Kroniku u sha Uhar 17:1-19
17 Tsô wan na Yehoshafati+ kar tema tor sha ityough nagh, a taver hementor na sha Iserael.
2 A ver akumautya ken agar a Yuda a lun a ugir mba taver la cii, shi a ver mbautyaav ken tar u Yuda man ken agar a Eferaim a ter na Asa ngohol la.+
3 Yehova za hemen u lun a Yehoshafati, sha ci u a zende sha igbenda i ngise ter na Davidi zende la,+ a ker u civir ieev mbi Baal ga.
4 Gadia a ker Aôndo u ter na,+ shi a dondo* tindi na, a dondo aeren a Iserael ga.+
5 Yehova ver tartor la sha ikyev na taver gbang;+ shi Yuda cii za hemen u nan Yehoshafati uiyua, nahan a hingir u lun a inyaregh man icivir kpishi.+
6 Er lu zenden sha igbenda i Yehova yô, a taver ishima je yô a bee a ajiir a taven+ man mtôm ma akombom ma sha ikyon*+ ken Yuda kera.
7 Ken inyom i sha utar i hemen na la, a tindi ér mbahemenev nav ve va, ve va tesen ken agar a Yuda, lu Ben-hail man Obadia man Sekaria man Netanel kua Mikaia.
8 Mbalevi lu vea ve: Lu Shemaia man Netania man Sebadia man Asahel man Shemiramoti man Yehonatan man Adoniya man Tobiya kua Tob-adoniya; pristi Elishama man pristi Yehoram lu vea ve imôngo.+
9 Tsô ve gba tesen ken Yuda, ve lu a takeda u Tindi u Yehova,+ ve lu zenden ken agar a Yuda cii tesen ior.
10 Tsô Yehova na mciem gba ityartor i ken ityar i i kase Yuda la cii iyol, nahan ve kera nôngo ityav a Yehoshafati ga.
11 Mbafiliti va Yehoshafati a uiyua man inyaregh va ta un kpandegh. Mbaarabia dugh anomaiyôngo 7,700 man ukpev 7,700 ken ilev vev va na un.
12 Yehoshafati lu lun a tahav seer a seer,+ shi za hemen u maan ajiir a lun a ugir mba taver+ man agar a koson akaa+ ken Yuda.
13 Lu eren ityom kpishi ken agar a Yuda, shi lu a ushoja, mbautyaav mba ageev ken Yerusalem.
14 I pav ve ker sha uya mba uter vev: ken Yuda yô, mbahemenev mba ior dubu dubu lu Adena orhemen, mbautyaav mba ageev iorov 300,000 lu vea na.+
15 Orhemen Yehohanan lu sha ikyev na, mbautyaav iorov 280,000 lu vea Yehohanan.
16 Shi Amashiya wan u Shikeri, u na iyol na u eren tom u Yehova la kpa lu sha ikyev na, mbautyaav mba ageev iorov 200,000 lu vea na.
17 Ken Benyamin+ yô lu Eliada, un lu orutya u ageegh, mbautyaav iorov 200,000 lu vea na, lu ior mba i tsaase ve u eren tom a ada man perutya tsembelee yô.+
18 Yehoshabadi lu sha ikyev na, mbautyaav iorov 180,000 lu vea na, ve lu ior mba i tsaase ve u nôngon ityav tsembelee yô.
19 Ior mban lu eren tor tom, seer sha ior mba tor ver ken agar a lun a ugir mba taver ken Yuda cii la.+
Ngeren mba shin kpe
^ Zwa Heberu, “zende sha.”
^ Nenge Ngeren u Pasen Asember, “Ityôgh ki akombough ki sha kon.”
