Kroniku u sha Uhar 24:1-27
24 Yehoashi lu anyom ataankarahar shighe u tema tor la,+ a hemen ken Yerusalem anyom 40. I yilan ngô na ér Shibia, un lu kwase u ken Bersheba.+
2 Yehoashi lu eren kwagh u vough sha ishigh ki Yehova, sha ayange a pristi Yehoyada lu uma la cii.+
3 Yehoyada vôso kasev uhar na un, a mar ônov mba nomso man mba kasev.
4 Shighe kar yô, sar Yehoashi u sôron iyou i Yehova.+
5 Nahan a kohol upristi man Mbalevi imôngo, a kaa a ve ér: “Due za nen ken agar a Yuda za ngohol nen inyaregh hen Mbaiserael cii, sha er a sôron iyou i Aôndo wen+ hanma inyom yô; shi er nen kwagh sha kwagh ne fese.” Kpa Mbalevi er kwagh sha mi fese ga.+
6 Tsô tor yila orhemen Yehoyada pine un ér:+ “Er nan u kaa a Mbalevi wer ve za ken Yuda man Yerusalem ve za va a icighankpandegh ku Mose+ ortom u Yehova wa la ga? Ka icighankpandegh ku nongoior u Iserael ua ta sha ci u tenti u Shiada la je la.+
7 Gadia ônov mba Atalia,+ iferkwase la vihi iyou i Aôndo u mimi nyôr+ za kura uicighanmbaakaav mba ken iyou i Yehova la cii, ve za civir Ubaal a mi.”
8 Nahan tor na zwa i er akwati+ i ver ken won, hen hunda u iyou i Yehova.+
9 Mba been yô, i yôô ken Yuda man Yerusalem cii ér, i va Yehova a icighankpandegh+ ku Mose ortom u Aôndo u mimi wa Mbaiserael ken taaikyôngo la.
10 Mbahemenev cii kua ior cii ember,+ nahan ve lu van a uiyua va haan shin akwati la zan zan a kar ivin.*
11 Hanma kwa u Mbalevi vea nenge ér i haa inyaregh kpishi ken akwati la yô, ve tôô un ve va a mi hen tor, nahan akawe u tor man or u wasen pristi u tamen tom ve va, ve va dugh inyaregh ki ken akwati la,+ shi ve hide ve yem a mi ve za ver hen ijiir na. Lu kwagh u ve eren ayange ayange je ne, nahan ve kohol inyaregh kpishi.
12 Maa tor kua Yehoyada ve gema ki ve na mba ve nengen sha tom u i lu eren sha iyou i Yehova la, nahan ve di ve za tôô mbatôndon-awen man mbafantomaveegh ér ve va sôr iyou i Yehova,+ kua mbaeren tom a iyôgh man togula ér ve va sôr iyou i Yehova.
13 Tsô mba ve lu nengen sha tom la hii tom, i za hemen u eren tom u hiden sôron akaa ne sha hemen ve, nahan ve sôr iyou i Aôndo u mimi la i hide i lu er yange i vande lun nahan; ve sôr i i seer taver.
14 Mba been a bee nahan maa ve va a inyaregh ki ki neer la hen tor man Yehoyada, nahan ve tôô ki ve er ikyav sha ci u iyou i Yehova, man ikyav mbi eren tom a mi man ikyav mbi nan iniav man ukôôpu, kua ikyav mbi sha zanaria man azurufa.+ Ve naan iniav mbi nanden+ hen iyou i Yehova hanma shighe sha ayange a Yehoyada lu uma la cii.
15 Yehoyada tse anyom kpishi been iyol yô, a kpe; a kpe sha anyom 130.
16 Nahan ve ii un ken Gar u Davidi vea utor,+ sha ci u yange er kwagh u dedoo ken Iserael+ sha kwagh u Aôndo u mimi man iyou Na.
17 Yehoyada kpen kera yô, mbahemenev mba Yuda va gure tor inya, nahan tor kegh ato a ve.
18 Ve gba kenden iyou i Yehova Aôndo u uter vev dang tsô, ve yem civir mtôm ma akombom ma sha ikyon* man ieev, nahan ishima vihi Aôndo a Yuda man Yerusalem sha ci u isholibo ve la.
19 Yehova zer tindin uprofeti hen a ve ér ve za hide a ve hen a na; ve lu tan ve icin* kpa ve venda u keghen ato.+
20 Tsô jijingi u Aôndo sen sha* Sekaria wan u pristi Yehoyada,+ nahan a tile sha ijiir i taven a lam a ior a kaa ér: “Ka kwagh u Aôndo u mimi a kaa ne, ér, ‘Er nan ne lu peren atindi a Yehova? Kwagh a za a ven a doo ga! Gadia ne undu Yehova, nahan un kpa una undu ne.’”+
21 Kpa ve zua zwa sha a na,+ nahan tor na zwa ve ta un awen hen tembe u iyou i Yehova.+
22 Kape Tor Yehoashi umbur dooshima u ter* na Yehoyada tese un la ga je la, nahan a wua wan na. Shighe u wan na lu kpen la kaa ér: “Yehova a nenge kwagh ne, nahan a tsaha u.”+
23 Inyom va hiin yô, ikyumutya i Shiria va ta ityav sha Yehoashi, ve nyôr ken Yuda man Yerusalem.+ Tsô ve bee a mbahemenev mba ior mbara cii,+ maa ve tindi a ishar i ve ya la cii hen tor u Damaseku.
24 Er ikyumutya i Shiria i i va nyôr la vese iyenge ga nahan kpa, Yehova na ikyumutya i vesen i vesen sha ikyev ve,+ sha ci u ve undu Yehova Aôndo u uter vev; nahan ve* va a mtsaha u Aôndo sha Yehoashi.
25 Maa ve undu un ve yem (sha ci u ve vihi un iyol kehelee*), nahan mbatomov nav zua zwa sha a na sha ci u awambe a ônov mba pristi Yehoyada+ a a haa inya la. Ve wua un sha gambe na.+ Tsô a kpe ve ii un ken Gar u Davidi,+ kera lu hen ajiir a iin ator ga.+
26 Lu ior mba ve zua zwa+ sha a na je ne: Sabadi wan u Shimeati, ngô na lu Wan-amon man Yehoshabadi wan u Shimeriti, ngô na lu Wan-moabi.
27 Sha kwagh u ônov nav mba nomso man akaa kpishi a i ta un icin sha mi la,+ kua kwagh u sôron* iyou i Aôndo u mimi la yô,+ i nger akaa ne cii ken ngeren mba takeda u Utor. Maa wan na Amashia kar tema tor sha ityough nagh.
Ngeren mba shin kpe
^ Shin a fatyô u kaan ér, “zan zan ve cii ve kar nan.”
^ Nenge Ngeren u Pasen Asember, “Ityôgh ki akombough ki sha kon.”
^ Shin “ve lu eren shiada nan ve ibo.”
^ Zwa Heberu, “cir.”
^ Ka ter u Sekaria je la.
^ Ka Mbashiria je la.
^ Shin “ve undu un a iangev kpishi.”
^ Zwa Heberu, “wan ityô i.”
