Kroniku u sha Uhar 3:1-17
3 Tsô Solomon hii u maan iyou i Yehova+ ken Yerusalem sha Uwo u Moria,+ ape Yehova ande hen ter na Davidi,+ hen ijiir i Davidi er sha vande u gbidyen iyiav u Ornan+ Oryebushi la.
2 A hii u maan i sha iyange i sha uhar ken uwer u sha uhar, ken inyom i sha unyiin i tema tor la.
3 Ityôyoughough i Solomon wa u maan iyou i Aôndo u mimi la, lihe aseva 60, gbanger aseva 20,+ u zuan sha ikyaren* i tse la.
4 Varenda u sha ishi la gbanger aseva 20, lu kwagh môm a igbanger i iyou la,* ityaven na lu 20;* a var un zanaria u wang ken atô.+
5 A var ikpande i kon u yunipa sha zegeyou la been yô, a cir zanaria u wang sha mi,+ maa a er hwe u ikyon i ivilegh+ man mshirim+ sha mi.
6 Heela tseegh ga, a var awen a injaa a doon ashe sha iyou la;+ zanaria+ u er tom a mi la, lu zanaria u ken Parvaim.
7 A cir zanaria+ sha iyou la man sha ikyon i sha uha man ikpandehinda i shin inya, man sha ukpekpe mba i, kua sha ihinda i i; shi a er hwe u ucerubi sha ukpekpe.+
8 A er Icighankpar u Hemban Cii;*+ ilihen na lu kwagh môm a igbanger i iyou la, lu aseva 20, igbanger na lu aseva 20. A cir un zanaria u dedoo utalenti* 600.+
9 Myohom ma zanaria u sha ci u ukusa lu ushekel* 50; a cir ukpombaayoughough mba sha mbara zanaria.
10 Maa a gba ucerubi uhar ken Icighankpar u Hemban Cii* la, a cir ve zanaria.+
11 Ilihen i akper a ucerubi mbara+ cii lu aseva 20; kperegh ku cerubi u hiihii la lihe aseva ataan, bende ken kpekpe u iyou la, kperegh nagh ku gen kura kpa lihe aseva ataan, bende a môm ken akper a cerubi ugen la.
12 Kperegh ku cerubi ugen la kpa lihe aseva ataan, bende ken kpekpe u iyou la ugen, kperegh nagh ku gen kura kpa lihe aseva ataan, bende a môm ken akper a cerubi u hiihii la.
13 Akper a ucerubi mban samber kera kuma aseva 20; ve tile sha angahar a ve, ve na ishigh ken atô.*
14 Shi a er ikyondo i yisan+ a mou u buluu-buluu man mou u nyian dindee man mou u nyian jang man ikyondo i doon ashe; a er hwe u ucerubi sha mi.+
15 Maa a er mtôm mhar+ sha ishigh ki iyou la, lihe aseva 35; ityegh ki ki lu sha ityough ki hanma ityôgh la, lu aseva ataan.+
16 Shi a er mshirim ma lun er mshirim ma sha mon nahan, a penda ma sha ityouv mbi mtôm mara, maa a er upomegraneti 100 a penda sha mshirim mara.
17 A tim mtôm mara sha ishigh ki tempel, ki i môm ken iyan,* kigen ken imese;* a yila ki ken iyan kira ér Yakin,* a gema a yila ki ken imese la ér Boashi.*
Ngeren mba shin kpe
^ Ashighe kpishi ishiva i môm yange i lu usentimita 44.5, kpa mbagenev nenge ér ikyaren i tse la yange i lihe aseva usentimita 51.8. Nenge Ngeren u Seer u B14 la.
^ Ungeren mba sha ave mba sha ayange a tsuaa mbagen kaa ér “120,” kpa ungeren mba sha ave mbagen kua mbamgem mba Bibilo mbagen yô, kaa ér “aseva 20.”
^ Shin “igbanger i iyou la lu aseva 20.”
^ Talenti môm yange a lu ukilogeram 34.2. Nenge Ngeren u Seer u B14 la.
^ Zwa Heberu, “iyou.”
^ Shekel môm yange a lu ugeram 11.4. Nenge Ngeren u Seer u B14 la.
^ Zwa Heberu, “iyou.”
^ Ka vegher u Icighan la je la.
^ Shin “imbusutariyan.”
^ Shin “imbusutarimese.”
^ Inja na yô ér, “A (ka Yehova je la) na i taver gbang.”
^ Inja na a fatyô u lun: “A agee.”
