Kroniku u sha Uhar 21:1-20
21 Tsô Yehoshafati kpe, i ii un vea uter nav ken Gar u Davidi; wan na Yehoram kar tema tor sha ityough nagh.+
2 Anmgbianev nav, ka ônov mba Yehoshafati mba nomso je la; ve yô, lu Asaria man Yehiel man Sekaria man Asaria man Mikael kua Shefatia; ve mban cii ve lu ônov mba Yehoshafati tor u Iserael.
3 Ter ve na ve uiyua mba azurufa man zanaria kpishi, man akaainjaa, kua agar a ken Yuda a lun a ugir mba taver;+ kpa tartor yô, a gema a na Yehoram+ sha ci u lu wan u hiihii.
4 Yehoram tem sha ikyônough ki torough ki ter na yô, a wua anmgbianev nav cii+ sha sanker, kua mbahemenev mba Iserael mbagen, sha er una za hemen u hemen yô.
5 Yehoram lu anyom 32 shighe u hingir tor la, a hemen ken Yerusalem anyom anigheni.+
6 A zende sha gbenda u ator a Iserael,+ vough er mba hen ya u Ahaba er nahan, sha ci u vôso wan u Ahaba,+ shi za hemen u eren kwaghbo sha ishigh ki Yehova.
7 Kpa Yehova soo u van a mtim sha ya u Davidi ga, sha ci u ikyur i ya a Davidi la.+ Gadia yange tôndo zwa ér una na un imenger, un kua ônov nav mba nomso gbem.+
8 Sha ayange a na la Edom hemba Yuda ato,+ ver tor na.+
9 Tsô Yehoram man ukurmbautyaav nav per a akekeautya a na cii, maa a za mough tugh a hemba Mbaedom mba ve kase un la ityav, kua ukurmbautyaav mba akekeautya la.
10 Kpa Edom za hemen u hemban Yuda ato zan zan nyian. Libena+ kpa hemba un ato hen shighe la, sha ci u a undu Yehova Aôndo u uter nav.+
11 Shi a er ajiir a taven+ sha iwo i Yuda sha er una na ior mba ken Yerusalem ve de kera civir Aôndo sha mimi ga yô,* nahan a na Yuda tsume.
12 Shighe kar yô, loho u profeti Eliya+ nger tindi yô va nyôr a na, ú kaa ér: “Ka kwagh u Yehova Aôndo u teru u tamen Davidi a kaa je ne, ér, ‘U zende sha igbenda i teru Yehoshafati,+ shin sha igbenda i Asa+ tor u Yuda ga.
13 Kpa u zende sha gbenda u ator a Iserael,+ nahan u na Yuda man ior mba ken Yerusalem kera civir Aôndo sha mimi ga,*+ er ya u Ahaba kpa kera civir Aôndo sha mimi ga* nahan,+ shi anmgbianev ou mba hen ya u teru mba ve hembe doon inja a we la je kpa, u wua ve kera.+
14 Sha nahan yô, Yehova una tsaha ior ou man ônov ou kua kasev ou tsung, shi una vihi akaa a u lu a mi cii.
15 Nahan u ya ican a iangev kpishi, kua angev mbu sha agaramyaa, zan zan agaramyaa a ou aa haa won sha ci u angev mbura; a lu nahan ayange ayange.’”
16 Tsô Yehova mgbegha+ Mbafiliti*+ man Mbaarabia+ mba ve lu ikyua a Mbaetiopia la, va ta ityav sha Yehoram.
17 Nahan ve nyôr ken Yuda sha agee, ve za kura akaa a ve zua a mi ken ya u tor la cii+ ve yem a mi, kua ônov nav man kasev nav; lu wan na u masetyô Yehoahashi*+ tseegh mase shin her ye.
18 Akaa ne cii nga eren kera yô, Yehova ta un icôronuange sha agaramyaa.+
19 Ken masejime, shighe u anyom kar ahar la, agaramyaa a na due haa won sha ci u angev nav mbura, nahan ye ican a angev nav mbun tsung yô, a kpe; shi ior nav nande usu sha ci na, er ve nande sha ci u uter nav nahan ga.+
20 Yehoram lu anyom 32 shighe u hingir tor la, a hemen anyom anigheni ken Yerusalem. Or môm vaa afanyô sha ku na ga. Nahan ve ii un ken Gar u Davidi,+ kpa lu hen ajiir a iin ator ga.+
