Kroniku u sha Uhar 32:1-33
32 Hesekia eren akaa ne sha jighjigh u nan been cii yô,+ Tor Senakeribi u Ashiria va nyôr ken Yuda. A wa agar a lun a ugir mba taver atô ningir tser; awashima na lu u hemben agar la nyôron ngohol a.+
2 Hesekia nengen ér Senakeribi va a awashima u tan ityav sha Yerusalem yô,
3 a za idyu a mbahemenev nav man mbautyaav nav, been yô, a tsua ér una cir amboramnger a ken won u gar la,+ nahan ve lumun a na.
4 Maa i kohol ior kpishi imôngo, nahan ve cir amboramnger cii kua uwagh u u kuan u karen ken gar la, ve kaa ér: “A er nan utor mba Ashiria vea va vea va zua a mngerem kpishi nahana?”
5 Heela tseegh ga, a kange ishima a hide a maa kpekpe u i hembe i haa inya la cii, shi a maa ayou a taven sha mi, a gema a maa kpekpe ugen ken won. Shi a sôr Igyungu*+ i Gar u Davidi, shi a er ikyav mbi tswamev* man ipyerutya kpishi.
6 Maa a ver ukurmbautyaav ér ve nengen sha ior, nahan a kohol ve imôngo hen tembe u gar la a taver ve ishima, a kaa ér:
7 “Taver nen ishima shi tile nen dông. De cie nen ga, shi de gbidi nen akarkase iyol sha ci u tor u Ashiria+ kua ikpelaior i i lu vea na la cii kpaa ga, gadia mba ve lu a vese la hemba ngeen a mba ve lu a na la.+
8 Mba ve lu a na la ka uumace, kpa se yô, ka Yehova Aôndo wase a lu a vese ye; una wase se shi una nôngo ityav yasev.”+ Nahan mkaanem ma Hesekia tor u Yuda ôr la taver ior ishima.+
9 Shighe u akaa ne er kera la, Senakeribi tor u Ashiria lu hen Lakishi+ vea mbautyaav nav mba ageev cii, maa a tindi mbatomov nav ken Yerusalem hen Hesekia tor u Yuda man hen Mbayuda mba ve lu ken Yerusalem la cii,+ a kaa ér:
10 “Ka kwagh u Senakeribi tor u Ashiria a kaa ne, ér, ‘Ka nyi ne suur sha mi ve ne lu ken Yerusalem her, er i kase un i we un atô nahan kpaa?+
11 Hesekia ngu bumen ne shi nan ér ne kpe ijen man imura, kaan ér: “Yehova Aôndo wase una yima se sha ikyev i tor u Ashiria” ga̱?+
12 Ka Hesekia ne môm môm yange bee a ajiir a taven a Aôndo wen+ man atse a Na,+ maa kaa a Yuda man Yerusalem ér: “Ka atse ne tseegh guren nen her shi naan nen iniav mnyim ma duen sha mi ye” gaa?+
13 Ne fa kwagh u mo man uter av er a ior mba ken ityar la cii gaa?+ Yange mbaaôndo mba akuraior a ken ityar la fatyô u yiman ityar ve sha ikyev yam kpa?+
14 Ken mbaaôndo mba akuraior a uter av tim ve la cii, ka aôndo u han fatyô u yiman ior mba nan sha ikyev yam ve, Aôndo wen una fatyô u yiman ne sha ikyev yama?+
15 Yô, de deen nen ner Hesekia a bume ne shin a tsume a ven nahan ga!+ De ne nen un jighjigh ga, sha ci u aôndo môm u ma ikyurior shin ma tartor fatyô u yiman ior mba nan sha ikyev yam shin sha ikyev i uter av ga. Man hide Aôndo wen ve una fatyô u yiman ne sha ikyev yam yee?’”+
16 Mbatomov nav hemba lahan Yehova Aôndo u mimi man ortom na Hesekia cii.
17 Shi a nger uwashika+ a tuhwa Yehova Aôndo u Iserael,+ a lam sha a na dang, a kaa ér: “Er mbaaôndo mba akuraior a ken ityar la fatyô u yiman ior vev sha ikyev yam ga nahan,+ kape Aôndo u Hesekia kpa una fatyô u yiman ior nav sha ikyev yam ga je la.”
