Kroniku u sha Uhar 1:1-17
1 Hementor u Solomon wan u Davidi lu taver seer a seer, shi Yehova Aôndo na lu a na; a na un lu a tahav kpishi.+
2 Solomon tindi ér i za ôr Iserael cii a va, lu mbahemenev mba ior dubu dubu man ior deri deri, man mbaajiriv man mbavesen mba ken Iserael cii, kua mbayaav mba sha uya mba uter.
3 Tsô Solomon man nongoior la cii za sha ijiir i taven hen Gibeon,+ sha ci u lu ape tenti u kohol ker u Aôndo u mimi lu je la, lu tenti u Mose ortom u Yehova er ken taaikyôngo la.
4 Nahan kpa, Davidi yange tôô areki u Aôndo u mimi la ken Kiriati-yearim,+ kôndo va a mi hen ijiir i Davidi sôr sha ci na la; yange tim tenti sha ci u areki la ken Yerusalem.+
5 Shi i ver atse a nan nagh a sha togula+ a Besalel+ wan u Uri, wan u Hur er la, sha ishigh ki tabernakel u Yehova; nahan Solomon man nongoior la cii ve za her ve za er msen.*
6 Solomon maa na iniav her sha ishigh ki Yehova, a na iniav mbi nanden sha ilev 1,000, sha atse a nan nagh a sha togula,+ a tenti u kohol ker la.
7 Hen tugh mbura, Aôndo ande hen Solomon kaa a na ér: “Ôrom kwagh u u soo wer m na u yô.”+
8 Solomon maa kaa a Aôndo ér: “U tese terem Davidi dooshima je gande,+ shi u verem tor sha ityough nagh.+
9 Hegen yô, Yehova Aôndo, kure ityendezwa i yange u er a terem Davidi la,+ gadia u verem tor sha ior mba ve ngee kpishi er waarawa u sha tar yô.+
10 Nahan yô, nam kwaghfan man mfe+ u me hemen ior mban* yô, gadia ka an nana fatyô u ôron ior ou mba ve ngee kpishi ne ijiri?”+
11 Tsô Aôndo kaa a Solomon ér: “Er kwagh ne a sar u, shi u sen wer u lu a akaa kpishi ga, u sen inyaregh man icivir kpaa ga, shin u sen wer mba ve ker u ihyom la ve kpe ga, shin u sen wer u lu uma gbem* kpaa ga, kpa u gem u sen kwaghfan man mfe u ôron ior av mba m ver u tor sha a ve la ijir yô,+
12 a na u kwaghfan man mfe, kpa shi me na u akaa kpishi man inyaregh man icivir, imba er utor mba ve vande lun a we la ve lu a mi ga, shi mba vea va ken hemen la kpa vea lu a mi ga yô.”+
13 Solomon maa mough hen ijiir i taven i hen Gibeon,+ sha ishigh ki tenti u kohol ker la, va ken Yerusalem; nahan a tema tor sha Iserael.
14 Solomon za hemen u ombon akekeautya man anyinya;* yange lu a akekeautya 1,400 man anyinya* 12,000;+ a ver a ken agar a akekeautya+ man ikyua a tor ken Yerusalem.+
15 Tor er azurufa man zanaria ngee ken Yerusalem er awen nahan,+ shi a er ikyon i sedar ngee kpishi er ikyon i sikamor* i ken Shefela nahan.+
16 Lu ken Igipiti i vaan a anyinya a Solomon ye;+ mbazendenkasua mba tor ve za yamen anyinya kpishi* sha ishe i i wa ve la,+ ve vaan a mi.
17 Yange í yam hanma ikyekyeutya ken Igipiti sha agbenger a azurufa 600 i va a mi, í yam nyinya i môm sha agbenger a azurufa 150; ve di ve gema ve tee utor mba Mbahiti man utor mba Mbashiria cii.
Ngeren mba shin kpe
^ Shin “ve za pine un kwagh her.”
^ Zwa Heberu, “u duen sha ishigh ki ior mban shi nyôron.”
^ Zwa Heberu, “ayange kpishi.”
^ Shin “mbahendananyinya.”
^ Shin “mbahendananyinya.”
^ U kpa ka kon u tur.
^ Shin a fatyô u kaan ér, “hen Igipiti man hen Kue, mbazenden kasua mba tor ve yam a hen Kue,” alaghga ka Shilishia.
