Kroniku u sha Uhar 35:1-27
35 Yoshia er Paseka+ sha ci u Yehova ken Yerusalem, nahan ve sôngo nagh ku Paseka+ sha uwer u hiihii ayange 14.+
2 A na upristi ityom ve shi a taver ve ishima ér ve er tom ve u ken iyou i Yehova la.+
3 Maa a kaa a Mbalevi mba ve tesen Iserael cii,+ ve mba i tsegha sha ci u Yehova la ér: “Ver nen icighan Areki ken iyou i Solomon wan u Davidi tor u Iserael maa la;+ ne kera tôôn un sha akende ga.+ Hegen yô, civir nen Yehova Aôndo wen man u ior nav Iserael.
4 Wa nen iyol sha uya mba uter enev sha iniongo yen vough vough, u dondon kwagh u Davidi+ tor u Iserael man wan na Solomon nger la.+
5 Tile nen hen icighanjiir sha iniongo i sha uya mba uter mba ior,* ka anmgbianev enev je la, hanma ve nana tile sha nongo u hen ya u ter u ipyaven u Mbalevi.
6 Sôngo nen nagh ku Paseka,+ wanger nen ayol a en shi wa nen agoyol sha er anmgbianev enev vea er kwagh u Yehova ôr sha ikyev i Mose la yô.”
7 Yoshia na ior ilev man anomaiyôngo kua agumakpev, u nan iniav mbi Paseka sha ci u ior mba ve lu her la cii. Kohol cii yô, lu ilev 30,000 kua ibua 3,000. Lu akaa a tor dugh ken akaa a na iyol na, na je ne.+
8 Mbahemenev nav kpa er iyua sha asema a ve sha ci u ior man upristi kua Mbalevi. Hilkia+ man Sekaria kua Yehiel, mbahemenev mba hen ya u Aôndo u mimi la di, na upristi iniav mbi Paseka 2,600 man ibua 300.
9 Konania man anmgbianev nav Shemaia man Netanel kua Hashabia man Yeiel man Yosabadi, mbahemenev mba Mbalevi, na Mbalevi iniav mbi Paseka 5,000 man ibua 500.
10 Mba we ago iyol mba been yô, upristi tile sha ajiir a ve shi Mbalevi kpa tile sha iniongo ve,+ er tor kaa nahan.
11 Ve sôngo iniav mbi Paseka,+ maa upristi mishi awambe a ve ngohol hen ve la+ sha atse a nanden nagh, er Mbalevi lu bughun akôv a inyam la.+
12 Mba been yô, ve wa ago iyol sha iniav mbi nanden sha er vea kar ior mba ve lu sha iniongo i hen ya u ter ve cii mbi yô. Ve er nahan sha er vea fatyô u nan Yehova mbi er i nger ken takeda u Mose nahan; kape ve er a ibua kpaa je la.
13 Ve jiidi* nagh ku Paseka sha usu vough er i eren nahan;+ ve jiidi iniav mbi i tsegha la shin atsua man ujogobi kua agbande, mba been yô, ve va a mi fese hen ior mbagen mbara cii.
14 Maa ve wa ago iyol sha ci ve man sha ci u upristi, gadia upristi, ka ônov mba Aron je la, lu nan iniav mbi nanden man ahôm a ilev zan zan tugh, nahan Mbalevi wa ago iyol sha ci ve man sha ci u upristi, ka ônov mba Aron je la.
15 Shi mbaatsamev, ka ônov mba Asav je la,+ tile sha ajiir a ve, er tindi u Davidi+ man Asav+ man Heman kua Yedutun+ ornengen tor mbampase kaa nahan; shi mbakuranihinda lu sha ihinda kposo kposo.+ Ityôkyaa lu i vea undu tom ve ga, sha ci u anmgbianev vev Mbalevi vande wan ago iyol sha ci ve.
16 Tsô i wa ago iyol sha tom u Yehova cii sha iyange la u eren Paseka+ shi nan iniav mbi nanden sha atse a Yehova, vough er Tor Yoshia kaa nahan.+
17 Mbaiserael mba ve lu her la, er Paseka hen shighe la, kua Iniongo i Beredi u I We Kwa sha Mi Ga la ayange ataankarahar.+
18 Mayange i lu a er Paseka er ngula nahan ken Iserael ga, hii sha ayange a profeti Samuel la je; shin ma tor ken utor mba Iserael mbagen nan vande eren Paseka er u Yoshia+ man upristi man Mbalevi kua Yuda man Iserael mba ve lu her la cii, man ior mba ve lu ken Yerusalem la er nahan ga.
19 Yange i er Paseka ne ken inyom i sha 18 i hemen u Yoshia.
20 Akaa ne nga karen kera, hen shighe u Yoshia sôr tempel* bee kera la yô, Neko+ tor u Igipiti kôndo va u nôngon ityav hen Karkemishi hen ifi u Uferati. Maa Yoshia due u za nôngon ityav a na.+
21 Nahan a tindi mbaôron-loho hen a na, a kaa ér: “Ka nyi you sha kwagh ne, we tor u Yuda? Ka we m lu van u nôngon ityav a we ga, kpa ka ya ugen m lu van u nôngon ityav a na ye, shi Aôndo kaa a mo ér mo m er fese. Wea soo wer i kpe u iyol yô, de hendan kwagh a Aôndo, un u a lu a mo la ga, gayô una va a mtim sha a we.”
22 Nahan kpa, Yoshia hide ijime ga, a yer iyol+ sha u una nôngo ityav a na yô, a lumun u keghen ato a mkaanem ma Neko, ma ma due sha zwa u Aôndo la ga. Tsô Yoshia va ityav shin Pev u Megido.+
23 Mbakerenavaan maa ker ivaan ta Tor Yoshia, nahan tor kaa a mbatomov nav ér: “Due nen a mo hen ijiir ne kera, sha ci u i vihim iyol kehelee.”
24 Tsô mbatomov nav kôr un due a na shin ikyekyeutya kera, za wa un shin ikyekyeutya na i sha uhar, tôô un va a mi ken Yerusalem. Nahan a kpe, i ii un ken uwar u uter nav.+ Yuda man Yerusalem cii vaa Yoshia.
25 Tsô Yeremia+ wa icam i vaan ku u Yoshia, nahan nomso man kasev mba wan atsam cii+ za hemen u wan icam sha kwagh u Yoshia ken atsam a kuugh a ve zan zan nyian; nahan i kure ikyaa ér a waan a ken Iserael, maa i nger a ken takeda u atsam a kuugh.
26 Akaa agen ken yiase i Yoshia cii man dooshima u mimi u a tese sha u dondon kwagh u i nger ken Tindi u Yehova la,
27 man kwagh u a er ken mhii zan zan mkur yô, i nger ken Takeda u Ator a Iserael man a Yuda.+
