Kroniku u sha Uhar 4:1-22
4 Tsô a er atse a nan nagh a sha togula,+ lihe aseva 20, gbanger aseva 20, gema tav aseva 10.
2 A er Zegegbangi u Mnger+ sha iyô, i ker un a ker; a yila un ér Zegemnger u Togula. Mough hen kurugh nagh môm yem hen kurugh nagh ku genegh kura lu aseva 10, gema tav aseva 5. Shi i kar indi i Zegegbangi u Mnger la a kor u karen kwagh yô, lu aseva 30.+
3 Shi ikyua a akur a Zegegbangi u Mnger la, i er hwe u atamaikyon a kiriki a lun vingir vingir+ ningir un cii tser; ve lu pue sha hanma ishiva, ningir Zegegbangi u Mnger la tser. I er atamaikyon la iniongo ihiar a Zegegbangi u Mnger la imôngo.
4 Zegegbangi u Mnger la tema sha anomabua 12,+ a 3 na ishigh ken imbusutarimese, a 3 na ishigh shin ityôtar, a 3 na ishigh ken imbusutariyan, a 3 agen la gema na ishigh sha ityoughkitaregh; Zegegbangi u Mnger la tema sha anomabua shon, anomabua la na atô a a cii hen atô.
5 Zegegbangi u Mnger la civir er igbangese i ikyevwe* nahan; i er kurugh nagh lu er kurugh ku kôôpu nahan, man er imondon i faluwa nahan. Zegegbangi u Mnger la a tôô ubav mba mngerev uikyaren 3,000.*
6 Heela tseegh ga, a er ugbangi pue mba kiren kwagh, a ver utaan ken iyan, utaan ken imese.+ Ve elegh akaa a i eren tom a mi u nanden nagh la shimi.+ Kpa Zegegbangi u Mnger la yô, lu sha ci u upristi ve ôôn ave man angahar.+
7 Maa a er udaarmbaamengerev mba sha zanaria pue,+ er i tese nahan,+ a ver ve ken tempel, utaan ken iyan, utaan ken imese.+
8 Shi a er utebul pue, a ver ve ken tempel, utaan ken iyan, utaan ken imese;+ shi a er agbande a sha zanaria 100.
9 Maa a er tembe+ u upristi+ man tembe u vesen*+ man ihinda i tembe shon, a cir togula sha ihinda i ityembe la.
10 A ver Zegegbangi u Mnger la ken iyan, vegher u sha ityoughkitaregh.+
11 Hiram shi er akaa a haan mtuhwem man ushebul kua agbande.+
Nahan Hiram er tom sha iyou i Aôndo u mimi la sha ci u Tor Solomon cii bee:+
12 lu mtôm mhar+ man mtem ma ma lu sha ityouv mbi mtôm ma mhar mara, man uhwe uhar mba lun er kper+ nahan sha u cirin mtem mhar, ma ma lu sha ityouv mbi mtôm mara la;
13 man upomegraneti 400+ sha ci u uhwe uhar mba i er ve lu er ukper nahan la, man iniongo ihiar i pomegraneti sha ci u hanma hwe u lun er kper nahan la, sha u cirin mtem mhar ma ma lu sha ityouv mbi mtôm mara la;+
14 man akaa a pue a tôôn ikyav la, man ugbangi pue mba ve lu sha akaa a tôôn ikyav shon la;+
15 man Zegegbangi u Mnger la kua anomabua 12 a a lu shin ityô na la;+
16 man akaa a haan mtuhwem shimi man ushebul man ufôôku,+ kua ikyav vev mbigen cii Hiram-abiv+ er sha togula u engem sha ci u Tor Solomon man sha ci u iyou i Yehova la.
17 Tor ker akaa ne hen haregh u Yordan, hen inyatyuu i tiher, hen atô u Sukoti+ man Sereda.
18 Ikyav mbin cii Solomon er mbi ngee kpishi je yô, i fa myohom ma togula la ga.+
19 Solomon er ikyav+ mbi ken iyou i Aôndo u mimi la cii: lu atse a nan nagh a sha zanaria;+ man utebul+ mba a veren beredi u sha ishigh ki Aôndo sha mi la;+
20 man udaarmbaamengerev kua amenger a ve a sha zanaria u wang,+ sha er a tsaren a ken kparyou u hemban lun ken atô la, vough er i tese nahan;
21 man uimondon mba faluwa man amenger man ugbegba;* ve cii i er ve sha zanaria, lu zanaria u hemban doon cii;
22 man akaa a pirin usu a mi man agbande man ukôôpu man agbande a usu, ve cii i er ve sha zanaria u wang; man ihinda i Icighankpar u Hemban Cii+ man ihinda i nyôron ken tempel la cii, i er sha zanaria.+
Ngeren mba shin kpe
^ Nôngo u kuman er usentimita 7.4 nahan (inci 2.9). Nenge Ngeren u Seer u B14 la.
^ Bav môm yange a lu ulita 22 (ugalôn 5.81). Nenge Ngeren u Seer u B14 la.
^ Shin “zegeijiir.”
^ Shin “akambe a dughun usu a mi.”
