide, maa Yeroboam man Iserael cii, va hen Rehoboam va kaa ér:
4 “Teru yange tôô se ikyav mbi yuhwan kpishi.+ Kpa aluer u pande tom u sha ican u teru na se lu eren la, shi u heghem ikyav mbi yuhwan mbi tôô se la yô,* se eren we tom.”
5 Tsô a kaa a ve ér: “Yem nen; ayange atar a karen yô, hide va nen hen a mo.” Nahan ior yem.+
6 Tor Rehoboam maa za idyu a mbaganden* mba yange ve er ter na Solomon tom shighe u lu uma la, a pine ve ér: “Ka nyi ne nenge ner doo u me ôr a ior mbana?”
7 Ve kaa a na ér: “Aluer u ngu eren a ior mban doo doo, shi u ngu eren kwagh u sha ishima ve shi u ôr kwagh a ve kundu kundu yô, vea eren we tom hanma shighe.”
8 Nahan kpa, a venda kwaghwan u mbaganden* wa un la, a yem a za tume idyu a agumaior a ve vese imôngo, a a lu eren un tom hen shighe ne la.+
9 A pine ve ér: “Ka nyi ne nenge ner, doo u me za ôr a ior mba ve kaa a mo ér, ‘Heghem se ikyav mbi teru a tee se ne’ laa?”
10 Tsô agumaior a ve vese imôngo la kaa a na ér: “Ka kwagh u u ôr a ior mba ve kaa a we ér, ‘Teru yange tôô se ikyav mbi yuhwan, kpa we gema heghem se ikyav la’; ka kwagh u u ôr a ve je ne, ‘Me na ne ican a hemba ican i terem yange na ne la ica je.*
11 Terem yange tôô ne ikyav mbi yuhwan, kpa mo me gema me seer ne ikyav. Terem yange tsaha ne sha mbaakpa, kpa mo me gema me tsaha ne sha ukwagil.’”
12 Nahan Yeroboam man ior cii, hide va hen Rehoboam sha iyange i sha utar la, vough er tor kaa nahan, ér: “Hide va nen hen a mo sha iyange i sha utar.”+
13 Kpa tor lam a ve nyang nyang. Kape Tor Rehoboam venda kwaghwan u mbaganden* wa un la.
14 A ôr ve kwagh u agumaior wa un la, a kaa ér: “Me tôô ne ikyav mbi hemban yuhwan, shi me seer mbi kpaa. Terem yange tsaha ne sha mbaakpa, kpa mo me gema me tsaha ne sha ukwagil.”
15 Nahan tor kegh ato a ior ga, sha ci u lu Aôndo u mimi na kwagh lu nahan ye,+ sha er kwagh u Yehova ôr a Yeroboam wan u Nebati sha ikyev i Ahiya,+ Orshilo la una kure shami yô.
16 Mbaiserael cii mba nengen er tor a vende u keghen ato a ve yô, ior kaa a tor ér: “Se mba a kwar ken Davidi? Se mba a dyako ken wan u Yese ga. Ne Mbaiserael, hanma or nana yem hen mbaaôndo mba nan. Hegen yô, we Davidi, nenge sha ya wou.”+ Nahan Mbaiserael cii hide yem sha uya* vev.+
17 Kpa Rehoboam za hemen u hemen Mbaiserael mba ve lu ken agar a Yuda la her.+
18 Tor Rehoboam maa tindi Hadoram,+ un u nengen sha mba i kighir ve, ve lu eren tom u kpan la, kpa Mbaiserael ta un awen a kpe. Tor Rehoboam nôngo unde sha ikyekyeutya na yevese yem ken Yerusalem.+
19 Nahan Mbaiserael gema ijime a ya u Davidi zan zan nyian.
