Kroniku u sha Uhar 30:1-27
-
Hesekia er iniongo i Paseka (1-27)
30 Hesekia tindi loho hen Iserael+ man Yuda cii, shi a nger uwashika je kpaa hen Eferaim man Manase,+ ér ve va hen iyou i Yehova ken Yerusalem ve va er Paseka u Yehova Aôndo u Iserael.+
2 Nahan kpa, tor man mbahemenev nav, kua nongoior u ken Yerusalem la cii tsua ér vea er Paseka la ken uwer u sha uhar,+
3 gadia ve fatyô u eren un sha shighe u i eren un la ga,+ sha ci u lu upristi kpuaa tseegh wanger ayol a ve ye,+ shi ior kpa kohol ken Yerusalem ga.
4 Tor man nongoior la cii nenge kwagh u i er ne ér ka u vough.
5 Tsô ve tsua ér vea yôô ken Iserael cii, hii hen Bersheba zan zan nyôr Dan+ ér ior ve va, ve va er Paseka u Yehova Aôndo u Iserael ken Yerusalem, sha ci u ve kera er Paseka ne imôngo er i nger nahan la ga.+
6 Nahan mbazanaloho* zende ken Iserael man Yuda cii a uwashika mba tor man mbahemenev nav, er tor kaa nahan ér: “Ne ior i Iserael, hide nen hen Yehova Aôndo u Aberaham man Isaka kua Iserael, sha er una hide hen mba ve shi her, mba ve war sha ikyev i utor mba Ashiria la yô.+
7 De eren nen kwagh er uter enev man anmgbianev enev mba ve er kwagh a Yehova Aôndo u uter enev sha mimi ga la ze, gadia ieren ve ne na yô, Aôndo va a kwaghtseren sha a ve, sha er a kpiligh mba ve nenge shi ve ongo la iyol, vough er ne lu nengen hegen nahan.+
8 Hegen yô, de taver nen ityough er uter enev nahan ga.+ Wa nen ayol a en sha ikyev i Yehova, va nen hen icighanjiir na+ u a tsegh gbem sha won la, va civir nen Yehova Aôndo wen, sha er una kera vihi ishima a ven ga yô.+
9 Aluer ne hide hen Yehova yô, mba ve ker anmgbianev enev man ônov enev la vea zungwe ve mhôônom+ vea de ve, vea hide hen tar ne,+ sha ci u Yehova Aôndo wen eren a ior kundu kundu shi zungu mhôônom;+ nahan aluer ne hide hen a na yô, una gema ijime a ven ga.”+
10 Tsô mbazanaloho* zende sha agar agar ken tar u Eferaim man Manase cii,+ kua ken Sebulon je kpaa, kpa ior lu sen ve shi nahan ve tar.+
11 Nahan kpa, ior mbagen ken Asher man Manase kua Sebulon hide a ayol a ve ijime va ken Yerusalem.+
12 Uwegh ku Aôndo u mimi lu ken Yuda kpaa, sha u una zua ve,* ve er kwagh u tor man mbahemenev kaa la, sha kwaghôron u Yehova.
13 Zegeikpelaior kohol imôngo ken Yerusalem sha u eren Iniongo i Beredi u I We Kwa sha Mi Ga la+ ken uwer u sha uhar;+ lu nongoior u ngeen iyenge kpishi je.
14 Tsô ve mough ve kura atse a a lu ken Yerusalem la,+ shi ve kura atse a nanden insensi la cii+ ve za haa shin Pev u Kideron.
15 Nahan ve sôngo ilev mbi nan nagh ku Paseka la sha uwer u sha uhar ayange 14. Kunya kôr upristi man Mbalevi nahan ve wanger ayol a ve, ve va a iniav mbi nanden hen iyou i Yehova.
16 Ve tile sha ajiir a ve vanden tilen la, vough er Tindi u Mose, or u Aôndo u mimi la tese nahan; upristi maa mishi awambe+ a Mbalevi na ve la sha atse a nan nagh.
17 Ior lu ken nongoior la kpishi mba ve wanger ayol a ve ga yô, shi Mbalevi lu nengen sha ilev mbi nan iniav mbi Paseka sha ci u ior mba ve lu wang ga la cii,+ sha u tseghan ve sha ci u Yehova.
18 Gadia zegeikpelaior, hemban je yô, ior mba ken Eferaim man Manase+ man Isakar kua Sebulon wanger ayol a ve ga, kpa ve ya Paseka shin er tindi venda nahan kpaa. Kpa Hesekia er msen sha ci ve kaa ér: “Yehova, un u a doo la,+ a de ne kwaghbo,
19 ne mba ne ser asema a en sha u keren Aôndo u mimi,+ Yehova Aôndo u uter nav la cii, shin er i wanger ne er atindi a sha kwagh u uicighanmbaakaav a tese la ga nahan kpaa.”+
20 Tsô Yehova ungwa msen u Hesekia, nahan a de ior a kwaghbo.*
21 Tsô Mbaiserael mba ve lu ken Yerusalem la, er iniongo i Beredi u I We Kwa sha Mi Ga la+ ayange ataankarahar, ve ember tsung;+ shi Mbalevi man upristi lu wuese Yehova ayange ayange, ve lu kuhwan ityogholough a akaa a ve a kuhwan kwagh genger genger sha ci u Yehova.+
22 Heela tseegh ga, Hesekia lam a Mbalevi mba ve lu civir Yehova sha kwaghfan la cii shi taver ve ishima. Nahan ve ya kwagh ayange ataankarahar a iniongo la cii,+ ve lu nan iniav mbi bem+ shi sughun Yehova Aôndo u uter vev.
23 Nongoior la cii maa tsua ér vea seer eren i ayange ataankarahar, nahan shi ve seer eren i ayange ataankarahar, ve lu ember.+
24 Tsô Hesekia tor u Yuda na anomabua 1,000 man iyôngo 7,000 sha ci u nongoior la, mbahemenev di na anomabua 1,000 man iyôngo 10,000 sha ci u nongoior la;+ shi upristi kpishi lu wanger ayol a ve.+
25 Tsô nongoior u Yuda man upristi man Mbalevi cii, man nongoior u u mough ken Iserael u va la cii,+ kua ushirmbaiorov+ mba ve mough ken tar u Iserael ve va la man ior mba ve lu ken Yuda la, za hemen u ember.
26 Ior ember ken Yerusalem tsung, sha ci u hii sha ayange a Solomon wan u Davidi tor u Iserael la je, imbakwagh ne lu a er ken Yerusalem ga.+
27 Ken masejime yô, upristi mba ve lu Mbalevi la mough tile sha, ver ior doo doo;+ nahan Aôndo ungwa imo ve, shi msen ve la nyôr sha, hen icighanjiir na.
