Kroniku u sha Uhar 5:1-14
5 Tsô Solomon er hanma tom u gba u una er sha ci u iyou i Yehova la cii bee.+ Solomon maa nyôr a akaa a ter na Davidi tsegha a la,+ shi a ver azurufa man zanaria kua akaa agen la cii ken ayou a koson akaainjaa ken iyou i Aôndo u mimi la.+
2 Hen shighe la, Solomon kohol mbatamen mba Iserael, ka mbayaav mba sha uipyaven cii man mbahemenev mba sha uya mba uter mba Mbaiserael je la. Ve va ken Yerusalem sha u vea za tôô areki u ikyuryan u Yehova la ken Gar u Davidi,+ ka Shion je la,+ vea kôndo a va a mi yô.
3 Nomso mba Iserael cii kohol sha ishigh ki tor, hen iniongo* igen, i i eren ken uwer u sha utaankaruhar yô.+
4 Tsô mbatamen mba Iserael cii va, maa Mbalevi kende a Areki sha.+
5 Ve kôndo ve va a Areki man tenti u kohol ker la,+ man uicighanmbaakaav mba ve lu ken tenti shon la cii. Lu upristi man Mbalevi* ve kôndo ve va a mi ye.
6 Tor Solomon man Mbaiserael mba i lôhô ve ér ve za kohol imôngo vea na la cii, tile sha ishigh ki Areki. Nahan i na nagh sha iyôngo man ibua kpishi,+ ngee je gande u ôron iyenge.
7 Maa upristi va a areki u ikyuryan u Yehova la hen ijiir na; ve nyôr a mi ken kparyou u hemban lun ken atô ken iyou la, ka Icighankpar u Hemban Cii je la, ve ver un shin akper a ucerubi mbara.+
8 Sha nahan yô, akper a ucerubi mbara samber sha ijiir i Areki la, nahan ucerubi mbara cir Areki la, man igbough na+ cii sha.
9 Igbough la lihe je yô, aluer or tile hen Icighankpar, sha ishigh ki kparyou u hemban lun ken atô la yô, nana nenge a ityouv mbi igbough mbi shon, kpa aluer or tile ken won yô, nana nenge a mbi ga. Mbi her zan zan nyian.
10 Kwagh môm lu ken Areki la ga, saa di ikpande-awen i ihiar i Mose wa ker hen Horebi+ la tseegh. Mose yange er kwagh ne shighe u Yehova ya ikyur+ vea ior i Iserael, zum u ve lu duen ken Igipiti la.+
11 Upristi mba dugh hen icighanjiir la yô, (gadia upristi mba ve lu her la cii wanger ayol a ve,+ shin er ve lu ken iniongo kposo kposo nahan kpaa),+
12 Mbalevi mba wan atsam cii,+ mba Asav+ man Heman+ man Yedutun+ kua ônov vev mba nomso man anmgbianev vev hemen la, hua akondo a doon ashe, kôr myôm ma kuhwan man akaa a kuhwan kwagh a lun a ikyar, kua mbaadiguve; ve tile hen atse a nan nagh vegher u sha ityoughkitaregh la, upristi 120 lu vea ve, lu tôngon ibusa.+
13 Mbatôngon ibusa man mbawan atsam mba ngur wuese Yehova shi sughun un imôngo, shi er i ungwa ityogholov mbi ibusa man myôm ma kuhwan man akaa a kuhwan kwagh agen a lun a ikyar, er ve lu wuese Yehova “sha ci u a doo; dooshima na ka u been mayange ga”+ la yô, iyou la, ka iyou i Yehova je la, iv a ibyeenegh.+
14 Upristi kera fatyô u tilen eren tom ga sha ci u ibyeenegh kira, gadia iengem i Yehova iv iyou i Aôndo u mimi la.+