18 Tsô ve gba yilan ior mba ken Yerusalem mba ve lu sha kpekpe la genger genger ken zwa u Mbayuda, sha u vea er ve ve cia, ve gbidye akarkase iyol, nahan vea ngohol gar la yô.+
19 Ve lam sha Aôndo u Yerusalem dang, er ve lamen sha mbaaôndo mba ior i tar ne, mba ve lu tomaveegh u orumace la nahan.
20 Kpa Tor Hesekia man profeti Yesaia+ wan u Amoshi za hemen u eren msen sha kwagh ne, vaan a usha ér ve wase ve.+
21 Yehova maa tindi ortyom va wua hanma orutya u ageegh+ man orhemen kua kurutya ken afo a tor u Ashiria, nahan a hide a yem ken tar na a ihyeen iyol. Shighe kar yô, a nyôr ken iyou i* aôndo na, maa ônov nav mba nomso mbagen za wua un ker sha sanker.+
22 Yehova maa yima Hesekia man ior mba ken Yerusalem, nahan Senakeribi tor u Ashiria man ior mbagen cii kera fatyô u bulan ve ga, shi na ve mmem sha hanma vegher cii.
23 Tsô ior kpishi va Yehova a uiyua hen Yerusalem, shi Hesekia tor u Yuda kpa, ve va un a akaa a doon.+ Ken masejime yô, akuraior cii gema nan un icivir kpishi.
24 Sha ayange la, Hesekia gba angev je lu nôngon ku, nahan a er msen hen Yehova.+ Tsô a ungwa un shi a na un ikyav.*+
25 Kpa Hesekia tese iwuese sha kwagh u dedoo u i er a na la ga, sha ci u a hingir u kenden a iyol sha, nahan a na ishima vihi Aôndo a na kua Yuda man Yerusalem.
26 Nahan kpa, Hesekia hide a iyol na ijime, kera kende a iyol sha ga,+ un man ior mba ve lu ken Yerusalem la, nahan ishima kera vihi Yehova a ve sha ayange a Hesekia la ga.+
27 Hesekia va lu a inyaregh man icivir kpishi;+ nahan a maa ayou a koson akaa+ sha ci na, sha u una ver azurufa man zanaria man awen a injaa man mkurem ma balsam man ipyerutya kua akaainjaa cii ker yô.
28 Shi a er ajiir a koson samuyia man wain u he man mkurem, kua atôr a uzendenya atô kposo kposo man atôr a iyôngo.
29 Shi a maa agar sha ci na, gadia a lu a uzendenya man iyôngo kua ibua kpishi, sha ci u Aôndo na un akaa ngee.
30 Lu Hesekia cir imbormnger+ i Gihon+ i sha, gema goom a i sen a mi jighilii ken Gar u Davidi+ vegher u shin ityôtar la ye, shi hanma tom u Hesekia cii za doo.
31 Nahan kpa, shighe u i tindi mbaôronkwagh sha ci u mbahemenev mba Babilon ér ve va pine un kwagh sha kwagh u ikyav*+ i i nenge a mi hen tar la yô,+ Aôndo u mimi undu un u karen un,+ sha u una fa ishima na vindi vindi yô.+
32 Akaa agen ken yiase i Hesekia man aeren a na a dedoo la cii,+ i nger ken mpase u sha mnenge u profeti Yesaia+ wan u Amoshi, ken Takeda u Utor mba Yuda man Utor mba Iserael.+
33 Tsô Hesekia kpe, i ii un vea uter nav, ve ii un sha igyungu i zan hen ajiir a iin ior a ônov mba Davidi.+ Nahan shighe u kpe la, Yuda man ior mba ken Yerusalem cii na un icivir. Maa wan na Manase kar tema tor sha ityough nagh.
