Kroniku u sha Uhar 36:1-23
36 Maa ior i tar la tôô Yehoahashi+ wan u Yoshia ver un tor sha ityough ki ter na+ ken Yerusalem.
2 Yehoahashi lu anyom 23 shighe u hingir tor la, a hemen iwer itiar ken Yerusalem.
3 Nahan kpa, tor u Igipiti dugh un tor hen Yerusalem kera, maa wa tar la kpandegh azurufa utalenti* 100 man zanaria talenti môm.+
4 Heela tseegh ga, tor u Igipiti ver Eliakim anmgbian u Yehoahashi tor sha Yuda man Yerusalem, maa a gema un iti hingir Yehoyakim; kpa Neko+ gema hide a anmgbian na Yehoahashi ken Igipiti.+
5 Yehoyakim+ lu anyom 25 shighe u hingir tor la, a hemen anyom 11 ken Yerusalem. A za hemen u eren kwaghbo sha ishigh ki Yehova Aôndo na.+
6 Nebukadinesar+ tor u Babilon kôndo va ta ityav sha a na, sha er una kange un sha mshirim ma togula mhar, una tôô un a yem a mi ken Babilon yô.+
7 Shi Nebukadinesar tôô ikyav mbigen ken iyou i Yehova, yem a mi ken Babilon za ver mbi ken iyou na i tor ken Babilon.+
8 Akaa agen ken yiase i Yehoyakim cii, akaa a ndôhôr ishima a a er, man kwaghbo u i zua un a mi la, i nger ken Takeda u Ator a Iserael man a Yuda; maa wan na Yehoyakin kar tema tor sha ityough nagh.+
9 Yehoyakin+ lu anyom 18 shighe u hingir tor la, a hemen iwer itiar man ayange pue ken Yerusalem; a za hemen u eren kwaghbo sha ishigh ki Yehova.+
10 Sha mhii u inyom* yô, Tor Nebukadinesar tindi ér i za va a na ken Babilon,+ kua akaainjaa a ken iyou i Yehova la.+ Maa a ver Sedekia anmgbian u ter na tor sha Yuda man Yerusalem.+
11 Sedekia+ lu anyom 21 shighe u hingir tor la, a hemen anyom 11 ken Yerusalem.+
12 A za hemen u eren kwaghbo sha ishigh ki Yehova Aôndo na. A hide a iyol ijime sha ishigh ki profeti Yeremia,+ un u Yehova ôron un kwagh u una ôr la ga.
13 Shi a hemba Tor Nebukadinesar ato,+ un u kaa ér a bum ken iti i Aôndo la, kpa a taver ityough,* a cighir ishima a venda u hiden hen Yehova Aôndo u Iserael.
14 Upristi mba ve lu hemen la cii, kua ior za hemen u eren akaabo shi eren akaa a ndôhôr ishima a akuraior la cii, shi ve hôngor iyou i Yehova+ i tsegha ken Yerusalem la.
15 Yehova Aôndo u uter vev za hemen u tan ve icin sha ikyev i mbaôron-loho nav, lu tan ve icin kwa kimbir kimbir, sha ci u mhôônom kôr un a ior nav man a ijiir na i teman.
16 Kpa ve za hemen u sen mbaôron-loho mba Aôndo u mimi,+ ve nenge mkaanem nam dang+ shi ve naha uprofeti nav tar,+ zan zan ishima vihi Yehova a ior nav pev,+ zan zan kar u a yima ve.
17 Nahan a va a tor u Mbakaldi va ta ityav sha a ve,+ wua agumaior a ve sha sanker+ ken iyou i icighanjiir ve la;+ kunya kôr un a gumor shin iniunkwase shin orbeenyol shin or u lun kor kor kpaa ga.+ Aôndo na hanma kwagh sha ikyev na.+
18 A kura ikyav mbi ken iyou i Aôndo u mimi cii, akaa a vesen man a kiriki, kua akaainjaa a ken iyou i Yehova man akaainjaa a tor man mbahemenev nav, a yem a hanma kwagh cii ken Babilon.+
19 A nande iyou i Aôndo u mimi,+ a hembe kpekpe u Yerusalem,+ a nande ayou a na a taven a lun a ugir mba taver la cii sha usu, a vihi hanma kwagh u injaa cii.+
20 A kôr ior mba ve war sanker la a yem a ve uikyangen ken Babilon,+ ve za hingir mbashiren un+ man ônov nav zan zan tartor u Pershia hii u hemen,+
21 sha u kuren kwagh u Yehova ôr sha ikyev i Yeremia la,+ zan zan tar la mem sha ayange a u mem ga la cii.+ Er tar la lu ice la u mem, zan zan anyom 70 kar been.+
22 Ken inyom i hiihii i Shirushi+ tor u Pershia tema tor la, Yehova mgbegha Shirushi tor u Pershia yôô kwagh ken tartor na cii, shi a nger kwagh ne shin inya kpaa,+ sha u kwaghôron u Yehova ôr sha zwa u Yeremia+ la a kure sha mi yô, a kaa ér:
23 “Ka kwagh u Shirushi tor u Pershia a ôr je ne, ér, ‘Yehova Aôndo u sha nam ityartor i sha tar cii,+ shi a kaa ér mo m maa un iyou ken Yerusalem, u a lu ken Yuda la.+ Hanma wen u nan lu ken ior nav cii, Yehova Aôndo u nan a lu a nan, nahan nana kôndo nana za.’”+
Ngeren mba shin kpe
^ Talenti môm yange a lu ukilogeram 34.2. Nenge Ngeren u Seer u B14 la.
^ Shin a fatyô u kaan ér, hen shighe u fam.
^ Zwa Heberu, “a nômbo ikyôr.”
